2025 вося октябрь 20 лунӧ саридзса пехотаысь штурмӧвӧй группа тышкасьӧма Донецк Народнӧй Республикаса Новоторецкое да Владимировка овмӧдчӧминъяс дорын. Тыш-косьыс вӧлӧма сьӧкыд, вӧрӧг дугдывтӧг лыйлӧма миян воинъясӧс.
Младшӧй сержант Павел Ванюта бырӧдӧма украинасалысь нёль боевикӧс да уськӧдӧма пилоттӧг лэбалан аппарат и весиг ранитчӧм бӧрас водзӧ тышкасьӧма. Ёна ранитчӧм ёртсӧ кыскӧма дзебасӧ, а кор вӧрӧг выльысь лыйӧма, аснас вевттьӧма сійӧс. Кыкнанныс пӧгибнитӧмаӧсь.
Тайӧ подвигсьыс странаса президент Владимир Путинлӧн индӧд серти таво июньын Павел Сергеевич Ванюталы сетӧма Россия Федерацияса Герой ним.
Павел Ванюта чужлӧма 1989 вося июнь 9 лунӧ Усинск районса Сем Ӧндрей сиктын.
Велӧдысьыс, Ольга Захаровна Истомина, висьталӧ, мый вӧлӧма зіль, вежавидзысь детинкаӧн, ичӧтсяньыс вӧралӧма, чери кыйӧма, радейтӧма ноксьыны техникаӧн.
2007-2008 воясӧ Павел Ванюта служитӧма армияын Ингушетияса Назрань карын.
Гортас воӧм бӧрын Усинскса политехническӧй техникумын велӧдчӧма трактористӧ.
Торъя военнӧй операция вылӧ Сем Ӧндрейын вит олыськӧд тшӧтш сійӧс мобилизуйтӧмаӧсь 2022 вося октябрын. Павелкӧд ӧтлаын служитысь ёртъясыс казьтылӧны сійӧс ыджыд сьӧлӧма мортӧн. Радио пыр, мед вӧрӧг оз гӧгӧрво, комиӧн сёрнитлӧма.
Бура служитӧмысь 2024 воӧ Павел Ванютаӧс наградитӧмаӧсь Жуков медальӧн.
Геройлӧн гортас колины Анастасия Евгеньевна Терентьева гӧтырыс кык пиыскӧд: ӧкмысӧд классӧ вуджысь Ростиславкӧд да таво мӧдӧд классӧ мунысь Георгийкӧд, Елизавета Викторовна мамыс да Валентин ичӧт вокыс.
Батьыс, Сергей Николаевич, кувсьӧма писӧ мобилизуйтӧм бӧрын тӧлысь мысти.
Чужан сиктас Павел заводитӧма кыпӧдны керка, но помавны абу удитӧма. Гӧтырыс ӧні зільӧ эштӧдны сійӧс.
Верӧс йывсьыс Анастасия висьталӧ, ми пӧ ичӧтсянь тӧдсаӧсь вӧлім, а матысмим ӧта-мӧдкӧд Усинскса техникумын велӧдчигӧн.
–Павел вӧлі шань, уджач, ми ставным радейтім сійӧс, – казьтылӧ Анастасия. – СВО вылӧ мунігас шуис, эн пӧ шогсьы ме вӧсна, ставыс лоас бур, бӧр бергӧдча гортӧ ловйӧн, дзоньвидзаӧн. Виччысь пӧ менӧ. Ме кӧсъя верӧс йылысь небӧг гижны: кыдзи тӧдмасим, олім, кыдзи челядь чужисны да, дерт жӧ, кыдзи пӧгибнитӧма сійӧ. Таын меным отсалӧны ёртъясным, велӧдысьяс. Книгаыс колӧ, медым видзны Павел йылысь паметь.
Август 17 лунӧ Сыктывкарын Павел Сергеевич Ванюталы Россия Федерацияса Герой ним сетӧм йылысь индӧд да «Зарни Звезда» медаль Анастасия Евгеньевналы да Георгийлы киас сетісны Коми Республикаса юралысь Ростислав Гольдштейн да Войвыв флотын командующӧйӧс вежысь контр-адмирал Игорь Курочкин.
–Дона Анастасия Евгеньевна да Георгий, ті воштінныд медся матысса морттӧ да, шогтӧ тіянлысь кывйӧн он висьтав.
Павел Сергеевич тышкасис Россия, Коми Республика вӧсна. Аслас семья, челядь, матыссаяс вӧсна.
И Рӧдина вӧсна сетіс ассьыс олӧмсӧ. Ми ог вунӧдӧй сылысь подвигсӧ, сы вылӧ видзӧдӧмӧн быдмасны выль геройяс.
Павел Сергеевич Ванюталӧн нимыс век кежлӧ пырас миян странаса да Коми Республикаса историяӧ, – висьталіс Ростислав Гольдштейн.
Россияса Герой Павел Ванюталӧн матыссаяслы «Зарни Звезда» медаль сетігӧн контр-адмирал Игорь Курочкин пасйис, тайӧ наградаыс пӧ петкӧдлӧ, мый Павел Сергеевич вӧлі повтӧм мортӧн, асьсӧ жалиттӧг мездіс-дорйис ёртъяссӧ.
–Тӧда, некутшӧм награда оз бергӧд тіянлы верӧстӧ, батьтӧ.
Но кора тіянӧс – аддзӧй вын водзӧ овны. Казьтыштӧй воинъясӧс, кодъяс ӧні олӧны сӧмын сы вӧсна, мый Павел сетіс на вӧсна ассьыс олӧмсӧ, да нэм помӧдзыс кутасны аттьӧавны сійӧс.
Олӧй тайӧ аттьӧалӧм йывсьыс мӧвпъясӧн. Олӧй Павелӧн гӧрдитчӧмӧн, – сиис Павел Ванюталӧн дӧвалы да пилы Россияса Герой, Коми Госсӧветӧн веськӧдлысьӧс вежысь Станислав Кочев.
Сем Ӧндрей сиктын школаса музейын лӧсьӧдӧмаӧсь торъя военнӧй операцияын служитысь-тышкасьысь войтырлы сиӧм стенд.
Эмӧсь сэні и Павел Сергеевич Ванюта йылысь пасйӧдъяс да сылӧн снимокъяс. Классын, кӧні велӧдчыліс Павел, сувтӧдасны Герой парта, а школа стрӧйбаын восьтасны сійӧс казьтылан пӧв.
Татшӧм жӧ мемориальнӧй пӧв лоас и Войвыв флотса военно-морскӧй музейын.
СВО-ын тышкасигкежлӧ буретш Мурманскын дасьтысис Павел Сергеевич Ванюта.
<> Гижӧдсӧ дасьтіс Павел Симпелев. Снимокъясыс ӧтуввезйысь.