«Семья» национальнӧй проект серти тавося ӧкмыс тӧлысьӧн Коми Республикаын лои кырымалӧма 1.262 социальнӧй контракт.
Государствосянь татшӧм отсӧгыс вичмӧ странаса став регионас судзсьытӧма олысьяслы. Социальнӧй контракт весьтӧ вермӧны босьтчыны асланыс бизнесӧ, инасьны удж вылӧ, лӧсьӧдны-вӧдитны ас овмӧс да венны олӧмын быдсикас мытшӧд-падмӧг.
Казьтыштам, социальнӧй контрактсӧ кырымалӧны овны судзсьымӧн мындаысь этшаджык чӧжӧса морт да йӧзӧс социальнӧя доръян шӧрин. Шӧриныс вичмӧдӧ пособие, а сійӧс босьтысьыс збыльмӧдӧ сылы урчитӧм уджтас.
–Государствосянь тайӧ отсӧгыс вичмӧдсьӧ медсясӧ судзсьытӧма олысь семьяяслы, торйӧн нин уна челядялы. Сы весьтӧ найӧ сэсся бурмӧдӧны олӧмнысӧ. Сідз, тавося ӧкмыс тӧлысьӧн соцконтрактсӧ кырымалім уна челядя 194 семьякӧд, – юӧртіс Коми Республикаын удж, занятосьт да йӧзӧс социальнӧя дорйӧм кузя министрлысь удж вӧчысь Татьяна Майкова.
–Соцконтрактсӧ кырымавнысӧ зэв кивыв, ӧд пособиеясыс абу ичӧтӧсь. Шуам, предпринимателявны босьтчысьлы ӧтчыдысьӧн сетам 350 сюрс шайтӧдз, ас овмӧс вӧдитны окотитысьлы – 200 сюрсӧдз. Да и водзӧсыс таысь ыджыд. Торйӧн кӧ, соцконтракт серти ас вылӧ уджавны босьтчыны кӧсйысис 498 морт, овмӧс вӧдитны-сӧвмӧдны – 71-ӧн, – тӧдчӧдіс Татьяна Майкова.
Удж вылӧ инасьны окотитысьлы быд тӧлысся пособиеыс республикаса лунвылын 20.894 шайт, войвылын – 25.852 шайт. Та кузя соцконтрактсӧ кырымаліс нин Комиын 568 олысь.
Социальнӧй контрактсӧ позьӧ вынсьӧдны и олӧмын мытшӧд-падмӧг венӧм могысь. Татшӧмсӧ кызвыннас кырымалӧны уджавны вермытӧмъяс, шуам, висьӧм понда да с.в. Комиын тайӧ позянлуннас вