Коми агропромышленнӧй техникум помалысьясысь пыр унджыкӧн зільӧны инасьны ас регионса предприятие-организацияясӧ.
Кольӧм вежонӧ тайӧ велӧдчанінас ассьыныс диплом уджъяс дорйисны ветеринаръяс да техник-механикъяс.
Алина Сенькина велӧдчӧма ветеринар-фельдшерӧ. Сійӧ Сыктывкарысь, но тӧдӧмӧн шуӧма уджавны сиктын. Практикаыс вӧлӧма Луздор районса «Южное» ООО-ын. Сьӧлӧм вылас воӧма овмӧсыс. И сэні зільысьяс бура вочаалӧмаӧсь, корӧмаӧсь нылӧс велӧдчӧм бӧрас локны на дорӧ уджавны. Сэтчӧ и кӧсйӧ сійӧ мунны кыдз диплома специалист нин.
Алиналӧн верӧсыс Никита Сенькин Сыктывдінса Выльгорт сиктысь. Босьтӧма видз-му овмӧс техника да оборудование уджӧдӧм да дзоньталӧм кузя тӧдӧмлун-сям. Том морт сідзжӧ лӧсьӧдчӧ мунны «Южное» ООО-ӧ. Гӧтырыскӧд орччӧн кутасны уджавны тайӧ предприятиеас.
Агротехникум таво помалӧма и Кирилл Мальцев. Велӧдчӧма механизаторӧ. Ачыс Сыктывкарысь, но уджавны кӧсйӧ сиктын. Практика вылӧ ветлӧма Сыктыв районса Межадорӧ да сёрнитчӧма нин сэтчӧс ООО-ӧ инасьны.
Кыдзи висьталӧ Коми агропромышленнӧй техникумса директор Светлана Савинова, Комиын видз-му предприятие-овмӧсъясын зэв коланаӧсь кыдз механикъяс, сідз и ветеринаръяс да мукӧд специалист. Агротехникум помалысь том йӧзӧс, а таво татшӧмыс 196 морт, талун виччысьӧны удж вылӧ Кулӧмдін, Изьва, Чилимдін, Сыктыв, Луздор, Сыктывдін да Княжпогост районъясын.
<> Гижӧдъяссӧ дасьтіс Александра Артеева. Снимокъясыс ӧтуввезйысь.