Ухта бердса Кӧмдін посёлокын фельдшерско-акушерскӧй пунктӧн веськӧдлысь Надежда Харина кольӧм во помын вуджис удж вывсяньыс вичмӧдӧм выль олан керкаӧ.
Надежда Михайловналы тайӧ – дыр виччысяна козин. Медицина юкӧнын сійӧ уджалӧ 24 во нин. Чужлӧма Киров обласьтын. Кӧмдінӧ воӧма 2001 воын да матӧ став кольӧм кадсӧ зільӧ сэтчӧс фАП-ас. Посёлокын олысьяслы ас мортӧн лоис, пыдди пуктӧны уджъёртъясыс и сы дорӧ медицина отсӧгла шыӧдчысьяс.
Аслас профессия дорӧ муслунӧн ышӧдӧма и челядьсӧ бӧрйыны радейтана уджсӧ. Нылыс да пиыс велӧдчӧны медколледжын.
Оланінсӧ кӧртымавлісны. А ӧні кутасны овны шоныд, югыд да кыпыд жыръяса благоустроитӧм керкаын, кӧні ставсӧ нин та могысь дасьтӧма, тшӧтш и гортын вӧдитчан техника, пызан-улӧс-шкап да мукӧд колана эмбур.
Дерт жӧ, ёна нимкодь Надежда Михайловналы, мый буретш Выь во кежлӧ сылы да семьяыслы регионса минздрав да правительство вӧчисны татшӧм дона козин.
Содтӧд пасъям, мый во сайын Кӧмдінын вӧлі кыпӧдӧма выль ФАП. А сідзкӧ, и тайӧ посёлокас вӧчӧма став коланасӧ, медым медицинаса специалист вермис и лючки уджавны, и бура овны.
* * *
Комиын медикъясӧс сиктын уджавны ышӧдӧм могысь оланін стрӧитӧм кузя тайӧ проектыс збыльмӧдсьӧ 2023 восянь. Талун кежлӧ регионса ФАП-ясын зільысьяслы кыпӧдӧма нин дас олан керка.
Гижӧдсӧ дасьтіс Александра АРТЕЕВА. Снимокыс ӧтуввезйысь.