Мӧйму миян республикаын сьӧкыда висьысь кык сюрсысь унджык мортлы вештӧмаӧсь медицина учреждениеӧ ветлан туйысь рӧскодсӧ.
Миян регионын государствосянь татшӧм отсӧгсӧ шуӧма сетны лёк пыкӧсӧн нёрпалысьяслы, а сідзжӧ налы, кодъяслы сьӧкыд висьӧм пондаыс быть лоӧ вӧчны гемодиализ.
Республикаса удж да йӧзӧс социальнӧя доръян министерствоын казьтыштісны, мый Комиын ракӧн став висьысьыслы вештӧны больнича-клиникаӧ бурдӧдчыны ветлан ӧтарӧсӧ и мӧдарӧсӧ туйысь рӧскодсӧ.
Мӧймусянь мынтӧны унджык пӧрйӧ, вонас нёльысь автобусӧн, поездӧн либӧ вавывса транспортӧн ветлӧмысь. Рӧспута дырйи позьӧ и самолётӧн эконом-класса авиабилетӧн мунны-локны. Мынтасны и ас либӧ кӧртымалӧм автомашинаӧн больничаӧ ветлан туйысь рӧскодсӧ.
Кольӧм во государствосянь татшӧм отсӧг-кокньӧдсӧ босьтӧма 2029 морт. Регионса бюджетысь та могысь видзӧма дас сайӧ миллион шайт.
Комиын медучреждениеӧ ветлан туйысь рӧскодсӧ шуӧма вештыны и вермытӧмаяслы, кодъяслы чорыда висьӧм пондаыс быть колӧ вӧчны гемодиализ, содтӧд на и на пӧвстысь уналы вежоннас некымынысь.
Кызвыныс оз вермыны шыӧдчывны та могысь асланыс муниципалитетса медучреждениеӧ, абу сэні позянлуныс гемодиализсӧ вӧчны да, и лоӧ шыӧдчывны мукӧдлаӧ.
Бара жӧ, вештасны рӧскодсӧ автобусӧн, поездӧн, вавывса транспортӧн, а сідзжӧ ас либӧ кӧртымалӧм машинаӧн ветлан туйысь.
Кольӧм во государствосянь такӧд йитӧдын социальнӧй отсӧг вичмӧма 144 мортлы. Республикаса сьӧмкудйысь налы мынтӧма 23,1 миллион шайт.
И ракӧн висьысьяслы, и гемодиализ вӧчысьяслы больнича-клиникаӧ ветлан туйысь рӧскод вештӧм кузя колӧ шыӧдчыны кар-районса йӧзӧс социальнӧя доръян шӧринӧ, «Мои документы» МФЦ-ӧ либӧ «Госуслуги» порталӧ. <>
Гижӧдсӧ дасьтiс Алесандра Артеева. Снимокыс ӧтуввезйысь.