Комиын заводитчис «Мы – наследники Великой Победы» бур вӧчан быдвося марафон.
Та йылысь вӧлі юӧртӧма кольӧм вежонӧ «Победа» оргкомитетлӧн чукӧртчылӧм дырйи.
Регионса юралысь Ростислав Гольдштейн пасйис, мый уна во нин миян республикаын олысь бур сьӧлӧма йӧз, предприятие-организацияясын уджалысьяс, предпринимательяс, общественнӧй котыръясын водзмӧстчысьяс, исполнительнӧй власьт тэчасын, а сідзжӧ федеральнӧй ведомство юкӧнъясын зільысьяс окотапырысь пырӧдчӧны «Мы – наследники Великой Победы» марафонас. Тайӧ миян зэв тӧдчана да бур традиция. И колӧ сійӧс нуӧдны водзӧ.
Марафон могыс – сетны отсӧг судзсьытӧма олысь ӧтка ветеранъяслы, Великӧй Отечественнӧй войнаса участникъяслы, блокада кытшӧ веськалӧм Ленинградын олысьяслы, концлагеръясса вӧвлӧм тыр арлыдтӧм узникъяслы, тылын асланыс зіль уджӧн Победа дорысьяслы, усьӧм да бӧрынджык нин кувсьӧм салдатъяслӧн дӧваяслы, война кадся челядьлы, судзсьытӧма олысь пенсионеръяслы.
2025 воын «Мы – наследники Великой Победы» марафон дырйиыс Комиын вӧлі чукӧртӧма 3,692 миллион шайт. Сьӧмсӧ вуджӧдӧма кар-районса ветеран сӧветъяслы. Сы весьтӧ вӧлі вӧчӧма 619 казьтылан крест да гувывса гижӧда из, 271,5 сюрс шайт дон дзоньталӧма обелискъяс. Школаса музейяслы вичмӧдӧма компьютеръяс ньӧбны, войнаса да СВО-са ветеранъяс йылысь небӧгъяс дасьтыны-лэдзны 463 сюрс шайт. 150 сюрс шайт вуджӧдӧма республикаса ветеран госпитальлы вольпась кӧлуй да сёян-юан дозмук ньӧбны. Судзсьытӧма олысь война кадся челядьлы пес вылӧ торйӧдӧма 323 сюрс шайт.
<> Гижӧдсӧ дасьтіс Александра Артеева.
Снимокъясыс ӧтуввезйысь.