Республикаса кар-районын олысьяс водзӧ видлалӧны-донъялӧны локтан воын збыльмӧдны дасьтӧм йӧзкостса проектъяс.
–Кад воис, кор миян пиысь быдӧн ассьыс пай пуктӧмӧн вермас отсавны бурмӧдны-мичмӧдны чужан карлысь, сикт-грездлысь чужӧмбансӧ, – пасйис такӧд йитӧдын регионса юралысь Ростислав Гольдштейн.
Республикаса муниципалитетъясын ставсӧ шуӧма нуӧдны 364 собрание. Котыртлӧма нин 174 аддзысьлӧм, кытчӧ волӧма матӧ 6,6 сюрс морт.
Торйӧн нин унаӧн чукӧртчылӧны та могысь гырысь каръясын, а сідзжӧ ӧткымын районын. Сідз, Сыктывкарын вӧлӧма нин дас вит собрание, волӧма кык сюрсысь унджык морт. Кулӧмдін районын котыртлӧмаӧсь сэтчӧс сикт-грезд-посёлокын 25 аддзысьлӧм. Водзмӧстчӧны та боксянь и Воркутаын, Усинскын да Княжпогост районын олысьяс.
Кывкӧртӧдъяс вӧчӧм бӧрын збыльмӧдны шуӧма нин 522 народнӧй проект. На лыдын овмӧдчӧмин пелькӧдӧм-мичмӧдӧм кузя – 185, культура сӧвмӧдӧм могысь – 74, та мында жӧ – велӧдан юкӧнкӧд йитӧдын, йӧзӧс уджӧн могмӧдны дасьтӧма 65, спорт сӧвмӧдны – 36 проект. Медбуръяс лыдын шуӧма и туй дзоньталӧм-бурмӧдӧм (37), ичӧт бизнесӧ босьтчӧм (14) да юкмӧс лӧсьӧдӧм (14) кузя уджтасъяс.
Кар-районын олысьяскӧд аддзысьлӧмъяс дырйи асланыс видзӧдласӧн юксьӧны и депутатъяс, тшӧтш и регионса парламентарийяс.
Казьтыштам, «Йӧзкостса бюджет» проектлӧн медшӧр могыс – отсавны йӧзлы бырӧдны налӧн овмӧдчӧминъясын мытшӧд-падмӧг, шуам, ӧтув зільӧм-водзмӧстчӧмӧн сиктса клуб дзоньтавны, улича югзьӧдны, юкмӧс весавны да с.в.
<> Гижӧдсӧ дасьтіс Александра Артеева. Снимокыс ӧтуввезйысь.