Кулӧмдін районын министр воліс Тымсер посёлокын Николай Паршуковлӧн крестьянин (фермер) овмӧсӧ. Предприятиеын тшӧтш вӧчӧны йӧв, рӧдмӧдӧны скӧт да шедӧдӧны таын гырысь вермӧмъяс.
Овмӧссӧ кытшовтӧм бӧрын специалистъяс вылӧ донъялісны уджаланног котыртӧмсӧ.
–Тані ставсӧ вӧчӧма стандарт серти: пыранінас эм санпропускник, комплекс пытшкас и ортсыас идӧра да кос, быттьӧ сійӧс муртса на пыртӧмаӧсь уджӧ, – пасйис Сергей Елдин.
Ведомствоӧн веськӧдлысьӧс фермер тӧдмӧдіс ас овмӧснас да юксис водзӧ кежлӧ тӧжд-могнас. Сідз, 2025 воын предприятиеас йӧвсӧ лысьтӧмаӧсь воддза воын серти 7 прӧчентӧн унджык – 76,8 тонна, яйсӧ да сыысь вӧлӧгасӧ вӧчӧмыс тшӧтш содӧма – 1,6 тоннаӧдз (2024-ӧдын серти 107 прӧчент мында).
Талун скӧтыс овмӧсын 45 юр, на лыдын 18 лысьтан мӧс. Та дырйи фермер выльмӧдӧ стадасӧ, рӧдмӧдӧ чӧскыдджык да нӧгыляджык йӧла, торйӧн кӧ, айршир пӧрӧдаа сюрук.
Вӧчӧмторсӧ иналӧны медсясӧ Тымсер да Лопъювад посёлокъясын олысьяслы – сюрсӧн-джынйӧнысь унджык мортлы. Та дырйи йӧлыс да сыысь вӧлӧгаыс став окотитысьыслы оз судзсьы.
Водзӧ кежлӧ медтӧдчана могыс – восьтыны йӧв переработайтан ичӧтик цех. Николай Паршуковлӧн висьталӧм серти, ылыс посёлокӧдз омӧль туй вӧсна йӧв новлан техникаыс оз век вермы волыны, да и водзӧсыс таысь абу уна. Миницех восьтӧмнас тайӧ гӧрӧдсӧ позяс разьны: йӧвсӧ кутасны переработайтны некытчӧ нулытӧг да могмӧдны сикт-посёлокса олысьясӧс сертификата прӧдукцияӧн – сырӧн, выйӧн, рыськӧн да мукӧдторйӧн. Водзӧ вылӧ пӧ позяс инавны вузӧссӧ и детсад-школаӧ. Тайӧ уджтассӧ збыльмӧдӧм могысь фермер пырӧдчӧ гранта конкурсъясӧ.
2021 воын овмӧсын грант да «Монди СЛПК»-сянь сьӧма отсӧг весьтӧ збыльмӧдӧмаӧсь семьяӧн скӧт видзан ферма сӧвмӧдӧм кузя проект – кыпӧдӧмаӧсь 50 юр вылӧ артыштӧм ӧнія комплекс. Фермасӧ восьтӧмаӧсь 2022 вося сентябрын.
2025 воын предприятиелы вичмӧма пемӧс видзӧм да техника-оборудование выльмӧдӧм вылӧ сьӧма отсӧг. «Йӧзкостса бюджет» весьтӧ ньӧбӧмаӧсь самоходнӧй фронтальнӧй погрузчик. Овмӧсын эмӧсь нӧшта кык МТЗ-82 трактор, ытшкан, агсасян, турун тубралан да мукӧд сикас оборудование. 2024 воын косьтӧмаӧсь-мелиорируйтӧмаӧсь кӧртымӧ босьтӧм 20 гектар му.
Предприятиеын став уджсӧ бергӧдӧны ас котырӧн: фермерлы отсасьӧны гӧтырыс да матыссаыс. Сьӧкыдлунъяс вылӧ видзӧдтӧг Николай Паршуков дась сӧвмӧдны овмӧссӧ водзӧ да ышӧдӧ таӧ и мукӧдӧс.
–Овмӧс котырттӧдз ме кык-куим во майшаси-мӧвпалі, а сэсся ӧти здукӧ босьті и вӧчи. Оз ков нинӧмысь повны. Да, эмӧсь сьӧкыдлунъяс, мытшӧдъяс, но найӧс позьӧ венны, – шуӧ фермер.
«Мый сійӧс кутӧ сиктын?» юалӧм вылӧ Николай вочавидзис:
–Кӧні олан, сэн и колан. Вӧр-ваыс, чӧв-лӧньыс, лабутнӧй оласногыс – буракӧ, тайӧ и кутӧ.
Николай Паршуковлӧн «Комиагрорегион» СППСК бордувса крестьянин (фермер) овмӧсыс збыль-мӧдӧ нӧшта ӧти тӧдчана мог – дӧзьӧритӧ-весалӧ Тымсерса да матігӧгӧрса туйяс, сетӧ позянлун йӧзыслы воӧдчыны ылі сикт-посёлокӧ.
<> Елена Музыкант. Комиӧдіс Елена Плетцер.
Снимокыс регионса видз-му овмӧс министерствоысь.