Вячеслав Поздеев шуӧ, мый фермералӧм – тайӧ абу бизнес, а чужан му да семья дорӧ муслун, ёрта-ёртлы отсӧг да во гӧгӧр пӧсь кисьтана удж.
Вячеслав Владимирович агропром комплексын зільӧ 45 воысь дырджык нин. Босьтчылӧма пастуксянь, сэсся кыпӧдчӧма управляющӧйӧдз да «Батмановское» ООО-ӧн веськӧдлысьӧдз. Медым эз пӧдлась производствоыс, да йӧзыс эз кольны уджаланінтӧг, кызь во сайын котыртӧма КФХ.
Талун овмӧсас 22 бычӧ да та мында жӧ лысьтан мӧс. Поздеевъяс тшӧгӧдӧны да иналӧны зэв бур яй, кодӧс окотапырысь ньӧбӧны Чилимдінын олысьяс.
Вячеслав Поздеевлӧн овмӧсыс таво районас медводдзаӧн помалӧма заптыны кӧрым. Июль 24 лунӧ эштӧдӧмаӧсь нин страдасӧ. Тӧв кежлӧ заптӧмаӧсь план серти ёна унджык турун. Став техника бӧрсяыс видзӧдӧ ачыс, сійӧ и токар, и слесар, и сварщик. Дерт, страда дырйи ёна отсасьӧны и гортсаясыс да рӧдвужыс – Никита пиыс, гӧтырыс, племенникыс да внукъясыс.
–Менӧ некод оз тойлы фермеравны. Ме ачым бӧрйи тайӧ ордымсӧ. Кор син водзад ытшкӧм видз, рулонӧ гартӧм турун, сьӧлӧмыд нимкодясьӧ, лов вылад сэтшӧм лӧсьыд. Гӧгӧрвоан, мый луныс эз весьшӧрӧ коль. Медтӧдчанаыс ассьыд уджтӧ радейтны да медводз ас вылад лача кутны, – шуӧ Вячеслав Владимирович.
<> Николай Размыслов. Снимокыс авторлӧн.