Коми Республикаса вужвойтырлӧн шылада-драмаа театрса спектакльлӧн регыд лоӧ профессиональнӧй видеоверсия: ыджыд проект серти сійӧс снимайтісны кольӧм лунъясӧ Сыктывкарын.
«Россияса театр постановкаяслӧн зарни фонд» уджтассӧ збыльмӧдӧ «Триколор» компания Россияса театральнӧй деятельяслӧн котыркӧд ӧтув сылы 150 во тырӧмкӧд йитӧдын. Медшӧр мӧвпыс – лӧсьӧдны ыджыд видеотека спектакльясысь, кодъяс петкӧдлӧны Россияын театральнӧй культурасӧ да духовнӧй олӧмас нэмӧвӧйся озыр традицияяссӧ.
2026 восӧ странаса президент Владимир Путинлӧн индӧд серти шуӧма Россияса войтырӧс ӧтувтан воӧн.
Такӧд йитӧдын проект сертиыс театр искусство пыр лоӧ паськыда петкӧдлӧма уна сикас войтырлысь культурасӧ. Проектыс збыльмӧдсьӧ культураын водзмӧстчысьяслы отсӧг сетан президент фондлӧн да Россия Федерацияса культура министерстволӧн зільӧмӧн.
Февральсянь апрельӧдз шуӧма волыны 17 карӧ да снимайтны 21 театрын медбур спектакльяссӧ, на лыдын и Коми Республикаса вужвойтырлӧн шылада-драмаа театрысь «Жизнь с привилегиями «навечно». Сійӧс снимайтісны видзӧдысьяс дырйи. Продюсеръяслӧн видзӧдлас серти, тайӧ сетӧ актёръяслы позянлун тырвыйӧджык восьтыны персонаж образсӧ.
«Жизнь с привилегиями «навечно» – Коми Республикаса заслуженнӧй уджалысь Николай Волоховлӧн автобиография гижӧд, коді шымыртӧ Великӧй Отечественнӧй война заводитчӧмсянь ӧнія лунъясӧдз уна дас во.
Ӧти семьялӧн история пыр спектакль петкӧдлӧ судьбасӧ войтырлысь, кодъясӧс коркӧ депортируйтісны асланыс чужанінысь ылі муӧ. Видзӧдысь аддзӧ, кыдзи олісны, кутшӧм сьӧкыдлунъяс ковмис пыкны-венны мирнӧй йӧзлы, кодъясӧс ыстісны нэм кежлас войвылӧ, и сійӧ лоис налӧн челядьлы Чужан муӧн.
–«Жизнь с привилегиями «навечно» спектакль дасьтӧм кузя мӧвпыс чужис, кор Николай Алексеевич Волохов вӧзйис меным лыддьыны аслас семьялӧн история йылысь неыджыд эссе. Премьераыс вӧлі 2014 воын. Уна видзӧдысь сійӧ кадсяньыс аддзис сэтысь ассьыс да матыссаяслысь олӧмсӧ, нуӧдіс ставсӧ тайӧс ас пырыс.
Россияса медбур постановкаяс лыдӧ веськалӧмыс – миян театрлы зэв ыджыд чесьт. Ме гӧрдитча аслам артистъясӧн, театрӧн да уджӧн, кодӧс вӧчим тайӧ спектакльсӧ дасьтігӧн. Дасьтім сійӧс синва сорӧн, и тайӧ йиджис видзӧдысьяслы сьӧлӧмас. Сьӧкыдысь-сьӧкыд вояссӧ, кодъясӧс вуджис миян чужан му, оз позь вунӧдны, кыдзи и сійӧс, мый кӧть кытысь ми, ставнымлы колӧ кутчысьны ӧтув, – гӧгӧрвоӧдіс Светлана Горчакова, Коми Республикаса вужвойтырлӧн шылада-драмаа театрын художествоа уджӧн веськӧдлысь, РФ-са искусствоясын заслуженнӧй деятель, Коми Республикаса народнӧй артистка.
Спектакльлысь телеверсиясӧ медводдзаысь петкӧдласны 2026 воын тулыснас «Большой эфир» телеканалын. Видеосӧ позяс дон босьттӧг видзӧдны и «Триколор Кино и ТВ» онлайн-кинотеатрын «Россияса театр постановкаяслӧн зарни фонд» юкӧнын.
–«Россияса театр постановкаяслӧн зарни фонд» – тӧдчана проект. Сійӧс сиӧма РФ-са театральнӧй деятельяс котырлӧн 150 вося юбилейлы, кодӧс пасъям 2026 воын.
Уджыс заводитчис кык во сайын: быд регионысь театръяс ыстісны ассьыныс шыӧдчӧмъяс, а сэсся эксперт жюри бӧрйис медбур спектакльяссӧ. Тайӧ постановкаяссьыс уна нималӧ нин, сэк жӧ колӧ, мед дзик ставсӧ найӧс видзӧдісны-аддзылісны странаса регионъясын. Уджъёртъяскӧд ми пӧртам олӧмӧ тайӧ колана могсӧ, – висьталіс Надежда Скляр, Россияса театральнӧй деятельяс котырӧн веськӧдлысьӧс вежысь, творческӧй управлениеӧн юрнуӧдысь.
–«Россияса театр постановкаяслӧн зарни фондса» спектакльясын воссьӧ кольӧм нэмъясся да ӧнія кадся культураыс, на костын йитӧдыс. Ассьыным аслыспӧлӧс видеотеканымӧс водзӧ лӧсьӧдігӧн ми бура аддзам, мый страна пасьталаын дасьтӧм спектакльясын петкӧдлӧма олӧмас нэмъяс чӧж медтӧдчанасӧ: семья да Чужан му дорӧ муслун.
Та дырйи ӧнія технологияясӧн вӧдитчӧмӧн ми ёнмӧдам ассьыным ӧтувъялун подувсӧ, – висьталіс «Россияса театр постановкаяслӧн зарни фонд» проектса генеральнӧй продюсер Михаил Анисимов.
<> Евгения Савина.
Снимокъясыс Коми Республикаса вужвойтырлӧн шылада-драмаа театрысь.