«Коми му» газетлӧн 41-ӧд номерын йӧзӧдлім «Гашкӧ, бӧръяысь ворсам?..» гижӧд, кӧні юӧртім вужвойтырлӧн шылада-драмаа театрлӧн «дзугйӧ» веськалӧм йылысь.
Казьтыштам, артистъяс мӧдӧд сезон нин оз вермыны лючки уджавны, асланыс залыс абу да. Сыктывкарса администрациялӧн ыджыд жырйыс, кодӧс кӧртымавлӧны, оз лӧсяв техника боксянь корӧмъяслы. Дерт, Сыктывкарын эм Виктор Савин нима драмтеатр, опера да балет театр, но сэтчӧ оз жӧ вермыны быд лун лэдзны, асланыс удж-могыс юр выв тырыс да.
Сэсся и культура министерствоӧн театрсалы кар-районӧ петалӧм могысь вичмӧдӧм сідз шусяна мото-часъяссӧ видзӧмаӧсь нин кольӧм тӧвнас. Ас тшӧт весьтӧ транспорт кӧртымавны оз жӧ вермыны, а, сідзкӧ, артистъяс вермасны кольны уджтӧг.
Дойыс мӧрччана
Выль кызь кӧкъямысӧд сезонсӧ вужвойтырлӧн шылада-драмаа театрын ворсысьяс восьтісны филармонияын. Видзӧдысьяслы вӧлі нимкодь аддзысьлыны радейтана артистъяскӧд. Тшӧтш и забеднӧ, юр сюянінтӧг кольӧмаӧсь да. Газетысь гижӧд лыддьӧм да премьера вылӧ волӧм бӧрын йӧзыс юксисны миянкӧд асланыс тӧжд-майшасьӧмнас. Йӧзӧдам ӧткымынлысь видзӧдлассӧ.
Хелли Кокко:
—Муӧдз копыр театрса став труппалы, коді водзӧ нуӧдӧ ассьыс творчествоа уджсӧ сьӧкыдлунъяс вылӧ видзӧдтӧг. Миян ас да дона КОМИ театр чужан КОМИ Республикаын ас сценатӧм! Тайӧ шемӧсмӧданатор, дзик юръяндзим! «Коми войтыр», общественникъяс, культура министерство, отсалӧй!
Татьяна Павлина:
—Енбиа ворсысьяслы сиа ыджыд терпенньӧ! Сиа, мед ӧдйӧджык став «гӧрӧдыс» разьсяс да лоӧ асланыд театр.
Мария Тарабукина:
—Ёна энӧ шогсьӧй, йӧзӧс дона да пыдди пуктана енбиа гажӧдысьяс. Эска, чинаяс аддзасны позянлун отсавны тіянлы. Натӧг некыдз.
Анастасия Васильева:
—Революция бӧрын коми драматургия зэв регыдӧн чужӧма: медводз босьтчӧмаӧсь комиӧдны роч пьесаяс, сэсся и комиӧн гижны. Октябрь 24 лунӧ тырӧ сё во «Шонді петігӧн дзоридз косьмис» пьеса пуктӧмсянь… Кольӧм нэмся 30-ӧд воясӧ, зэв сьӧкыд кадӧ, восьтісны коми профессиональнӧй театр. Уна мича коми пьеса вӧлі гижӧма да пуктӧма. А ӧні ставыс киссьӧ!
«ВКонтактеын» «Ми — комияс» котырӧ пырысьяс:
—Вужвойтырлӧн театрлы к-лӧ торъя, выль двореч. Уна во нин корӧны, а чиналы таӧдз мог абу…
Людмила Тюрнина:
—Чайта, важ да театр улӧ мырдысьӧн лӧсьӧдӧм стрӧйбасӧ «дӧмлыны» дзик нинӧмла. Комилы колӧ ас национальнӧй театр!
Ангелина Кошкина:
—Ме пыр ветлӧдла коми постановкаяс вылӧ. Гожӧмбыд виччыси, кор шылада-драмаа театрын воссяс выль сезоныс. Зэв ёна сьӧлӧм вылӧ воӧны татчӧс артистъясыс: шаньӧсь, енбиаӧсь, сьылӧны и йӧктӧны.
