Сыктывкарса лесопромышленнӧй да автомеханическӧй техникумъяс нуӧдісны «восьса ӧдзӧса» лунъяс, медым отсавны школа помалысьяслы бӧрйыны сьӧлӧм серти удж, а налӧн бать-мамлы петкӧдлыны, кутшӧм тӧдӧмлун да сям-кужӧмлун вермасны босьтны ныв-пиыс налӧн велӧдчанінын.
Буретш тайӧ техникумъясас уджалӧны «Профессионалитет» проект серти, а отсасьӧны налы «Сыктывкарса ЛПК», «Лузалес», «Комиавтотранс» да «Туй дӧзьӧритан Коми компания». Том йӧзӧс нуӧдлісны и тайӧ предприятиеясас.
Апрель 18 лунӧ вӧр промышленносьт техникумын ӧтуввез пыр котыртлісны и бать-мамкӧд сёрни да висьталісны, кыдзи студентъяс велӧдчӧны, творчествоӧ да спортӧ сибӧдчӧны.
Автомеханическӧй техникумӧ волісны юркарса кызь школаын велӧдчысьяс. Транспортын уджӧн найӧс тӧдмӧдісны «Комиавтотранс» компанияса генеральнӧй директорӧс медводдза вежысь Владимир Тукмаков да «Туй дӧзьӧритан Коми компанияса» диспетчер службаӧн веськӧдлысь Евгений Косьяненко.
–«Восьса ӧдзӧса» лунӧ ми вермам аддзыны тӧлка том йӧзӧс, кодъяс дасьӧсь уджавны миян дорын, – пасйис Владимир Тукмаков.
Сыкӧд ӧти кывйӧ воис и Евгений Косьяненко:
–Ми кӧсъям, мед миян компанияӧ локтісны паськыд тӧдӧмлуна да уджсӧ радейтысь войтыр.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.