Май 29 лунӧдз Комиын «Работа России» портал пыр позьӧ шыӧдчыны «Профессия серти медбур» ставроссияса конкурслӧн регионса тшупӧдӧ пырӧдчӧм могысь.
Рабочӧй профессияа специалистъяслы тайӧ ордйысьӧмыс нуӧдсьӧ страна пасьталаын «Кадры» нацпроект весьтӧ.
–Миян республикаын, кыдзи и ставнас Россияын, оз тырмы татшӧм уджалысьыс. И, кыдзи эз нин ӧтчыдысь пасйыв РФ-са президент Владимир Путин, колӧ корсьны унджык позянлун кыпӧдны рабочӧй профессияяслысь тӧдчанлунсӧ, медым том йӧз эз ӧтдортчыны наысь. Буретш та могысь и нуӧдсьӧ «Профессия серти медбур» конкурсыс, – висьталіс регионысь удж да йӧзӧс социальнӧя дорйӧм кузя министрӧс вежысь Валерий Коротин.
Та пӧрйӧ июнь 2-11 лунъясӧ Комиын ассьыныс тӧдӧмлун-сям петкӧдласны сварщикъяс, агрономъяс да ветфельдшеръяс. Торъя нимпасъяс серти вермысьяслы шуӧма вичмӧдны республикаса правительствосянь сьӧма премияяс – 60, 40 да 20 сюрс шайтӧн.
Конкурсын медбуръяс сэсся петкӧдчасны Мордовияын да Перым крайын федеральнӧй тшупӧдын. Сэні медшӧр призыс – ӧти миллион, а мӧд да коймӧд местаысь сетасны 500 да 300 сюрс шайт.
Гижӧдсӧ дасьтiс Павел Симпелев.