Республикаын пансисны «Коми войтыр» ӧтмунӧмса быдвося конференцияяс.
Кыдзи и пыр, татшӧм чукӧртчылӧмъяс дырйиыс сёрниыс мунӧ коми кыв да традиция видзӧм-сӧвмӧдӧм, сикт-грездлы отсалӧм да общественникъяслӧн власьт тэчаскӧд ӧтувъя удж йылысь.
Таво ар медводдза конференцияясыс мунісны регион войвылын – Изьва районын да Усинск кытшын.
Изьва сиктын сентябрь 25 лунӧ коми войтыр кыпӧдлісны йӧзкостса прӧмысел-ремеслӧ видзӧм-сӧвмӧдӧм кузя юалӧмъяс.
Культураын мытшӧд-падмӧгъяс кындзи делегатъяс казьтылісны и районлы социальнӧй да экономика юкӧнъясын тӧдчанаторъяс.
Торйӧн кӧ, пасйисны Краснобор посёлокын берег ёнмӧдны, туйяс дзоньтавны да социальнӧй стрӧйбаяс кыпӧдны коланлун.
Октябрь 1 лунӧ Усинск районса Усвавом сиктын общественникъяс чукӧртчылісны сёрнитны «Культура, традицияяс, ӧтувъялун – миян войтырлӧн вын» пас улын.
«Коми войтырлӧн» Усинскса представительствоӧн юрнуӧдысь Анастасия Гильманова висьталіс этнокультура учреждениеяскӧд ӧтувъя уджын опыт йылысь.
Юӧртісны сідзжӧ вужвойтыр культураӧ да озыр традицияясӧ вӧйтчылӧмӧн коми кыв велӧдӧм да кӧр видзысьяслысь нэмӧвӧйся озырлун видзӧм йылысь.
Усвавомын конференция уджас пырӧдчис Коми Республикаын национальнӧй политикаса министрӧс вежысь Алексей Целищев.
Чукӧртчысьясӧс чолӧмалігӧн сійӧ торйӧн пасйис, Усинск кытшын пӧ ёна водзмӧстчӧны история озырлун видзӧмын да этнокультура проектъяс збыльмӧдӧмын.
«Таво Усинск кӧра-даддя батальонъяслысь подвиг нэммӧдан уджтасӧн петіс «Медбур муниципальнӧй практика» конкурсса регион тшупӧдын вермысьяс лыдӧ.
Гырысь вермӧмъяс шедӧдӧны и сиктса велӧдан учреждениеяс: Лыжавом сиктса челядьлы сад «Тайны северного сундука» проектӧн лои вермысьӧн республикаса конкурсын.
Ми и водзӧ кутам отсавны збыльмӧдны бур водзмӧстчӧмъяссӧ, торйӧн кӧ, «Пасха Красная» фестиваль нуӧдны, тшӧтш и кӧр видзысьяслысь челядьсӧ вертолётӧн велӧдчанінас да тундраӧ нуны-вайны», – тӧдчӧдіс Алексей Целищев.
Национальнӧй озырлун видзӧмысь да общественнӧй уджын водзмӧстчӧмысь Анастасия Гильмановаӧс пасйисны Коми Республикаса национальнӧй политика министерствосянь почёт грамотаӧн.
«Коми Республикаса команда» проект серти Алексей Целищев аддзысьліс ӧтувъя клуб тэчасӧн веськӧдлысь Людмила Каневакӧд, кодкӧд лои видлалӧма этнокультура водзмӧстчӧмъяс збыльмӧдан нырвизьяс.
* * *
Изьваын да Усвавомын вужвойтырлӧн конференцияясдырся кывкӧртӧдъяссӧ босьтасны тӧд вылӧ Коми Республикаса исполнительнӧй власьт тэчас уджын.
<> Гижӧдсӧ дасьтіс Алина Латышева. Снимокъясыс ӧтуввезйысь.