Комиын коймӧдысь котыртлісны «Молодёжь выбирает классику» фестиваль. Культураын тайӧ тӧдчана лоӧмторъяс сюртчылісны Сыктывкар, Емва, Кӧрткерӧс да Выльгорт. Школа-библиотекаясын нуӧдӧм мастер-классъясын, творчествоа аддзысьлӧмъясын да концертъясын ӧтувтчылісны Россияса енбиа томулов да искусствоса мастеръяс.
Фестивальыскӧд йитӧдын 30 гӧгӧр аддзысьлӧмӧ пырӧдчисны регионса ныв-зон: гырысь классын велӧдчысьяс, студентъяс, педагогъяс, а сідзжӧ культураын зільысьяс.
Пыдди пуктана гӧсьтъясӧн вӧліны гижысь Майя Лазаренская, актёр да режиссёр Дмитрий Высоцкий, а сідзжӧ лингвист, Россияса наука академияын орфография кузя комиссияӧ пырысь Мария Ровинская. Накӧд ӧтув томуловкӧд опытӧн юксисны да творчествоын водзмӧстчыны ышӧдісны консерваторияса да творчествоа вузъясысь студентъяс.
Комиӧ волісны музыковед Елизавета Жиглова, аккомпаниатор Злата Серова, скрипачка Анна Попова, баянӧн ворсысь Иван Бычков, виолончелист Илья Михайлов, пианистка Евелина Медведко.
Мария Ровинская лыддис роч литература кузя лекция. Майя Лазаренская лыддьысьысьяскӧд аддзысьлігӧн висьталіс гижан удж йылысь да кыпӧдіс томуловлы колана темаяс: буллинг, семьяпытш олӧм, ёртасьӧм. А Дмитрий Высоцкий тӧдмӧдіс театр уджӧн.
Елизавета Жиглова висьталіс том вокалистъяслы наукаын да творчествоын музыковедение йылысь. Творчествоа туй йылысь велӧдчысьяскӧд сёрнитісны Злата Серова да Анна Попова.
Кар-районъясын фестивальсӧ сигӧртісны енбиа томуловлӧн петкӧдчӧмъясӧн. Концертъяс дырйи юргис Д.Скарлаттилӧн, П.Чайковскийлӧн, С.Рахманиновлӧн, А.Хачатурянлӧн, Ф.Шубертлӧн да мукӧд нималана композиторлӧн шылад.
–«Молодёжь выбирает классику» фестивальыс – бур пример, кыдзи классика вермӧ лоны ӧнія кадлы лӧсяланаӧн, сёрнитны кӧ ныв-зонкӧд ӧти кывйӧн – творчество кывйӧн, – висьталіс Коми Республикаса культура да архив удж кузя министр Марина Бурмистрова.
Коми Республикаса культура да архив удж кузя министерство отсӧгӧн проектсӧ збыльмӧдісны «Россияса культура фонд» общественнӧй котыр, Княжпогостса библиотека тэчас, Коми Республикаса челядьлы Национальнӧй библиотека. <>
Гижӧдсӧ дасьтiс Екатерина Микушева. Снимокъясыс ӧтуввезйысь.