Коми войтырлӧн XIII чукӧртчылӧмлысь помшуӧмъяс олӧмӧ пӧртӧм, кар-районын вужвойтырлысь конференцияяс нуӧдӧм йылысь сёрнитісны аддзысьлігас Коми Республикаса юралысь Ростислав Гольдштейн да «Коми войтыр» ӧтмунӧмса исполкомӧн веськӧдлысь Олег Лажанев.
–Регионса правительство да «Коми войтыр» уджалӧны ӧтув. Быд муниципалитетын эм ӧтмунӧмса представительство, и тайӧ сетӧ позянлун власьт тэчаслы кутны топыд йитӧд да веськыда сёрнитны республикаын олысьяскӧд.
Кар-районса конференцияяс дырйи йӧзыс юксьӧны асланыс тӧждъясӧн, вӧзйӧны регионын олӧм бурмӧдан нырвизьяс, медым сэсся правительствокӧд ӧтув индыны мытшӧд-падмӧг венан туйяс, – пасйис Ростислав Гольдштейн.
Республикаса юралысь содтіс, мый регионса правительство лыддьӧ тӧдчанаӧн коми кыв да культура, торйӧн нин йӧзлы юӧр сетан тэчасын, сӧвмӧдан мог. Сідз, «Юрган» телеканалын да «Коми гор» радиоын петӧны коми передачаяс, а «Радио Дача» радиостанция эфирын Удора, Койгорт, Кулӧмдін, Луздор да Сыктыв районъясын олысьясӧс выльторъясӧн тӧдмӧдӧны тшӧтш жӧ комиӧн.
Таво Сыктывкарын республикаса юралысь да регионса правительство отсӧгӧн «Коми войтыр» восьтіс гижысь Елена Козловалы памятник, Кӧрткерӧс районын сувтӧдіс челядьлы гижысь Агния Сухановаӧс казьтылан пас, республикаса школаясӧ да детсадъясӧ лои судзӧдӧма коми журналъяс. Комиысь котыр ветліс и Томск обласьтӧ да копыртчыліс Нёбдінса Виттор гулы.
Республикаса юралысь аттьӧаліс «Коми войтырын» водзмӧстчысьясӧс Айму дорйысь да Комиын герой вояс, а сідзжӧ Ыджыд Вермӧмсянь 80 вося юбилей пасйӧмӧ зіля пырӧдчӧмысь.
–Странаса президентлӧн индӧдӧн 2026-ӧдсӧ шуӧма Россияын олысь войтырӧс ӧтувтан воӧн. А миян республикаын локтан восӧ лоӧ сиӧма нӧшта и сиктлы. Вӧзъя и «Коми войтыр» ӧтмунӧмлы пуктыны тайӧ уджас пай, – шуис Ростислав Гольдштейн.
–Ростислав Эрнстович, ми век дасьӧсь ӧтув уджавны, – вочавидзис Олег Лажанев. – Миянлы торйӧн нимкодь, мый Комиын локтан восӧ лоӧ сиӧма сиктлы, ӧд сійӧс ми дыр нин виччысим: 2012 воӧ нин «Коми войтырлӧн» съезд шуліс вӧчны тайӧс. Ӧтмунӧмса исполком ыстіс нин регионса видз-му овмӧс министерствоӧ та кузя ассьыс вӧзйӧмъяс. Республикаса юралыськӧд да правительствокӧд ӧтув ми водзӧ кутам бурмӧдны землякъяслысь олӧмсӧ, бырӧдны мытшӧд-падмӧг.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.