Декабрь 1 лунӧ «Ростех» госкорпорация, «Айму дорйысьяс» фонд да Россияса сизим регион, на лыдын и Коми Республика, кырымалісны торъя военнӧй операцияса ветеранъясӧс реабилитируйтан шӧринъяс лӧсьӧдӧм йылысь сёрнитчӧм.
Татшӧм шӧринъясыс, кӧні сьӧкыда ранитчӧм воинъяслы кутасны вӧчны протезъяс, воссясны Комиын, Бурятияын, Луганск Народнӧй Республикаын, Архангельск, Кемерово, Тула обласьтъясын да Еврей автономия обласьтын.
Тавося апрель 23 лунӧ Федерация Сӧветӧн веськӧдлысь Валентина Матвиенко воліс Сыктывкарӧ, и сэки республикаса юралысь Ростислав Гольдштейн юксис сыкӧд Комиын татшӧм шӧрин лӧсьӧдӧм йылысь мӧвпнас.
Валентина Матвиенколӧн вӧзйӧм серти июньын регионӧ волісны «Ростех» корпорацияса генеральнӧй директорӧс вежысь Максим Выборных да «Травматологияын да ортопедияын инновация шӧрин» (ЦИТО) акционер котырӧн веськӧдлысь Виктор Спектор да шуисны, мый Комиын эм та могысь позянлуныс.
Протез вӧчан шӧринъяс уджалӧны нин Москваын, Ижевскын, Санкт-Петербургын, Омскын да мукӧд карын, матысса кадӧ воссясны Архангельскын, Екатеринбургын, Улыс Новгородын, Иркутскын, Рязаньын, Благовещенскын. 2027 во помӧдз татшӧм шӧриныс – ЦИТО-лӧн филиалыс – лоас странаса кызь вит регионын.
–Общественнӧй котыръяскӧд, некоммерческӧй организацияяскӧд, наукакӧд да медицинакӧд ӧтув государство вӧчас став позянасӧ, медым отсавны СВО-са ветеранъяслы, налӧн семьяяслы. Та могысь вынсьӧдім нин кыксёысь унджык оланпас, – висьталіс сёрнитчӧмсӧ кырымалігӧн Валентина Матвиенко. – Ӧнія технологияяс серти вӧчӧм протезъяс отсаласны ранитчӧм геройяслы тыр-бура овны – ветлӧдлыны, босьтны выль профессия, уджавны, лӧсьӧдны семьяяс, быдтыны ныв-пи да весиг спортӧ пырӧдчыны. Уна ветеран бурдӧдчӧм бӧрас бара на кӧсйӧны мӧдӧдчыны фронт вылӧ – таын петкӧдчӧ налӧн крепыд этшыс да Айму дорӧ муслуныс.
Оборонаса министрӧс вежысь, «Айму дорйысьяс» фондӧн юрнуӧдысь Анна Цивилевалӧн кывъяс серти, ветеранъяслы колӧ отсавны медводз сэні, кӧні найӧ олӧны, и та вӧсна шӧринъяссӧ зільӧны восьтыны унджык регионын.
Выль технологияяс серти вӧчӧм протезӧн позьӧ и котравны, и варччыны, и штанга лэптавны да мукӧд спорт сикасӧ пырӧдчыны. Федерация Сӧветын котыртлӧм выставка вылын вӧлі петкӧдлӧма, мый протез оз падмӧд лоны велосипедистӧн да сноубордистӧн, фигуристӧн да гонолыжникӧн, футболистӧн да волейболистӧн. Бурдӧдчӧм бӧрас торъя военнӧй операцияса ветеранъяс шедӧдӧны нин ордйысьӧмъясын вермӧмъяс.
ЦИТО вӧчӧ травматологиялы да ортопедиялы колана витсёысь унджык сикас изделие. 2022 восянь сизим сюрсысь унджык мортӧс протезируйтӧмаӧсь, на пиысь коймӧд пайыслӧн – микропроцессорӧн веськӧдлан биоэлектрическӧй протез.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.