Сентябрь 10 лунӧ «веськыд йитӧд» пыр Комиын олысьяслӧн юалӧмъяс вылӧ вочавидзас республикаса юралысь Ростислав Гольдштейн. Кывзыны-видзӧдны сійӧс позяс «Юрган» да «Коми гор» телеканалъясысь квайт час рытсянь.
Кольӧм во регионӧн веськӧдлыськӧд «веськыд йитӧдыс» вӧлі сентябрь 9 лунӧ. Йӧзсянь сэки воис уна шыӧдчӧм. И мый жӧ вӧлі вӧчӧма на кузя во чӧжнас?
Локтан тӧв кежлӧ Емва карын «КТЭК» предприятие пӧрадокӧ вайӧдӧма олан керкаясӧ шоныд сетан трубаяс. И Мылдін районса Ылыдздін сиктын дзоньталӧмаӧсь мупытшса татшӧм жӧ трубаяс.
Ухта бердса Ветлосянын ладмӧдӧмаӧсь котельнӧй удж, медым 8-ӧд номера школаса да 59-ӧд номера детсадса челядь эз кынмыны. Сыктывдін районса Мандачын олӧма гозъялӧн патераын разьӧмаӧсь важ пачсӧ да тэчӧмаӧсь выльӧс.
Уна удж вӧлі вӧчӧма и туйяс дзоньталӧм могысь. Сыктывкарын Октябрь шӧртуйса 148-ӧд номера керка дорын вольсалӧмаӧсь асфальт, а Магистральнӧй уличаса 1-ӧд номера керка дорын – кориз. Лои выльмӧдӧма и Удораса райбольничаӧ вайӧдан да Сосногорск районын Том да Керки сиктъяс йитан туйяс.
Кольӧмвося «веськыд йитӧд» дырйи Уквавомын олысьяс норасьӧмаӧсь республикаса юралысьлы, шӧйтысь понъяс вӧсна пӧ ывлаӧ петны ог лысьтӧй. Та бӧрын вӧлі кутӧма да «Девять жизней» приютӧ меститӧма кӧзяинтӧм дас нёль пон.
Йӧзлӧн корӧм серти жӧ Вылыс Чов посёлокын да Эжваса Мир уличаысь весалӧмаӧсь вывті нин уна чукӧрмӧм лӧп-ёг, юркарса Киров улича да 1-ӧд номера школа бердысь пӧрӧдӧмаӧсь косьмӧм пуяс. Шудаяг, Улыс Одес, Пармашор посёлокъясын, Летка сиктын, Воркутаса Шерстнёв бульварын, Сыктывкарса Давпом микрорайонын вежӧмаӧсь улича югзьӧдан сотчӧм лампаяс.
Татшӧм ногӧн республикаса юралыськӧд «веськыд йитӧдыс» сетӧ позянлун йӧзлы шыӧдчыны власьт тэчасысь чинаяс дорӧ, мед нюжмасьтӧг бырӧдны-разьны быдлунъя олӧмас гӧрӧдъяссӧ.
<> Гижӧдсӧ дасьтіс Павел Симпелев. Снимокыс ӧтуввезйысь.