Апрель 8 лунӧ Сыктывкарса канму университетын медводдзаысь мунiс «Юргы, кодзув!» Сыктывкарса велӧдчысьяслӧн комиӧн гораа лыддьысян чемпионат. Сiйӧс сиисны «Войвыв кодзув» журналлы 100 во тырӧмлы да Коми Республикаын Сикт волы.
Чемпионатын ордйысисны университетысь, вӧр институтысь, культура, медицина, педагогика, сервис да связь колледжъясысь, агропромышленнӧй техникумысь, искусствояс да Коми национальнӧй гимназияясысь 28 том морт.
Ставӧн лыддисны «Войвыв кодзув» журналысь гижӧдъяс. Чемпионатыс вӧлі куим тшупӧда: художествоа проза, кывбур, публицистика гижӧд.
Жюриын пукалiсны режиссёр да велӧдысь Виктор Напалков (жюриӧн веськӧдлысь), журналист Марина Гурова, гижысь Алёна Старцева. Налы отсасис студент Виктория Терентьева.
Оргкомитетын кывкутӧмӧн зiлисны коми филология, финно-угроведение да регионоведение кафедраӧн веськӧдлысь Елена Остапова (котырӧн веськӧдлысь), гижысь да «Войвыв кодзув» журналса шӧр редактор Нина Обрезкова, кафедраса велӧдысь Софья Федосеева, студент, «МИ» котырӧн веськӧдлысь Элина Шлопова.
Козинъяс вичмӧдiсны Коми Республикаса национальнӧй политика министерство, Коми йӧзӧдчан керка, Сыктывкарса канму университет.
Елена Васильевна кывкӧрталіс лыддьысян гажсӧ татшӧм кывъясӧн: «Аддзим, мый ми эмӧсь, кужам лыддьысьны комиӧн, кыпыдӧсь, дасьӧсь ордйысьны, кывзам да пыдди пуктам ӧта-мӧднымӧс.
Сьӧлӧмсянь аттьӧалам ставнытӧ – лыддьысьысьясӧс, чемпионат дасьтысь-нуӧдысьясӧс, ве-лӧдысьясӧс. А коми томуловӧс виччысям миянӧ велӧдчыны!».
Чемпионатӧ пырӧдчисны кык ёрт – Юра Мизев да Михаил Игнатов, Митрей Мишӧн видзаасьӧ. Кыкнанныс велӧдчӧны Сыктывкарса вӧр институтын. Зонъяслы ёна воӧма сьӧлӧм вылас ордйысьӧмыс.
–Чемпионат коляс менам сьӧлӧмын нэм кежлӧ! Зэв ёна кажитчис тайӧ чукӧртчылӧмыс. Артмис интереснӧй вермасьӧм, бур казьтылӧмӧн коляс вежӧрӧ. Мед эськӧ чемпионат лоас традицияӧн. Ыджыд аттьӧ котыртысьяслы! – висьтасис Юра.
Митрей Миш содтіс:
–Зэв ыджыд аттьӧ аддзысьлӧмсӧ нуӧдысьяслы! Быд татшӧм чукӧртчылӧм, кор гӧгӧр гораа юргӧ мича коми кыв, шонтӧ сьӧлӧмӧс. Медъёна кажитчис, мый том йӧзыс волісны уна велӧдчанінысь, уна районысь. Тӧдчӧ коми войтырлӧн ӧтувлунным. Кажитчис лыддьыны проза, кывбурыс дженьыдджык вӧлі да, эг удит гӧгӧрвоны, кыдзиджык сійӧс лыддьынысӧ. Нимкодьпырысь виччыся выль «Юргы, кодзув!» ордйысьӧм. Весиг чужи мӧвп чукӧртны карын велӧдчысь ёртъясӧс кывбур лыддян рытпук вылӧ, медым сы дыра не виччысьны мӧд вося аддзысьлӧмсӧ.
Митрей Мишлы чемпионатын бура петкӧдчӧмсьыс вичмис «Войвыв кодзув» журнал вылӧ во джын кежлӧ подписка.
Чемпионатын вермысьӧн лои Коми Республикаса искусство гимназияын 10 классын велӧдчысь Дарья Катаева.
