«Койгортса» нацпаркын вӧчисны «Эко-коз» конкурслы кывкӧртӧд. Таво ассьыныс 565 удж донъявны вӧзйӧмаӧсь Коми Республикаса кар-районъясысь да весиг Хакасияса Абакан да Абаза каръясысь 1,1 сюрсысь унджык морт.
Мыйысь сӧмын абу вӧчасьӧмаӧсь-мастеритӧмаӧсь конкурсӧ пырӧдчысьяс: кабалаторйысь, гӧнысь, сутугаысь, кос дзоридзысь, эпоксида сирысь, турун-нитшкысь, гын-вурунысь, кыӧмаӧсь бисерысь, пӧжалӧмаӧсь преник, мичмӧдӧмаӧсь мозынса серӧн. А медся ёна шензьӧдӧны яеснича да пицца козъяс да весигтӧ аканьлы паськӧм.
Медся унаӧн петкӧдчӧмаӧсь «7 арӧсӧдз челядя семьяяс» нимпасын. Вермысьяс лыдын республикаса уна кар-районын олысьяс, медся унаӧн – Луздорысь, Сыктывкарысь да Сык-тывдінса Выльгортысь. Сідз, «Чӧскыд коз» нимпасын медводдза места сетӧма юркарысь Марк Булановлы, мӧдсӧ – Выльгортысь Андрей Косныревлы. Коймӧд местаын Изьва районса Сизябысь Инна Чупрова.
8-11 арӧсаясысь тайӧ номинацияас пасйӧма Абъячойысь Арам Мурадянӧс, Сыктывкарысь Глеб Варнавинӧс да Изьваысь Вероника Койноваӧс. 12-17 арӧсаяс пӧвстын вермысьясыс юркарысь Вадим Мольков да Абъячойысь Вероника Вязова да Дарья Сергеева.
Верстьӧясысь медвылӧ донъялӧма Зеленечысь Анна Гевейлерлысь уджсӧ.
А «Арт-коз» номинацияын пӧшти став приза местаыс сыктывкарсалӧн да выльгортсалӧн: Хадиджа Мамедовалӧн 1 места, Родион Куклин да Стефания Волынец мӧд тшупӧдынӧсь, коймӧдын – Григорий Кузьмин, Милана Кукольщикова да Мадина Мажидова. Медводдза места сетӧма и Кулӧмдінысь Евсей Поповлы.
Посниуловысь абу кольччӧмаӧсь и верстьӧ мастеръяс. «Эко-коз» нимпасын вермӧм шедӧдӧмаӧсь Помӧсдінысь Татьяна Карманова, юркарысь Елена Макарова да Изьваысь Ольга Рочева, «Арт-козйын» – Помӧсдінысь Татьяна Карманова, Чилимдінса Карпушевысь Ольга Чуркина, юркарысь Ирина Ефимова да Усинскысь Вера Мирошина.
–Ассьым козйӧс ме вӧчи дас часӧн кымын. Выльвося мичмӧданторсӧ окота вӧлі вӧчны аслыспӧлӧса да, шуи макрамеӧн вӧдитчыны. Сыӧн ставыс артмӧ кокньыд да кыпыд, гаждырсяджык. «Эко-коз» конкурсыс меным абу сӧмын ордйысьӧм, а позянлун сибӧдчывны мыйӧкӧ тӧдчанаӧ. «Койгортса» нацпаркӧн котыртлан конкурсъясас некымынысь нин пырӧдчылі, и быд пӧрйӧ аттьӧала сэні зільысьясӧс вӧр-ва видзӧм-дорйӧмсьыс, – висьталіс Ирина Ефимова.
Конкурсын вермысьяс лыдын и Ириналӧн Сергей Ефимов пиыс. Сылӧн «Арт-коз» нимпасын 12-17 арӧсаяс пӧвстын медводдза места. Зон лазер станокӧн вӧчӧма фанераысь коз. А пусӧ мичмӧдӧм могысь мавтӧма сійӧс акрил краскаӧн.
* * *
Пасъям: «Койгортса» нацпарк «Эко-коз» конкурссӧ нуӧдӧ Коми Республикаын олысьясӧс вӧр-ва видзны-дорйыны да сы вӧсна тӧждысьны ышӧдӧм могысь. Ордйысьӧмӧ став пырӧдчысьыслы вичмис электроннӧй сертификат, а вермысьяслы – диплом да казьтылан козин.
Алина Латышева. Снимокъясыс «Койгортса» нацпаркысь.