Видео: Юалӧй мынтысьтӧг

Коми Республикаса юралысьлӧн Общественнӧй приёмнӧйын «веськыд йитӧда» сёрни нуӧдігӧн ӧні позьӧ звӧнитны сэтчӧ мынтысьтӧг. Тайӧ, дерт, бур юӧр!

 Общественнӧй приёмнӧйын зільысь Мария Юшкова висьталіс, мый республикаса юралысь Сергей Гапликовлӧн тшӧктӧм серти 8-800-200-96-14 номера телефон пыр некымын вежон нин позьӧ шыӧдчыны приёмнӧяс «веськыд йитӧд» дырйи.

–Сідзкӧ, республикаын быд олысьлӧн лои позянлун звӧнитлыны сэтчӧ?

–Да. Ӧнi «веськыд йитӧдыс» лоис йӧзыслы, торйӧн нин мукӧд кар-районсалы, матыссаджыкӧн да восьса-джыкӧн. Ӧд быдӧн вермас шыӧдчывны министерство-ведомствоса специалистъяс дорӧ да пыр жӧ кывны насянь вочакыв. И оз ков майшасьны, мый гортса либӧ мобильнӧй телефонсянь звӧнитӧмысь дон босьтасны.

–Мария, тіян чайтӧм серти, кодъяслы тайӧ лоас кивыв?

–Медводз налы, кодъяс тшӧкыдджыка шыӧдчывлӧны Общественнӧй приёмнӧйӧ «веськыд йитӧда» сёрни нуӧдігӧн: пенсионеръяслы, вермытӧмъяслы, нӧбасьысь аньяслы да ичӧт кагаӧс быдтысь мамъяслы. Налы оз нин ковмы аслыныс волыны юркарӧ либӧ корсьны специалистӧс, медым тӧдмавны найӧс майшӧдлана юалӧм вылӧ вочакыв.

–«Веськыд йитӧд» дырйи сӧмын ӧти номерӧ позьӧ звӧнитны?

–Эм и Сыктывкарса номер – 285-298. Водзті сэтчӧ и звӧнитлісны. Содта нӧшта, мый «веськыд йитӧда» сёрнисӧ сӧмын рочӧн нуӧдам.

–А кытысь тӧдмавны, кор да мый йылысь кутасны сёрнитны?

–Та йылысь юӧртӧны «Юрган» да «Коми гор» телеканалъяс, «Республика» газет. Позьӧ тӧдмавны и ӧтуввезса «ВКонтактеысь» республикаса Общественнӧй приёмнӧйлӧн да кар-районын службаяслӧн лист бокъясысь.

Видео позьӧ видзӧдны тані: vk.com/komi_kerka?w=wall-43225499_8895.

Сёрнитіс Антонина Микушева.

Видео: Юалӧй мынтысьтӧг

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх