Январь 28-30 лунъясӧ Комиын сикт вокӧд йитӧдын республикаса вужвойтырлӧн шылада-драмаа театр петкӧдчӧ Изьва районын гастрольӧн.
Изьвасалы петкӧдласны Антон Чеховлысь «Корасьӧм», Валентин Красногоровлысь «Куим рочакань» тешъяс да челядьлы «Ошпи видзысь» мойд. Сідзкӧ, лоӧ позянлун нимкодясьны енбиа петкӧдчӧмӧн и верстьӧлы, и зонпоснилы.
Содтӧд пасъям, мый вужвойтырлӧн шылада-драмаа театрын вель уна артистлӧн чужаніныс – Изьва район. Сідз, Алёна Гаранина да Анна Терентьева – Красноборысь, Валентина Соколова – Томысь, Валериан Канев – Щельяюрысь, Александр Канев – Діюрысь, Данил Чудов – Изьва сиктысь.
Такӧд йитӧдын артистъяс котыртасны и «Артисты родного села» акция: шыӧдчасны землякъяс дорӧ, висьтасясны чужанін йывсьыс, казьтыштасны челядьдырсӧ да велӧдчӧмсӧ, профессияын медводдза воськовъяссӧ, а видеосӧ йӧзӧдасны ӧтуввезса группаясын.
Татшӧм жӧ акция нуӧдасны и республикаса мукӧд районысь петӧмаяс. Изьва бӧрын артистъяс ветласны Кӧрткерӧс районӧ.
<> Гижӧдсӧ дасьтіс Екатерина МАКАРОВА