Июнь 26 лунӧ Комиын, кыдзи и странаса став мукӧд регионас, «Кадры» нацпроект весьтӧ федеральнӧй тшупӧдын лоӧ нуӧдӧма уджӧн могмӧдан «Работа России. Время возможностей» федеральнӧй тшупӧда ярманга.
Такӧд йитӧдын республикаын шуӧма котыртлыны кызь торъя площадка, кӧні сё кызь гӧгӧр предприятие-организация да асшӧр овмӧс-котыр вӧзъясны ярмангаӧ пырӧдчысьяслы 1.700 сайӧ уджалан места. Медунаӧн чукӧртчыласны Сыктывкарын Торгово-промышленнӧй палатаын.
–Ярманга вылӧ волысьясӧс тӧдмӧдасны, кӧні да кутшӧм удж вермасны найӧ бӧрйыны аслыныс, а сідзжӧ котыртласны мастер-классъяс да тренингъяс. Занятосьт шӧринысь экспертъяс висьталасны, кутшӧм специалистъяс талун оз тырмыны миян регионын, да отсаласны бӧрйыны тӧдӧмлун-сям серти удж. Тайӧ торйӧн нин тӧдчана вуз-техникум-колледж помалысьяслы, а сідзжӧ студентъяслы, кодъяс оз на стӧча тӧдны, кытчӧ вермасны инасьны удж вылӧ, – пасйис регионысь удж да йӧзӧс социальнӧя дорйӧм кузя министрӧс вежысь Валерий Коротин.
Таысь ӧтдор специалистъяс висьталасны гӧсьтъяслы, кыдзи босьтны «Кадры» нацпроект весьтӧ выль профессия да содтӧд тӧдӧмлун-сям, кырымавны социальнӧй контракт.
«Айму дорйысьяс» фондын зільысьяс тӧдмӧдасны, государствосянь кутшӧм отсӧг шуӧма вичмӧдны спецоперацияын служитысьяслы да налӧн матыссаяслы.
Торъя площадкаясын котыртласны вермытӧмаяслы мастер-классъяс. 13-14 арӧса томуловлы да налӧн бать-мамлы висьталасны, матысса воясӧ кутшӧм профессия-специальносьт лоас Комиын да ставнас странаын торйӧн нин тӧдчана да колана.
Тайӧ жӧ лунас шуӧма нимӧдны да наградаясӧн пасйыны «Профессияын медбур» ставроссияса конкурслӧн регионса ордйысьӧмын «Сварщик», «Ветеринар-фельдшер» да «Агроном» нимпасъясын вермысьясӧс да призёръясӧс.
–Комиын уджӧн могмӧдан ставроссияса ярманга мунас нёльӧдысь. Таво апрельын регионса тшупӧдын татшӧм чукӧртчылӧм вылас воліс куим сюрсысь унджык морт. Предприятие-организацияӧн да асшӧр котырӧн 192 веськӧдлысь вӧзйисны налы 1.600-ысь унджык вакансия. Ярманга дырйиыс 63 морт аддзисны аслыныс удж, – висьталіс регионысь удж да йӧзӧс доръян министерствоӧн юрнуӧдысь Татьяна Майкова.
* * *
Россия Федерацияса удж министерствоысь юӧр серти, таво страна пасьталаын регионъясса ярмангаясӧ пырӧдчӧма 499 сюрсысь унджык морт. Йӧзӧс уджӧн матӧ 23 сюрс могмӧдысь вӧзйӧмаӧсь налы 456 сюрс вакансия.
Содтӧд колӧ пасйыны, мый «Кадры» нацпроект серти бӧръя куим воӧн удж вылӧ инасьӧма 384 сюрс морт.
<> Гижӧдсӧ дасьтіс Александра Артеева. Снимокъясыс ӧтуввезйысь.