Дарья тшӧтш юксис сьӧлӧмкылӧмнас:
–Меным нимкодь вӧлi веськавлыны аслыспӧлӧс чемпионат вылӧ. Татшӧмсяма чукӧртчылӧмас ме медводдзаысь, но, стӧча шуа, абу медбӧръяысь!
Зэв ёна кажитчисны чемпионатса раундъясыс. Быд раунд бӧрын вӧлi кольӧ этшаджык и этша-джык йӧз. Сьӧлӧм тiпкӧ… Он тӧд, прӧйдитiн тэ водзӧ али эн. Но чужӧмӧ петлiс паськыд нюм, кор вӧлi аддза жюри карточкаясысь медвылыс балл – куимысь 6!
Сэки лолыд радысла быттьӧ чеччыштӧ пытшсьыд! Но тайӧ ставыс эз эськӧ артмы миян велӧдысьястӧг.
Ыджыд аттьӧ Лидия Яковлевналы да Светлана Михайловналы, кодъяс сьӧлӧмсяньыс зiльӧны вынсьӧдны миянлысь тӧдӧмлун, велӧдӧны радейтны да видзны чужан му да чужан кыв! Ыджыд аттьӧ котыртысьяслы татшӧм кыпыд коми кывъя ворсӧмсӧ лӧсьӧдӧмысь.
А сiдзжӧ Никита Филипповлы да Виктория Терентьевалы гажаа чемпионат восьтӧмысь, Элина Шлоповалы мывкыда нуӧдӧмысь. Ставыс вӧлi лючки-бур да шыльыд!
Искусствояс гимназияысь томулов петкӧдчисны бура. Дарья кындзи нӧшта куимӧн босьтісны мӧд да коймӧд тшупӧда диплом. Лидия Яковлевна Зварич, коми кыв да литература велӧдысь, висьтасьӧ:
–Лыддьысян сям петкӧдлан чемпионатыс меным воис сьӧлӧм вылӧ. Сценарийсӧ лӧсьӧдӧмаӧсь интереснӧя. Раундъяс вежласисны ӧта-мӧд бӧрсяыс ӧдйӧ, сы вӧсна мый стрӧга кутчысисны регламентӧ. Мӧвпыштны кӧ, уна-ӧ удитан лыддьыны минутӧн? Но челядьлы тырмис петкӧдлыны кужанлуннысӧ, а жюри помся лэпталiсны донъялан лыдпасъяс. Дзик ӧнiя тэрыб кадыслы лӧсялана формат. Быд раунд бӧрын жюри арталіс баллъяс. А сыкостi челядьӧс гажӧдiсны, «Войвыв кодзув» журнал история кузя сетiсны содтӧд тӧдӧмлун. Тайӧ тшӧтш зэв буртор.
Тыдалӧ вӧлi, мый челядь унаӧн майшасьӧны, пыр быттьӧ коштасьӧма горшныс, корисны юны ва. Ме радлi асланым нывъяс вӧсна, найӧ бура петкӧдчӧмнас эскӧдiсны, мый зiля велӧдчӧны гимназияын, радейтӧны коми литература да кужӧны мичаа лыддьысьны чужан кывйӧн.
Колӧ тайӧ гажсӧ водзӧ нуӧдны, гашкӧ, республика тшупӧдын, медым и верстьӧ йӧз тадзи жӧ петкӧдчисны, сьӧлӧмпӧтсӧ шедӧдiсны мичаа юрган коми кывйӧн. Гырысьясыд ӧд унаӧн радейтӧны на лыддьыны нэмӧвӧйся коми журналтӧ!
