Кулӧмдін районса Выльгортысь Владимир Артеев кок йылас сувтіс, пызан-диван дорышӧ кутчысьӧмӧн да кӧстыльӧн босьтчис ветлӧдлыны 12 арӧсӧн. Медводз гортас, мӧд вонас петіс йӧрас, а сэсся улич вылӧ. Усьласьліс, доймавліс, но эз няргы, песіс асьсӧ водзӧ. Босьтчис ветлыны ылӧджык и ылӧджык, грезд помӧдзыс, Помӧсдінӧдз.
–Мудза да, пуксьыштла, шойччышта да водзӧ. Зэв тӧдчана меным восьлавны-мунны, мед кӧть кӧстыль вылӧ пыксьӧмӧн, но ас кокӧн. Дерт, ёнджыкасӧ ветлӧдла гожӧмнас. Но кытчӧкӧ кӧ колӧ мунны быть, шуам, бурдӧдчанінӧ, ветла и тӧвнас, тулыснас да арнас, – ловнас оз усь том морт.
Бурдӧдысьяс эз казявны, а, гашкӧ, эз кӧсйыны дойдны Раиса Егоровна мамыслысь сьӧлӧмсӧ да эз висьтавны, мый пузчужӧм кагаыс абу дзоньвидза, мый сылӧн висьӧны кокъясыс.
Кытчӧ сӧмын эз нулы писӧ Раиса Егоровна, мед бурдӧдны сійӧс. Унаысь лэччылісны юркарӧ, ветлісны Уфаӧ, Самараӧ, весиг Украинаӧ, но зонка эз сувт кок йылас. Дзолядырйиыс сійӧс мамыс ки вылас и новлӧдліс. Но детинка быдмис да вочасӧн босьтчис ветлӧдлыны кӧстыльӧн.
Детсадйӧ эз ветлы. Кор Раиса Егоровна уджаліс, зонка оліс Егор Семёнович ыджыд батьыскӧд. Сійӧ и велӧдіс детинкаӧс ворсны шахматысь, шашкиысь, шегйысь. Олӧма морт вӧлі зарни кияса да ӧтарӧ мыйкӧ мастеритіс-вӧчис. Кӧрт тув, мӧлӧт да ножовка сетліс и внукыслы. Кокыд кӧ пӧ оз новлӧдлы, мед уджаласны юрыд да киясыд, олӧмад пӧ ставыс тайӧ ковмас.
Школаӧ зонка эз жӧ мун. Велӧдчис гортас. Ичӧт классъясын тӧдӧмлун сетісны Альбина Ивановна да Реция Михайловна Поповаяс. Владимир найӧс пыр виччысис, сылы окота вӧлі велӧдчынысӧ. Витӧд классянь ӧкмысӧдӧдз волывліс Нина Николаевна Глуханич. Велӧдіс математика, роч кыв да литература, коми кыв да литература, история. Владимир медся ёна радейтіс артасьны. Велӧдысь казяліс зільӧмсӧ да сетліс содтӧд гортса удж, мед зонка зілис водзӧ сӧвмыны.
Гортас жӧ волывлісны сійӧ кадас школаса директор Ф.Э.Линдт, завуч Р.А.Уляшева. Экзаменъяс сдайтӧм бӧрас мамыс уналаӧ ыстылісны документъяссӧ, мед пиыс велӧдчис водзӧ. Но вермытӧм зонмӧс некытчӧ эз босьтны. А дистанционнӧя эз на велӧдны. Кӧть эськӧ медкомиссияӧн веськӧдлысь Е.В.Климович шуис, мый Владимир вермас велӧдчыны водзӧ да тайӧс колӧ вӧчны быть.
Зонкалысь кок йылас зумыдджыка сувтны ыджыд кӧсйӧмсӧ казяліс спорт школаын велӧдысь Н.Н.Карманов да шуис ышӧдны сійӧс спортӧ. Лавкаысь босьтӧм лызь вылӧ ачыс вӧчис пуклӧс. Видлам пӧ, гашкӧ, артмас.
Раиса Егоровналы вӧлі нимкодь, мый висьысь пи вӧснаыс тӧжда и Николай Николаевич.
Сэки Выльгортын машинаыд вӧлі этша на да, улич вылын да чой йывсянь и исласис зонка. Николай Николаевич 17 арӧса Владимирӧс нуліс весиг юркарӧ, кӧні вермытӧмъяс ордйысисны лызьӧн котралӧмын. Сэні зон тӧдмасис аскоддьӧмыскӧд, кодъяс ловнас оз усьны да водзмӧстчӧны спортын. Но сэсся век жӧ гӧгӧрвоис, мый лызьӧн котралӧмыс – абу сылӧн, да дугӧдчис.
