Меставывса асвеськӧдлан лун водзвылын ми аддзысьлім-варовитыштім Зеленеч овмӧдчӧминса Ванегрездысь старӧстакӧд. Ольга Ежель – Сыктывдін сӧвмӧдӧм-дзоридзалӧм могысь уджын водзмӧстчысьяс лыдын. Сійӧ лӧсьӧдӧ йӧзыслысь меставывса администрациякӧд йитӧд. Нывбаба окотапырысь висьтасис Зеленечӧ овны воӧм да мӧд чужанінӧн лоӧм сиктса олӧмын водзмӧстчӧм йывсьыс.
–Ольга Анатольевна, век окота медводз тӧдмавны челядьдыр йывсьыд.
–Менам батьӧй – фронтӧвик. Гортӧ 1952 воын бергӧдчӧм бӧрас йитіс олӧмсӧ кӧрт туйкӧд. А удж кузяыс тшӧкыда ковмыліс сэтчӧ-татчӧ ветлыны. И кӧть ме чужи Воронеж обласьтын, 1975 воын овмӧдчим Коми АССР-ысь Удора районса Вож посёлокын. Куим вок да квайт чой пӧвстысь ме вӧлі медся ичӧт. Кӧкъямыс класс помалӧм бӧрын велӧдчи маляр-штукатур-плиточникӧ да уджалі специальносьт серти. Сэсся дзоньвидзалунӧй омӧльтчыштіс, да корси кокньыдджык удж. Вежи оланінӧс. Быдті ныв.
–Кыдзи воинныд Сыктывдін районӧ?
–Пилы кык арӧс тырис да, шуим Ухтаысь мунны шоныдджыкинӧ. Ёна мӧвпалӧм-донъясьӧм бӧрын бӧрйим Сыктывдін район. Дас ӧти во сайын ньӧбим Зеленеч бердса Ване-грездын керка. Тадзи збыльмис ас керкаын овны нэмӧвӧйся кӧсйӧмӧй. Уна челядя семьяын быдми да, ичӧтдырсянь кужа вӧчны быдсикас удж, та вӧсна сьӧкыдлунысь эг пов.
–А выльлаын мытшӧд-падмӧгыс уна вичмис?
–Олӧмыс петкӧдліс, мый Сыктывдін бӧрйӧмӧн верӧскӧд эг сорсьӧй. Зеленеч лоис миянлы мӧд чужанінӧн. 2015 воас ме медводз шуи инавны пиӧс детсадйӧ. Ӧнӧдз шоныда казьтыла заведующӧй Ирина Брониславовна Королёваӧс: сиктӧ овмӧдчӧм бӧрын мытшӧд-сьӧкыдлуннымӧс тӧдмаліс да дзик пыр вӧзйис меным удж. Шоныда вочаалісны и сиктса администрацияын. Ванегрездын эг на пасйысьӧй-регистрируйтчӧй, а менам корӧм серти овмӧдчӧминса юралысь Марина Анатольевна Цывунина тшӧктіс нин весавны миян керкалань туйсӧ лымйысь. Социальнӧй работник Любовь Васильевна Цывунина зіля дасьтіс колана социальнӧй отсӧг кузя кабала-документъяс.
–Дас ӧти во нин ті зілянныд челядьлы садйын да окотапырысь пырӧдчанныд тшӧтш и художественнӧй самодеятельносьтӧ, водзмӧстчанныд сиктса олӧмын.
–Збыльысь, вит во вӧлі младшӧй воспитательӧн, а бӧръя квайтсӧ зіля машинаӧн песласьӧм кузя операторӧн. Колігъясӧ вежлывла висьмӧм либӧ шойччысь уджъёртъясӧс, мусмӧм детсадйын босьтча быд удж-нокӧ. Тані сӧгласа-ёрта ставсӧ вӧчам да, тшӧкыда корлывлӧны утренникъяс дырйи ворсны кодӧскӧ. Челядьлӧн нимкодьлуныс, накӧд шоныд аддзысьлӧмъясыс ышӧдӧны менӧ.
