Тӧрыт, сентябрь 18 лунӧ, Сыктывкарын пансис «Туйвеж» финн-йӧгра войтырлӧн видзӧдан искусствояс фестиваль. Тайӧ гажсӧ Сыктывкарын котыртісны квайтӧдысь нин. Кыдзи и пыр, «Туйвеж» шымыртіс аслас борд улын Россияса уна пельӧсысь, Эстонияысь да Финляндияысь режиссёръясӧс, операторъясӧс, мультипликаторъясӧс да фотографъясӧс.
Таво фестивальлӧн неыджыд гӧгрӧс пас – медводдза «Туйвежыс» вӧлі республикаса юркарын 2009 вося октябрын.
И со дас во нин, кык вонас ӧтчыдысь, «Туйвеж» ӧтувтлӧ кино да фотоискусство радейтысь, чужан кыв да культура-традиция сӧвмӧдны-видзны зільысь рӧдвуж войтырӧс.
Квайтӧд фестивальлӧн конкурсын шуӧма петкӧдлыны 69 авторлысь 55 видеоудж (документальнӧй, этнографиялы сиӧм, ворсан да анимация фильмъяс да социальнӧй роликъяс) да 41 фотосерпас.
Таво нимпасыс содіс. Сідз, анимация да ворсан фильмъяс дасьтысьяссӧ лои юкӧма любительяс да профессионалъяс вылӧ. Сідз шусяна визит карточкаыс таво – «Туризм» нимпасын конкурс, кодӧс сиӧма ООН-ӧн йӧзӧдӧм мирса вужвойтырлӧн волы.
Номинацияын лоӧ петкӧдлӧма Коми Республикаын туризмӧн тӧдмӧдан да Коми муӧ волыны ышӧдан фильм-серпасъяс. Фестивальлӧн ӧкмыс нимпасын вермысьясӧс бӧръясны сентябрь 18-21 лунъясӧ.
Кызвын гажыс мунас Коми Республикаса войтырлӧн Ёртасян керкаын: тані паськӧдчас фотовыставка да петкӧдласны конкурсӧ пы-рӧдчысьяслысь уджъяс. А Россия Федерацияса финн-йӧгра культура шӧринын позяс видзӧдны конкурсӧ пырттӧм фильмъяс.
Фестивальӧ пырӧдчысьяслысь уджъяссӧ таво донъялӧны Коми Республикаса, Россияса да Финляндияса киноын да искусствоын водзмӧстчысь войтыр: нималана драматург, Россияса театрын уджалысьяслӧн да Россияса гижысьяслӧн котыръясӧ пырысь Любовь Терентьева (Сыктывкар); «Коми йӧзӧдчан керкаӧн» веськӧдлысь, коми кыв сӧвмӧдӧмлы сиӧм уна сикас уджтас дасьтысь-збыльмӧдысь Инесса Орёл (Сыктывкар); журналист, кинодокумен- талист Аслак Палтто (Финляндия, Лемменйоки).
Жюриӧн юрнуӧдысьыс – кинорежиссёр, сценарист, драматург, литератор да преподаватель, Удмуртияса «Киноглаз-ов» студиялы да «ВЕТР» киношколалы подув пуктысь Вениамин Тронин (Удмуртия, Глазов).
Жюриӧ пырысьяс тшӧтш котыртласны быдсикас мастер-класс.
Фестивальлы кывкӧртӧдсӧ лоӧ вӧчӧма сентябрь 21 лунӧ финн-йӧгра этнокультура паркын.
* * *
Коми Республикаса культура, туризм да архив удж кузя да национальнӧй политика министерствояс отсӧгӧн «Туйвеж» финн-йӧгра войтырлӧн видзӧдан искусствояс фестивальсӧ котыртіс «Комикино» асшӧр учреждение. Сійӧс нуӧдӧмӧ ассьыныс пай пуктісны тшӧтш финн-йӧгра этнокультура парк, Россияса финн-йӧгра культура шӧрин, Коми Республикаса войтырлӧн Ёртасян керка, йӧзкостса творчество шӧрин, регионса искусствояс колледж, Коми Республикаса Национальнӧй галерея, «Югӧр» шӧрин, В.Савин нима драма театр, вужвойтырлӧн шылада-драмаа театр, Сыктывдінса Зеленечысь культура керка, Сыктывкарса шойччан да кино петкӧдлан «Октябрь» шӧрин, юркарса да Эжваса коми культура шӧринъяс, Кулӧмдін районса культура керка, Н.М.Дьяконов нима литературно-театральнӧй музей.
Снимокъясыс «Ертасян керкалӧн» группаысь