Сентябрь тӧлысьын нималана коми поэт, республикаын бура тӧдса морт Галина Васильевна Бутырева пасйӧ ассьыс чужан лун. Буретш тайӧ тӧдчана лоӧмторнас и чолӧмалӧмӧн воссьӧ сентябрса номер. Сідз жӧ вӧзъям лыддьысьысьлы важся коми сиктъясын, Емдінладорса Эжолын да Удораса Йӧртымдінын, чужӧм кык поэтлысь — Евгений Козлов да Галина Бутыревалысь ёрта сёрнисӧ…
Сюрӧсалӧны сёрнисӧ оз веськыда вочавидзӧм-юалӧмъяс, а челядьдырся казьтылӧмъяс, сэкся образ-кылӧмъяс. Висьтасьысьяс казьтылӧны вӧвлӧмсӧ, ӧтлаалӧны воддзасӧ да ӧнісӧ, верстьӧяс выль пӧв олӧны челядьдырнас. Быттьӧ челядьдырсьыс татчӧдз воӧ аслыспӧлӧс йӧлӧга. Быттьӧ сёрниас найӧ ӧта-мӧдыслы тшӧтш жӧ лоӧны йӧлӧгаӧн…
«Менам пиукыс, менам… » неыджыд повесьт вӧзйӧ Иван Ногиев.
Александр Шебырев тшӧкыда пуктӧ аслас кывбуръяс вылӧ шылад, лӧсьӧдӧ сьыланкывъяс. Тайӧ номерын кывбуръяссӧ гижӧма сьыланкывъяс улӧ жӧ, но шыладыс на вылӧ тэчтӧм на. Автор сетӧ позанлун окотитысьяслы аслыныс пуктыны шыладсӧ кажитчана кывбуръяс вылӧ.
Чудь йылысь мӧвпъясӧн асланыс статьяясын юксьӧны Николай Мальцев да Олег Уляшев. Чайтам, лыддьысьыслы лоӧ интереснӧ тӧдмасьны тайӧ торъялана видзӧдласъяснас.
Лоӧ мукӧдтор и та кындзи. Лыддьысьӧй, бурмӧдӧй ловнытӧ.