Уджъёртъяскӧд сідзжӧ петкӧдчам культура керкаын «Битва хоров» быдвося конкурсын, Ыджыд Вермӧмлы да сиктын мукӧд паслы сиӧм гажъясын.
–И та кындзи нӧшта на босьтчинныд Ванегрездын старӧстаавны.
–Овмӧдчӧминын быд чукӧртчылӧм-собрание вылӧ ветлывла, сикт мичмӧдӧм-бурмӧдӧмын водзмӧстча, и йӧзыс, дерт, казялісны тайӧс да вӧзйисны лоны старӧстаӧн. Сэсся и бӧрйисны. Ӧні тшӧкыда кытшовтла Ванегрездсӧ, сёрнита йӧзыскӧд, юася майшӧдланаторсӧ, донъяла, лючки-ӧ югзьӧдӧма уличсӧ, бура-ӧ весалӧны туйсӧ лымйысь да сідз водзӧ. Мытшӧд-падмӧгъяс йывсьыс юӧрта администрацияӧ. Отсала тшӧтш народнӧй проектъяс дор кырымпас чукӧртны. Нӧшта на куим во нин пыра бюджет комиссияӧ да район тшупӧдын доръя Зеленечса уджтасъяс.
–Водзӧ вылӧ кутшӧм могъяс?
–Лӧсьӧдча майся гажъясӧдз котыртлыны субӧтник. Пелькӧдчыны петавны чукӧста-кора челядя семьяяс да томуловӧс. Эм мӧвп социальнӧй везйын лӧсьӧдны котырлысь лист бок, медым позис юксьыны бӧръя юӧръясӧн, варовитны ас костын. Менам уджысь водзӧсыс абу вывті ыджыд, но меставывса администрация унаторйын отсалӧ-ышӧдӧ, и таысь налы аттьӧ. Миянӧс корлывлӧны-чукӧртлӧны опытӧн юксьӧм могысь, да тайӧ сетӧ позянлун меным велӧдчыны мукӧдыслысь, пыртны ас уджӧ мыйкӧ выльтор да буртор.
–Семьяыдлы да радейтана удж-нокыдлы кадныд вичмӧ жӧ кӧть?
–Дерт! Максим пиӧй велӧдчӧ Зеленечса школаын сизимӧд классын, неважӧн сетісны «Старшӧй кадет» ним. Ми верӧскӧд гӧрдитчам сылӧн вермӧмъясӧн да быдторйын отсалам-ошкам. Нимкодьӧдӧ и нылӧй, сійӧ озырмӧдіс миянӧс куим внукӧн. Ветлывлам видлыны рӧдвужнымӧс Удораӧ да Ухтаӧ. Неважӧн пикӧд вӧлім Брянскын, гожӧмнас кӧсъям саридз дорӧ шойччыны ветлыны.
Виччысьӧмӧн виччыся, кор нин йӧраным кутасны гажӧдны син радейтана дзоридзьясӧй, а град вылын да теплицаын – пуктас. Гожӧмнас менам лунӧй пансьӧ киын кофе чашкаӧн йӧр-участокӧс кытшовтӧмсянь. Видзӧдала гӧгӧр, нимкодяся да сьӧлӧм-лов бурмӧда.
–Ольга Анатольевна, висьталӧм сертиныд, 11 во сайын ті эн сӧмын вежӧй оланінтӧ. Ті чукӧстчинныд сиктса олысьяслӧн бура вочаалӧм вылас да асьныд кутінныд вӧчны йӧзкотырлы бурсӧ: отсасьны, водзмӧстчыны, донъявны. Выль вермӧмъяс тіянлы!
Ольга Калмыкова.
-
Снимокъясыс авторлӧн да Ольга Ежельлӧн гортса архивысь.
-
Комиӧдіс Елена Плетцер.