Кольӧм вежонӧ Коми Республикаса Госсӧветысь депутатъяс вынсьӧдісны челядя семьяяслы уна сикас социальнӧй отсӧг-кокньӧд вичмӧдӧм кузя оланпас.
Парламентӧн веськӧдлысь Надежда Дорофеевалӧн висьталӧм серти, тайӧ законыс, кодӧс дасьтӧм могысь водзмӧстчис регионса юралысь Сергей Гапликов, республикаын олысь-яслы зэв колана. Сійӧс збыльмӧдӧм вылӧ шуӧма видзны вонас миллиард сайӧ шайт. Водзті та мындасӧ йӧзӧс социальнӧя дорйӧм могысь некор на эз вичмӧдлыны.
Надежда Дорофеева пасйис, мый ведомствояскостса котыр уджаліс тайӧ закон бала вылас кык тӧлысьысь дырджык, пыдісянь да гӧгӧрбок донъяліс сыкӧд йитӧдын талунъя нормаяссӧ да выльӧн вӧзйӧмъяссӧ. И шуис содтыны оланпассӧ збыльмӧдӧм вылӧ сьӧмсӧ ӧтисянь 1,3 миллиард шайтӧдз. Торйӧн кӧ, лои артыштӧма нӧбасьысь да судзсьытӧма олысь пузчужӧм кагаа нывбаба-мамъяслы сёян-юан ньӧбӧм вылӧ содтӧд сьӧм, шуӧма унджык челядьлы вичмӧдны кӧм-пась вылӧ материальнӧй отсӧг да с.в.
–Эска, вынсьӧдӧм оланпасыс лоас челядя семьяяслы збыльысь тӧдчана отсӧгӧн, ышӧдас том гозъяясӧс чужтыны унджык кага, – висьталіс Надежда Дорофеева.
Казьтыштам, тайӧ закон сертиыс шуӧма мынтыны гозъялы медводдза кагасӧ чужтӧмысь регионса капитал – 150 сюрс шайт. Содтӧд на, тайӧ сьӧмсӧ вичмӧдасны удждон-чӧжӧс выланыс видзӧдтӧг ставныслы.
Шуӧма ыджыдджык сьӧма отсӧг сетны судзсьытӧма олысь семьяын быдмысь кага вылӧ. Тӧлысьнас ӧти сюрс пыдди кутас воны 2,2 сюрс шайт, та дырйи лоӧ артыштӧма и районса коэффициент.
Регионса 53 сюрсысь унджык семьялы мӧдасны сетны дзолюкнысӧ детсадйын видзӧмысь мынтысьӧм могысь кокньӧд, та дырйи медводдза быдтассьыс – 20 пыдди 30 прӧчент.
Кык пӧв, 500 шайтӧдз, содас уна челядя семьяысь школаын велӧдчысьяслы автобусӧн ветлӧм вылӧ пособие. Татшӧм кокньӧдсӧ шуӧма сетны и республикаса вузъясысь да техникум-колледжъясысь студентъяслы.
Пузчужӧм кагасӧ морӧсӧн вердысь аньяслы сёян-юан ньӧбӧм могысь кутасны сетны ыджыдджык жӧ пособие, та дырйи дзоньвидзалун кузя некутшӧм медсправка оз ковмы. Тӧлысьнас ӧти сюрс шайт кутас вичмыны став нӧбасьысь аньыслы.
Содас материальнӧй отсӧгыс судзсьытӧма олысьяслӧн тыр арлыдтӧм челядьлы кӧм-пась ньӧбӧм вылӧ, ветлӧны найӧ школа-детсадйӧ кӧть оз.
Челядя семьяясӧс социальнӧя дорйӧм йылысь тайӧ оланпасыс кутас збыльмӧдсьыны локтан вося январь 1 лунсянь. Сы вылӧ регионса сьӧмкудйысь шуӧма артыштны быд во ӧти миллиард сайӧ шайт.