«ЛУКОЙЛ-Коми» ООО-ын водзӧ ёнмӧдӧны сьӧкыд да сук мусир кизьӧртан «Уса-Тяжёлая нефть» установкалысь (УПН-лысь) вынйӧрсӧ. Та могысь кыпӧдӧма блокъясысь выль стрӧйба.
Усинск районын тайӧ УПН-сӧ уджӧдны босьтчӧмаӧсь дас во сайын нин, но и талун Россияын татшӧм аслыспӧлӧс да ыджыд вына установкаыс сэсся некӧн абу. Миян странаын тайӧ медводдза узел, кӧні кизьӧртӧны сьӧкыд да сук мусир. И «ЛУКОЙЛ-Коми» компанияысь специалистъяс дугдывтӧг бурмӧдӧны-сӧвмӧдӧны та могысь УПН-ыслысь технологияяссӧ.
Вужвыйӧныс дзоньтавны-выльмӧдны босьтчӧмаӧсь таво гожӧмнас, а помавны шуӧма 2023 воын. Куим воӧн производствосӧ тӧдчымӧн паськӧдасны да, лоас позянлун ёна унджык качайтны мусирсӧ, вонас ӧнія кыксянь содтысьны куим да джын миллион тоннаӧдз.
Водзӧ вылӧ шуӧма лӧсьӧдны ва весалан содтӧд аппаратъяс, выльмӧдны теплообменникъяс, резервуаръяс да уна мукӧдтор.
Ӧні УПН-ас дасьтысьӧны босьтчыны уджӧдны биару дасьтан пункт. Тайӧ комплексас веса-лӧм бӧрын биарусӧ кутасны мӧдӧдны Усинскса газ переработайтан заводӧ (а сэсянь — потребительяслы), а сідзжӧ УПН-ас уджалысьяс мӧдасны вӧдитчыны сыӧн ломтас пыдди.
Мусир сора биарусӧ водзті уна дас во чӧж сотлісны веськыда прӧмыселъясас, а ӧні УПН-ас весалӧм-бурмӧдӧм бӧрын тайӧ содтӧд ломтаснас позяс вӧдитчыны производствоын, а сідзжӧ могмӧдны йӧзӧс, кыдз потребительясӧс.
Усинскын да Ярегаын сьӧкыд мусирсӧ перйӧмыс — «ЛУКОЙЛ-Коми» ООО-лӧн медшӧр уджыс. Усинск гӧгӧрын сӧмын пермокарбона сук сьӧд зарни запасыс артавсьӧ 170 миллионысь унджык тонна (вонас куим миллионысь этшаджык перйӧмӧн).
Тайӧ мупытшкӧсса озырлунсӧ тырвыйӧ бура перйыны позянлуныс лоис сӧмын ӧнія технологияясӧ босьтчӧмӧн да ставнас производстволысь вынйӧрсӧ выльмӧдӧм-бурмӧдӧмӧн.
Снимокъясыс «ЛУКОЙЛ-Коми» ООО-ысь пресс-службалӧн.