Ноябрь 27 лунӧ Госсӧветысь депутатъяс кыкысь видлалӧм-донъялӧмӧн вынсьӧдісны 2026-2028 вояс кежлӧ республикаса бюджет йылысь оланпас бала. Сессия вылас волісны Рытыв-Войвыв кытшын Россияса президентӧс петкӧдлысь Игорь Руденя да Коми Республикаса юралысь Ростислав Гольдштейн.
Бюджет бала сертиыс 2026 воӧ республикаса сьӧмкудйӧ лоӧ чукӧртӧма 109,5 миллиард, рӧскодсӧ жӧ артыштӧма 124,6 миллиард шайт.
–Пыдди пуктана депутатъяс, медвойдӧр кӧсъя аттьӧавны тіянӧс экономикалы ӧнія сьӧкыд кадӧ бюджет дасьтігӧн вӧчӧм уджысь. Ті донъялінныд 19 госпрограмма, и тіян уна вӧзйӧм вӧлі босьтӧма тӧд вылӧ бюджет йылысь оланпас бала дасьтігӧн, – пасйис Ростислав Гольдштейн. – Бюджетса сьӧмысь кык коймӧд пайсӧ лоӧ веськӧдӧма социальнӧй юкӧнӧ: йӧзлысь дзоньвидзалун видзан, велӧдан юкӧн, культура, физкультура да спорт сӧвмӧдӧм вылӧ. Регионса правительстволӧн тӧдчанаӧн лоӧ и торъя военнӧй операцияын тышкасьысьяслы да налӧн семьяяслы отсӧг сетан мог.
Бӧръя воясӧ социальнӧй юкӧнӧ торйӧдӧм сьӧмыс ӧтарӧ содӧ, и татшӧм нырвизьӧ пӧ, висьталіс Ростислав Гольдштейн, колӧ кутчысьны и водзӧ, помавны социальнӧй стрӧйбаяс кыпӧдан удж. Торйӧн кӧ, Сыктывкарын колӧ эштӧдны вуджан висьӧм бурдӧдан больнича, челядьлы клиникалысь выль корпусъяс. Сідзжӧ локтан воӧ шуӧма дзоньтавны Печора районысь кык ФАП, Сыктывкарса да Ухтаса поликлиникаяс, восьтыны Сыктывдін районса Паджгаын да Удораса Благоевын врача амбулаторияяс, а Сьӧська, Висер, Пӧдтыбок, Важгорт, Вылыс Ярашъю сиктъясын, Сивӧй Маска да Елецкӧй посёлокъясын – фельдшерско-акушерскӧй пунктъяс.
2027-2028 воясӧ индӧма вайӧдны пӧрадокӧ Вуктыл, Луздор, Сосногорск, Мылдін, Чилимдін, Изьва, Инта, Княжпогост да Кӧрткерӧс районъясса бурдӧдчанінъяс, Воркутаын челядьлы больнича. Матысса воясӧ Сыктывкарын босьтчасны кыпӧдны перинатальнӧй шӧрин.
Йӧзӧс велӧдан юкӧн сӧвмӧдан могъяс лыдын 2026 воын индӧма Кулӧмдін сиктса 1-ӧд номера детсадйын восьтыны 90 посниулов вылӧ артыштӧм выль корпус, юркарын кыпӧдны школа, кӧні кутас велӧдчыны 825 ныв-зон.
2026-2027 воясӧ капитальнӧя дзоньталасны 32 велӧдчанін: Воркутаысь 35-ӧд, 40-ӧд, 26-ӧд номера школаяс да 6-ӧд номера гимназия, Луздор районысь Спаспорубса, Леткаса, Вуктымса, Гурьёвчиса школаяс, Сыктывкарысь Народнӧй дипломатия, Техническӧй да Физика-математика лицейяс, Усинск районысь Щельябӧжса, Денисовкаса да карса 5-ӧд номера школаяс, Эжва йылысь Тымсерса, Озъягса, Зимстанса велӧдчанінъяс, Сыктывдінысь Зеленечса да Выльгортса 1-ӧд, 2-ӧд номера школаяс, Кӧрткерӧс районысь Ыджыдвидзса, Одыбса да Кӧрткерӧсса велӧдчанінъяс, Косланса, Койгортса да Подзса, Сосногорскса 3-ӧд да 5-ӧд, Ухтаса 21-ӧд, Вуктылса 2-ӧд, Микуньса 1-ӧд номера школаяс, Емваса коррекционнӧй школа-интернат, Ыб сиктса детсад. Анапаса «Черноморская зорька» лагерын кыпӧдасны 50 морт вылӧ артыштӧм корпус.
2026-2027 воясӧ шуӧма тшӧтш дзоньтавны Сыктывкарса лесопромышленнӧй да автомеханическӧй техникумъяслысь ӧтуволанінъяс. Локтан воӧ Визинын, Воркутаын да Печораын восьтасны том йӧзлы шӧринъяс.
Культура юкӧнын 2026 воӧ капитальнӧя дзоньталасны Чилимдін сиктса культура шӧрин, Сосногорскын небӧг видзанін, Эжваын Н.М.Дьяконовлысь музей, Воркутаын музыка школа. Выльмӧдасны и Княжпогост, Кӧрткерӧс, Сосногорск, Сыктывдін, Чилимдін районъясын, Сыктывкарын музейяс.
Модельнӧй библиотекаяс воссясны Вуктыл, Луздор, Сыктывдін, Емдін, Кӧрткерӧс, Изьва районъясын, а культурно-просветительскӧй шӧринъяс – Емдін, Кулӧмдін, Сыктывдін районъясын, Сыктывкарын. Сідзжӧ Комиын восьтасны медводдза креативнӧй индустрия шӧрин.
Улыс Одесын да Ухтаын капитальнӧя дзоньталасны интернатъяс, а Луздорса Черёмуховкаын водзӧ стрӧитасны вермытӧмаяслӧн интернатлы выль корпус.
Дас ӧкмыс спортплощадка республикаын лоӧ вӧчӧма 2026-2028 воясӧ, Сыктывкарын кыпӧдасны фиджитал-шӧрин да вевта йиа арена, Косланын босьтчасны стрӧитны физкультура да дзоньвидзалун ёнмӧдан комплекс.
Республикаын туйяс дзоньталӧм могысь 2026 воын лоӧ торйӧдӧма 11,7 миллиард шайт.
Сыктывкарсянь Нарьян-Марӧдз трассаын индӧма вӧчны Акисьсянь Усвавомӧдз туйкост да Печора ю вомӧн пос.
Воркутаын, Сыктывкарын, Усинскын да Ухтаын дзоньталасны аэропортъяс.
* * *
2025 воын федеральнӧй бюджетысь республикаса сьӧмкудйӧ урчитӧма вӧлі вуджӧдны 16,6 миллиард шайт – воддза воын серти 3,6 миллиардӧн унджык.
Локтан воӧ жӧ федеральнӧй бюджетысь республикаӧ воас 16,4 миллиард шайт. И республикаса правительство водзын сулалӧ кывкутана мог, медым тайӧ сьӧмсӧ вӧлі видзӧма кыдз позьӧ ыджыдджык водзӧсӧн.
Республикаса бюджет оланпас бала серти регионса сьӧмкудйын оз кут тырмыны 15,1 миллиард шайт.
Медым корсьны тырмытӧмсӧ, ковмас босьтны кредит, ӧд кызвын уджйӧзалӧм сьӧмсӧ лоӧ веськӧдӧма социальнӧй тӧдчанлуна могъяс збыльмӧдӧм вылӧ.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.