Ёнджыка кутіс ёртасьны сиктса зонъяскӧд, дзоляджык Елена чойыскӧд ӧти классын велӧдчысьяскӧд. На дорӧ ачыс ветлывлӧ, волывлӧны и сы дорӧ. Александр Шомысовкӧд да Артур Уляшевкӧд ворсӧ шахматысь. А шашкиысь ворслӧ ӧтнас. Быдмигас чойыскӧд, мамыскӧд да Галина Егоровна вежаньыскӧд ёна шегъясьліс.
Кадыс лэбӧ да, шуис велӧдчыны водзӧ. Мамыскӧд ньӧбисны машина, и 2014 воын муніс юркарӧ велӧдчыны шоперӧ. Сэки автошколаын велӧдысьяс эськӧ и волывлісны Помӧсдінӧ, но руль сайын колана тӧдӧмлун-сям босьтӧм могысь коліс ветлӧдлыны Кулӧмдінӧдз, велӧдчыны журъявны туйяс кузя, а сэсся юрсиктас жӧ ветлыны экзаменъяс сдайтны.
Владимир сёрнитчис Елена чойыскӧд, коді Коми пединститут помалӧм бӧрын оліс да велӧдіс карса школаын, да лэччис Сыктывкарӧ. Сэки Кулӧмдін районса сикт-посёлокъясын этша на журъяліс таксиыд, а карад ӧшинь улӧдзыд локтӧны да нуӧны кытчӧ колӧ. Владимир сдайтіс туй выв правилӧяс кузя да автодромын экзаменъяс, но карса уличаяс вылын сорсьыштіс. Мӧдысь эз нин ветлы сдайтнысӧ. Ӧні гортас кадысь кадӧ велӧдӧ туй выв правилӧяссӧ да сёрӧнджык кӧсйӧ нӧшта видлыны сдайтны экзаменсӧ.
Сійӧ жӧ воас районса йӧзӧс уджӧн могмӧдан шӧрин пыр Сыктывкарса кооперативнӧй техникумын куим тӧлысь велӧдчис бухгалтерӧ. Юркарын удж вылӧ позис инасьны, но удждонсӧ вӧзйисны ичӧтӧс. Оланін кӧртымалӧмӧн эз тырмы эськӧ тыр-бура овны сьӧмыс. А чойыслӧн аслас семья да, Владимир эз кӧсйы дӧсадитны найӧс.
Уджӧн могмӧдан районса шӧринсянь вӧзйисны шыӧдчывны Помӧсдін вожын кык котырӧ, кодъяс буретш корсисны бухгалтеръясӧс, но ӧтиас и мӧдас ыстысисны кутшӧмкӧ помка вылӧ да Владимирӧс эз босьтны.
Бухгалтерлӧн уджалан программа серти том морт велӧдчис вӧдитчыны компьютерӧн. Гортас ньӧбисны ноутбук, да ӧні интернетӧ пыралӧмӧн тӧдмалӧ уна выльтор. Владимир кӧсйӧ нӧшта велӧдчыны вурсьысьӧ. Шыӧдчис уджӧн могмӧдан шӧринӧ, но, тыдалӧ, тайӧ специальносьтсӧ босьтны окотитысьыс оз чукӧрмы да, эз на ыстыны.
Кык во сайын Владимир шуис овны ас кежас. Пӧрысь ыджыд мамыслӧн кольліс керка да, мамыс, дядьыс да Галина Егоровна вежаньыс дзоньталісны-выльмӧдісны сійӧс.
Дерт, том мортӧс ас кежас эз кольны. Пес пыртны волӧны матыссаясыс, ёртъясыс, а пачсӧ ломтӧ ачыс нин. Ачыс жӧ дасьтӧ кутшӧмсюрӧ нуръясянтор. Сёян вайӧны и мамыс да вежаньыс, на дорӧ жӧ корсюрӧ петавлӧ нуръясьны. Рытъяснас видзӧдӧ телевизор, пукалӧ ӧтуввезйын.
Владимир радейтӧ кыйны чери. Коркӧ ӧтнас, коркӧ ёртъясыскӧд ветлывлӧ Помӧс ю дорӧ.
–Векджык мӧдӧдча мича поводдя дырйи да войколӧн. Но ӧтчыд чорыда зэрмис, ёна гымаліс. А вӧлім ёрткӧд. Кыкнанным кӧтасим. Пестім бипур да косьтысим. Асывланьыс нин локтім гортӧ, – казьтыліс зон. Мамыс тшӧтш велӧдчыліс шоперӧ да, вотчыны ветлӧны машинаӧн Ягкӧдж сайӧ, босьтлӧны и Владимирӧс. Туй боксьыс и вотӧ тшак-тусьсӧ.
Восьса сьӧлӧма, варов да шань том морт. Нимкодясьӧ гӧсьтъяслы. Бурас эскӧмӧн олӧ. Оз радейт, кор сійӧс жалитӧны. Мый вермӧ, ставсӧ вӧчӧ ачыс…
Марина Дадашова.
Авторлӧн снимок вылын: Владимир Артеев Раиса Егоровна мамыскӧд.