Ыджыд кывкутана удж чемпионат дасьтӧмын вичмис «Войвыв кодзув» журналса шӧр редактор Нина Обрезковалы. Нина Александровна юксис гаж бӧрся мӧвпӧн:
–Дерт, позьӧ вӧлі редакцияса уджалысьяслы аддзысьлыны коми кафедраса студентъяскӧд, сёрнитны журнал, коми литература, том гижысьяс йылысь, и тайӧ эськӧ тшӧтш вӧлі колана сёрни. Но окота вӧлі мыйкӧ ыджыдджыктор…
И сэки ме казьтышті, кыдзи ачым «ворсі» «Открой рот» чемпионатын, лыддим роч гижӧдъяс, и помнита, кутшӧм окота меным лои вӧчны татшӧмсӧ комиӧн…
Колис гоз-мӧд во, и буретш таво лӧсяліс ставыс – и журналлӧн юбилейыс, и университетын чукӧртчылӧмыс – и артмис. Университет, медводз, дерт, коми кафедра да сыӧн веськӧдлысь Елена Васильевна Остапова шуисны: «Вӧчам!». Но а сэсся нин котыртан удж – тшӧктӧмъяс, письмӧяс да с.в. Дерт, бара жӧ медуна нокыс судзсис коми кафедралы.
А сэсся кутісны воны шыӧдчӧмъяс… Ӧти колледж, мӧд, коймӧд… Быд рыт Елена Васильевна юӧртліс: чукӧрмис 15 морт… 20 морт… 27 морт… Вермасян лунас СГУ-са музей залӧ кутісны гузьгыны вӧр институтысь, культура, медицина, педагогика, сервис да связь колледжъясын, агропромышленнӧй техникумын, искусствояс да Коми национальнӧй гимназияясын велӧдчысьяс.
Ставыс 28 морт. Ми, дерт, надейтчим, мый лоасны студентъяс, но мый та мында, эг чайтӧй. Но ставӧн тӧрӧдчим… Гӧгӧрвоана, мый лыддьысян тшупӧдыс ставлӧн аслас. Кодкӧ школасяньыс, колӧкӧ, эз восьтыв некутшӧм коми небӧг, ог нин шу «Войвыв кодзув» йылысь, кодкӧ лыддьысьӧ быд лун.
Ставыс и тыдовтчис. Но ме ӧні тӧда, мый миян юркарын эмӧсь тӧлка том коми войтыр, найӧ велӧдчӧны, и код тӧдас, кыдзи налӧн олӧмыс артмас, но стӧча тӧда и сійӧс, мый тайӧ томуловыс кутасны помнитны тайӧ чемпионатсӧ, ӧд тайӧ вӧлі збыль ордйысьӧм: и полӧм, и родӧм, и гӧгӧрвотӧм. Некодлы эз вӧв веськодь, а сідзкӧ, ставыс артмис.
Кык ыджыд мог вӧлі пӧртӧма олӧмӧ. Ӧтиыс – «Войвыв кодзув» журналкӧд кодлӧнкӧ, гашкӧ, и медводз аддзысьлӧм, мӧдыс – университетӧ медводдзаысь волӧм, коми кафедраын да сту-дентъяслӧн олӧм-вылӧмӧн тӧдмасьӧм, а збыльвылас, тайӧ ӧти мог – медым коми войтырлӧн, коми кывлӧн вӧлі аскиа лун.
Вермысьяс йылысь. Жюри вермысьяснас шуис искусствояс гимназияса велӧдчысьясӧс, найӧ босьтісны нёль местасӧ, и ӧтиӧс – университетса студент.
Со миян кодзувъяс: I местаын – Дарья Катаева, II-ын – Ольга Коровина, Софья Лукина, III-ын – искусствояс гимназияысь жӧ Мария Юдина да канму университетысь студент Никита Фи-липпов.
Чолӧмалам ставнысӧ. Пасъям, Софья Лукинаӧс виччысьӧ «Войвыв кодзув» журналын первой йӧзӧдчӧм – сылысь гижӧдсӧ лои пасйӧма асшӧр гижысьяслӧн «Ас йӧз» конкурсын.
Аттьӧалам миянлысь жюри: режиссёр да велӧдысь Виктор Напалковӧс, журналист Марина Гуроваӧс, гижысь Алёна Старцеваӧс.
Чайтам, ставыс артмис, а мый эз артмы, та йылысь некод оз тӧд… Водзын, кутам лача, республикаса тшупӧд, и сы кежлӧ заводитам нин дасьтысьны…
<> Алёна Нестерова. Снимокъясыс ӧтуввезйысь.