Коми юркарын Россия лунӧ сэн и тан вӧзйисны быдсикас гаж-ворсӧм. Йӧзыс окотапырысь волісны Киров нима паркӧ, бассейндорса «Часі улӧ», Быт керка дорӧ. Киров нима паркын жӧ коймӧд во помся ворсісны «Вося кӧлысь». Та пӧрйӧ олӧмнысӧ йитісны-гозйӧдчисны Эдуард да Евгения.
Кыдз юӧртлім нин, Эдуард вужнас Емдін районысь, уджалӧ вӧр овмӧсса предприятиеын, а Евгения чужлӧма Вӧлӧгда обласьтын, Сыктывкарӧ локтӧма 2012 воын. Сійӧ республикаса мастер котырӧ пырысь, «Вося мастер» выставкаса лауреат. Вышивайтчӧ, пу серлӧдлӧ-мичмӧдӧ, пыдісянь пырӧдчӧ йӧзкостса культураӧ. Том йӧз тӧдмасьӧмаӧсь ӧтуввезйын, а сэсся шуӧмаӧсь ворсны кӧлысьсӧ коми традиция серти.
Эдуардлы да Евгениялы бур сиисны 2025 воӧ кӧлысь ворсысьяс – Светлана да Андрей Штольяс. «Семьяӧн олігӧн кольӧй аснаныд, восьсӧн сёрнитӧй кӧсйӧмъяс йывсьыд, висьталӧй, мый сьӧлӧм сертиыд, а мый абу. Тайӧ кӧлысьсӧ кутанныд нэм чӧжыд казьтывны. Ми тай асланым йылысь пондам казьтывны челядьлы и внукъяслы. Бласлӧвитам тіянлы шуда олӧм», – висьталіс Светлана.
2024 воӧ кӧ жӧника-невестаӧс гозйӧдісны удораса ног, мӧйму – вылыс эжваса ног, 2026-ӧдын кӧлысьсӧ ворсісны ӧтувъя коми традицияяс серти.
Видзӧдысьясӧс тӧдмӧдісны кӧлысь ворсан уна важся обычайӧн. Тайӧ артмис мича, сьӧлӧм вӧрзьӧдана спектакль. Медводз жӧниклы тшӧктісны петкӧдлыны вӧралан да чери кыян сямсӧ. Эдуард ставсӧ колана ног вӧчис да, пансис корасьӧм: коліс корны сӧглас гӧтырпулысь да бать-мамыслысь. Киров нима паркса сцена вылын кикутӧм бӧрын и приданнӧй кузя сёрнитчисны. Дзик свадьбаӧдзыс вӧлі нӧшта чунькытшасьӧм обряд. Та бӧрын аскиа гӧтыр пӧдругаясыслӧн бӧрдӧдчӧм улӧ янсӧдчис-прӧщайтчис нывдырыскӧд. Мыссис пывсянын, а медым омӧль выныс сылы лёк эз вӧч, нывъёртъясыс зонъяскӧд гораа горзісны, шумитісны да сьылісны. Медся збойясыс окасьӧмысь на ворсісны.
Став обрядсӧ вӧчӧм бӧрын том гозъяӧс гижӧдіс Сыктывкарса да Сыктывдінса загсысь специалист Диана Кузнецова. Эдуард да Евгения пуктісны ассьыныс кырымпас, пысалісны чуняныс чунькытш, окыштчисны – и налы сетісны гӧтрасьӧм йылысь эскӧданпас.
Та бӧрын том гозъяӧс чолӧмаліс республикаса правительствоӧн веськӧдлысьӧс вежысь Сергей Емельянов: «Зэв тӧдчана, мый тайӧ уна рӧма мича гажыс мунӧ коми ногӧн Коми му вылын – миян ӧтувъя керкаын. Чужинныд ті тані али кыськӧ воинныд, республиканым шоныда вочаалӧ быдӧнӧс», да козьналіс регионса юралысь Ростислав Гольдштейнсянь Киров обласьтса санаторийӧ путёвка.
Госсӧветӧн веськӧдлысьӧс первой вежысь Сергей Усачёв пасйис, сцена вылын пӧ йитчис кык олӧм, кык мир – Коми му да Вӧлӧгда лов. «Буретш тадзи чужӧ миян крепыд семья. Сійӧ видзӧ лёксьыс, козьналӧ шоныдлун да радлун. Пыдди пуктана Евгения да Эдуард, ті нимтінныд асьнытӧ коми-вӧлӧгдаса шудӧн. Сиа тіянлы, мед шудныд вӧлі миян вӧр-ва кодь жӧ лышкыд, коми серъяс кодь яръюгыд да войвыв енэж кодь жӧ помтӧм». Госсӧветсянь гозъялы вичмис козин – телевизор.
«Комиын аньяс котырӧн» веськӧдлысь Галина Лапшина тӧдчӧдіс, му вылын райыс пӧ – семья да челядь, а райсӧ лӧсьӧдысьясыс – ті асьныд. Котырсяньыс том гозъялы козьналісны вежа Пётрлысь да Феврониялысь ӧбраз.
Выльӧн гижсьысьясӧс кӧкъямыс сюрс морта котырсянь бурсиис-чолӧмаліс Сыктывкарса ЛПК-ысь профсоюзса нырщик Александр Слободчиков.
Пасъям, воддза да кольӧм воясӧ кӧ «Вося кӧлысьсӧ» ворсісны Степан изэрдын, таво сійӧ мичмӧдіс Киров нима паркса сцена.
Йӧзкостса творчество сӧвмӧдан да тӧдӧмлун кыпӧдан шӧринӧн юрнуӧдысь Иван Токмаков висьталіс, тайӧ проектнас пӧ таво восьтім томуловлы «СтарТуй» фестиваль, и тайӧ аслыссикас символ-пас. Сійӧ тшӧтш пасйис, уна йӧз син водзын гижсьыны-гозйӧдчыны окотитысьяссӧ пӧ век зэв сьӧкыд корсьны. Сэсся налы и ёна репетируйтны да интервью сетны ковмӧ. Та пӧрйӧ со кык шыӧдчӧм вӧлӧма, и ӧтар гозйыс ӧткажитчӧмаӧсь.
Евгениялӧн да Эдуардлӧн кывъяс серти, найӧ тшӧтш майшасьӧмаӧсь-полӧмаӧсь петны уна йӧз водзӧ сцена вылӧ, да и мудзӧмаӧсь дасьтысьӧмсьыс.
–Но век жӧ ми смелмӧдчим «чеччыны диван вылысь» да вӧчим мыйкӧ аслыспӧлӧс, мукӧдысь торъяланатор, и таысь зэв нимкодь, – кывкӧрталіс Эдуард. <>
Алина Латышева. Снимокъясыс ӧтуввезйысь.