Газетысь лыдди, мый дзоньтасьӧмсӧ абу на эштӧдӧмаӧсь. А сэсся тӧдмалі, мый Светлана Горчакова вылӧ йирксьыс мыйкӧ усьӧма. Тайӧ нӧ мый? Ӧти коми театр миян республикаын, и дзоньтавны оз вермыны. Шензя…
Зоя Ивановна:
—Асланым ӧти коми кывъя театр, и сійӧс увтыртӧны. Зэв жа-льӧсь артистъясыс. Выль стрӧйба кӧ оз вермыны кыпӧдны, кӧть нин мед тайӧс дзоньталасны. Филармониялӧн, драмтеатрлӧн, опера да балет театрлӧн зал эм, а вужвойтырлӧн абу.
Елена Ануфриева:
—Коми йӧзкостса театрлы колӧ овны, кӧть, гашкӧ, сійӧ кодлыськӧ и муссӧ зыртӧ. И мед стрӧйбаыс лӧсялас урчитӧм корӧмъяслы. Ме чайта, культура министерстволӧн могыс – вӧчны ставсӧ та могысь, мед театр вӧлі и оліс-уджаліс тырвыйӧ!
Мыйӧн вермӧны, отсалӧны
Асланыс дойӧн артистъяс юксисны эз сӧмын «Коми му» газетса корреспонденткӧд, сідзжӧ восьса письмӧӧн шыӧдчисны республикаса юралысь Сергей Гапликов, Коми Госсӧветӧн веськӧдлысь Надежда Дорофеева да депутатъяс, Россия Федерацияса Сӧветӧ пырысьяс Дмитрий Шатохин да Валерий Марков дорӧ.
Газет печатьӧ дасьтан лунӧ редакцияӧ воис республикаса культура министерствоысь вочакыв. Йӧзӧдам сійӧс комиӧдӧмӧн.
«Вужвойтырлӧн шылада-драмаа театрлӧн сьӧкыдлунъяс йылысь ведомство тӧдӧ да кутӧ найӧс тӧд вылас. 2017-2018 воясӧ вӧлі дасьтӧма стрӧйба вевтсӧ, мудӧгсӧ да залсӧ дзоньталӧм могысь колана документ-кабалаяс.
Дзоньтасьӧм вылӧ вичмӧдӧма сизим миллион шайт. 2018 вося ноябрь 12 лунӧ кырымалӧма «Наследие» пӧдрад котыркӧд сёрнитчӧм. Пӧдрадчиккӧд вӧлі урчитӧма сигӧртны дзоньтасьӧмсӧ 2019 вося май 12 лунӧдз. Но сійӧ эз эштӧд панӧм уджсӧ да эновтіс стрӧйбасӧ 2019 вося июньын.
Пӧдрадчик кутшӧмсюрӧ удж вӧчӧма шогмытӧма. Тшӧктылім, мед вӧчас ставсӧ проектын урчитӧм ногӧн, но ставыс коли важ моз. 2019 вося сентябрь 20 лунӧ пӧдрадчиклы юӧртӧма, мый культура министерство киритӧ сыкӧд сёрнитчӧмсӧ да шыӧдчӧ Коми Республикаса арбитражнӧй ёрдӧ.
Октябрь 16 лунӧ вӧлі ёрдын мӧд чукӧртчылӧм, но веныс эз на помась. Сэк жӧ ёрдын делӧ видлаліг-вензигкості оз позь босьтчыны дзоньтасьнысӧ, сы вӧсна мый лоӧ нуӧдӧма судебно-стрӧитчан экспертиза. Ёрдын локтан чукӧртчылӧмыс лоӧ ноябрь 19 лунӧ.
Коми Республикаса культура министерство кутӧ тӧд вылын вужвойтырлӧн шылада-драмаа театрын артмӧм серпассӧ да зільӧ бырӧдны нелючки-тырмытӧмторсӧ.
Ведомство корсьӧ артистъяслы мукӧдлаын петкӧдчыны лӧсялана инъяс да дасьтӧ репетиция нуӧдан график».
Екатерина МАКАРОВА.