Россияса Госдумаысь Ылі Асыввыв да Арктика сӧвмӧдан комитетлӧн чукӧртчылігӧн видлалісны, колӧ-ӧ федеральнӧй организацияясын зільысьяслы нажӧтка дорас войвывса содтӧд вештыны медуна урчитӧм мындасӧ удж вылас медасян лунсянь.
–Республикаса юралысь Ростислав Гольдштейнлӧн вӧзйӧм серти ми 2025 вося апрельын вынсьӧдім регионса оланпас, кӧні индім государство тэчасын да учреждениеясын уджалысьяслы тырвыйӧ мынтыны войвывса содтӧдсӧ медводдза уджалан лунсяньыс. Тайӧ ышӧдас йӧзсӧ уджавны ас регионын. Но миянлы оз ков юкны специалистъясӧс регионса да федеральнӧй вылӧ, ӧд найӧ ставныс уджалӧны войвылын, – висьталіс Коми Республикаса Госсӧветӧн веськӧдлысь Александр Макаренко. – Федеральнӧй сьӧмкудйысь финансируйтан организацияясын зільысьяслы войвывса содтӧдсӧ колӧ тшӧтш мынтыны медводдза лунсяньыс.
Госдумаса комитетлӧн уджӧ видеойитӧдӧн пырӧдчис Коми Госсӧветысь социальнӧй политика комитетӧн веськӧдлысь Анастасия Михайлова да пасйис, мый буретш федеральнӧй тэчасъясын уджалысьяс паныдасьӧны войвывса содтӧд мынтӧмын мытшӧдъяснас.
Мӧвп-видзӧдласӧн юксьӧм бӧрын Россияса правительстволы вӧлі тшӧктӧма дасьтыны индӧдъяс, медым Ылі Войвылын да Арктикасянь матыс регионъясын 35 арӧсӧдз том специалистъяслы, федеральнӧй тэчасъясын, наукаса да вылыс тӧдӧмлун сетан организацияясын зільысьяслы войвывса содтӧдсӧ мынтыны удж вылӧ петан лунсяньыс.
Гижӧдсӧ дасьтiс Павел Симпелев.