Россияын войтырӧс ӧтувтан вокӧд йитӧдын республикаса вужвойтырлӧн шылада-драмаа театр нуӧдӧ «Коми кывйӧн лолала да ола» онлайн-акция.
Та дырйи ӧтуввезйын «ВКонтактеын» театр котырын позьӧ видзӧдны-кывзыны видеороликъяс, кӧні артистъяс лыддьӧны миян регионса гижысьяслысь кывбуръяс.
Могыс – ышӧдны республикаын олысьясӧс радейтны, пыдди пуктыны да бурджыка тӧдмасьны вужвойтыр кывйӧн, национальнӧй литератураӧн да аслыспӧлӧс озыр культураӧн.
Онлайн юргӧны нин Геннадий Юшковлӧн, Иван Куратовлӧн, Анжелика Елфимовалӧн, Евгений Мартыновлӧн, Александр Некрасовлӧн да мукӧд нималана поэтлӧн сьӧлӧмӧ йиджана мича кывбуръяс.
Лыддьӧны найӧс Россия Федерацияса искусствоын заслуженнӧй уджалысь, Коми Республикаса народнӧй артистка, вужвойтырлӧн шылада-драмаа театрысь художественнӧй веськӧдлысь Светлана Горчакова, Коми Республикаса правительстволӧн премияа лауреат Тимур Смирнов, Коми Республикаса народнӧй артисткаяс Алёна Гаранина да Галина Подорова, артистъяс Андрей Засухин да Илья Карманов.
«Коми кывйӧн лолала да ола» онлайн-акцияыс мунас тавося май 17 лунӧдз.
Казьтыштам, быд во тайӧ тӧлысся коймӧд вӧскресенньӧӧ регионса юралысьлӧн 2023 во апрель 14 лунся индӧд серти шуӧма пасйыны-нимӧдны Коми кыв да гижӧд лун.
Гижӧдсӧ дасьтіс Александра АРТЕЕВА.