Мӧйму гожӧм «Газпром трансгаз Ухта» котыр коймӧдысь котыртліс Ямалӧ биару перйысьяс дорӧ пресс-тур. Корлісны и «Коми йӧзӧдчан керкаын» уджалысьӧс.
Чайта, тайӧ зэв бур, ӧд и комиӧн тшӧтш колӧ гижны гырысь предприятиеяслӧн удж йылысь.
«Сокровища Ямала – энергия страны» пресс-тур дырйи уджъёртъяскӧд ми нёль лун олiм вахтаӧн уджалысьяслӧн «Байдарацкӧй» комплексын. Пыри жырйӧ да, син улӧ медводз уси 3D-ӧчки. Чуймӧмла вомӧй паськалiс. Тшӧтш и та йылысь, а медвойдӧр, дерт, Ямалын удж да олӧм йылысь, сёрниті Анатолий Костроминкӧд.
Анатолий чужлӧма Сыктыв районса Кебра сиктын, дас во сайын семьяыскӧд вуджӧма Сыктывкарӧ. А меным тӧдмасьны сыкӧд мойвиис Ямалын. Дерт, юалі, кор да кыдзи сійӧ веськалӧма сэтчӧ?
–Ямалӧ уджавны вои 2015 воын. Дыр мӧвпалі, но век жӧ локті. Повзьӧдӧ вӧлі татшӧма олӧмтӧ вежӧмыс. Во уджалі, кажитчис да, и кольччи.
–Тані ми кежалім нин ненечьяс дорӧ. Неылын со чум сувтӧдӧмаӧсь, челядь котралӧны. Тэ накӧд паныдасьлан жӧ, сёрнитлан?
–Ненечьясыс волӧны миян столӧвӧйӧ сёянла, нянь да мыйсюрӧ босьтӧны-ньӧбӧны. Гожӧмнас, каникул дырйи, вайӧдлӧны татчӧ и челядьсӧ. А тӧвнас ичӧтъясыс бӧр мунӧны велӧдчыны. Волӧны миян дорӧ оз сӧмын няньла, но и, висьмасны кӧ, отсӧгла.
Та йылысь меным висьталіс нин Павел Куликов, Сосногорскын чужлӧм зон. 2002 воын Сыктывкарын сійӧ помалӧма медучилище, а ӧні Ямалын жӧ уджалӧ. Пресс-тур дырйи и ачым висьмылі да тшӧтш шыӧдчылі Павел дорӧ. Ыджыд аттьӧ висьтала сылы бурдӧдӧмсьыс. Сылӧн кывъяс серти, Ылі Войвылын уджавны кӧсйысьяслысь дзоньвидзалунсӧ зэв стрӧга видлалӧны. Ме пӧ дас во нин тані зіля, быдӧнӧс тӧда. Ямалын биару перйысьясӧс пӧ ыстывлӧны санаторий-курортъясӧ, ышӧдӧны кутчысьны дзоньвидза оласногӧ.
–Гортысь бокын уджавны абу кокни. Кыдзи тэ тӧлысь чӧжсӧ вахтаас олан? – бара на Анатолийлысь юалі.
–Уджавнытӧ ӧд быдлаын колӧ бура. Асывнас чеччан, сетасны наряд: со тайӧс да тайӧс талун колӧ вӧчны. Уджалігад и кадыс ӧдйӧджык кольӧ.
–Ме со жырйӧ пыри да медводз 3D-очки аддзи. А мый татшӧм ӧчкиӧн кино видзӧдӧм кындзи прӧст кадас вӧчлывланныд?
–Тані сауна эм, спортзал, кӧні волейболасьны, баскетболасьны позьӧ. Хоккейысь ворсан тренажёр. Рытнас кӧкъямыссянь дас часӧдз ворсам-тренируйтчам, сэсся душын мыссям. Эм и библиотека, но ме ёнасӧ ог лыддьысь, менӧ спортджык кыскӧ.
–А мый эськӧ тэ висьталін налы, кодъяс кӧсйӧны Ямалын уджавны? Оз ӧд ставныслы лӧсяв тані уджыс…
–Прӧста сiдз татчӧ он на веськав.
–И крепыд дзоньвидзалун колӧ. Ме тай со вои татчӧ да пыр жӧ и висьми. Вахтаӧн уджалысьӧн кӧ вӧлі, менӧ эськӧ бӧр гортӧ ыстiсны?
–Ыстыны эськӧ эз ыстыны. Миян ӧд фельдшер эм, сiйӧ некымын лун кежлӧ больничнӧй сетлас. А гортад на кӧ висьмин, звӧнитан мастерлы, да вежон кежлӧ сійӧ мездылас уджсьыд. Бурдӧдчан да, локтан, и медкомиссия выльысь видлалас тэнӧ.
–Тӧлысь кежлӧ мунлан гортсьыд, а локтан да, колӧ быдтор на удитны вӧчны. Тэ удитлан?
–Гортад воан да, заводитан котравны, сійӧс и тайӧс мед вӧчны. Дачаын на колӧ уджыштны. Кадыс гортад ӧдйӧ лэбӧ. А Ямалын вежоныс быттьӧ тӧлысь кыссьӧ.
Меным окота лоис тӧдмавны, мый мӧвпалӧны аньяс вахтаӧн уджалӧм йылысь, да нывъёртъяслысь юалі. Джамиля Литвинская висьталіс, быд уджын пӧ мыйкӧ бурыс эм, а мыйкӧ и омӧльыс тшӧтш. А вахтаӧн ветлӧмыд пӧ ӧдвакӧ торкас семья кост олӧмтӧ.
–Чайта, недыр кежлӧ торъявлӧмыд, ӧта-мӧдсьыд гажтӧмтчӧмыд топыдджыка на йитӧ гозъяӧс, – пасйис сійӧ.
А миян кадръяс кузя специалист Елена Вагнер шуис, ме пӧ эськӧ эг вермы овны вахтаӧн уджалыськӧд:
–Семьяын верӧслы да гӧтырлы ӧтлаын колӧ овны. Мӧд ног кӧ, кутшӧм нӧ сійӧ семья? И челядьтӧ на верӧсыд гежӧда кутас аддзывны.
А ме нӧшта содта со татшӧм мӧвп: газӧвикъяс кужӧны стрӧитны станцияяс да оланінъяс, нюжӧдны биару нуан трубаяс Арктикаын – сэні, кӧні кӧзяиныс сӧмын вӧр-ва. И мед вӧчны тайӧ сьӧкыд уджсӧ, колӧ ёртасьны ас костын, ёртасьны вӧр-вакӧд, пыдди пуктыны сійӧс.
Сёрнитіс Инесса Орёл.