«Коми войтыр» ӧтмунӧм 2026 воын дас кыкӧдысь нуӧдӧ ӧтувъя коми диктант. Урчитӧны сійӧс Чужан кыв лун кежлӧ, кодӧс пасйӧны урасьӧм тӧлысь 21 лунӧ став мир пасьталаын. Тавося диктантсӧ сиӧма Комиын Сикт да Рочмуын войтырӧс ӧтувтан вояслы.
Диктант гижӧдсӧ дасьтіс коми журналист Константин Сердитов (снимок вылын). Лыддьысьысьяс сійӧс тӧдӧны Скӧр Кӧсьта сайнимӧн. Константин Степанович таво пасйӧ 65 арӧс. Сійӧ вӧлі коми войтырлӧн медводдза съездса делегатӧн, уна во пырис коми войтырӧс сӧвмӧдан комитетӧ, а сэсся – «Коми войтыр» ӧтмунӧмса исполкомӧ, веськӧдліс Луздор представительствоӧн.
Диктантсӧ гижӧны республикаса быд карын да районын школаын, библиотекаын, клубын, культура шӧринын, а сідзжӧ Москваын да Петыркарын.
Дасьтӧма и видеодиктант, кодӧс лыддяс Ю.А.Спиридонов нима искусство гимназияын коми кыв да литература велӧдысь Лидия Зварич. Видеодиктантсӧ позяс аддзыны ӧтуввезйысь акция котыртысьяслӧн сайтъясысь. Гижысьяс вермасны мӧдӧдны ассьыныс удж скансӧ донъявны komi-diktant@mail.ru электрон поштаӧ.
Казьтыштам, 2025 воын ӧтувъя коми диктант гижис 6.300 сайӧ, 2024-ӧдын – 4.500-ысь унджык морт. <>
Дасьтіс Алёна НЕСТЕРОВА. Снимокъясыс ӧтуввезйысь.