Регионса видз-му овмӧс министерствоысь юӧр серти, таво сентябрын Луздор районын Гурьёвчи сиктса школаын воссяс агрокласс.
Кыдзи висьталіс велӧдчан учреждениеса директорыс Светлана Рожкина, ньӧбӧмаӧсь нин «Том биолог» да «Том агрохимик» программаяс серти челядьӧс велӧдны торъя оборудование. Судзӧдӧмаӧсь быдмӧг вӧдитан контейнеръяс, фитолампаяс, кӧйдыс да уна мукӧд коланатор. Видз-му уджӧ пырӧдчысь томулов урокъясысь прӧст кадӧ кутасны босьтны тӧдӧмлун-сямсӧ выльмӧдӧм классын, кӧні лоас и лаборатория-кабинет.
Водзті Гурьёвчиысь ныв-зон быдтылӧмаӧсь нин асланыс школа йӧрын дзоридзьяс, весиг финик, а сідзжӧ картупель. Кольӧм во босьтӧмаӧсь сійӧс 120 мешӧк. Урожайсӧ иналӧны ярмангаяс дырйи, а нажӧвитӧм сьӧм вылас ньӧбалӧны школаын быдсикас конкурсын вермысьяслы грамотаяс да призъяс, мукӧд коланатор.
Светлана Рожкина пасйис, мый водзӧ вылӧ мӧвпалӧны босьтчыны велӧдны челядьӧс му-видз вӧдитан да скӧт видзан уджӧ. Та могысь школаын став позянлуныс эм. Куим педагог босьтӧмаӧсь нин содтӧд тӧдӧмлун Москваын Тимирязев нима академияын.
Сэсся неылын, сизим километр сайын, уджалӧ, позьӧ шуны, налӧн аскиа кураторныс – «Южное» ООО, кодкӧд, дерт жӧ, кутасны топыда ёртасьны.
Вӧлӧма нин сёрни и Коми агропромышленнӧй техникумса директор Светлана Савиновакӧд. И сійӧ эскӧдӧма, мый кутасны вичмӧдны школалы велӧдчан небӧгъяс, а сідзжӧ отсавны том аграрийяслы дасьтыны видз-му проектъяс.
Тӧдчана и, мый челядьлӧн уналӧн пӧль-пӧчыс – видз-му овмӧсса ветеранъяс, бать-мамыс уджалӧны «Южное» ООО-ын. И гортаныс тшӧтш теплицаясын быдтӧны ӧгуреч да помидор, и томулов окотапырысь отсасьӧны налы.
Нӧшта ӧти бур юӧр тайӧ школа йывсьыс. Таво томулов медводдзаысь на вӧлӧма «Пекарь» специальносьт серти экзамен. Та могысь тӧдӧмлун-сямсӧ 10-11 классын велӧдчысьяс босьтӧмаӧсь ӧкмыс тӧлысь. Практикаыс вӧлӧма «Южное» ООО-са пекарняын. И ставӧн сдайтӧмаӧсь экзаменсӧ бура.
–Содтӧд на, кӧсъям босьтчыны нуӧдны челядьлы и машиноведение урок, медым гырысь классын велӧдчысьяслӧн вӧлі позянлун школа помалӧм кузя аттестаткӧд тшӧтш босьтны трактористлысь право, – водзӧ вылӧ дум-кӧсйӧмнас юксис Светлана Рожкина.
<> Гижӧдсӧ дасьтіс Александра Артеева. Снимокъясыс ӧтуввезйысь.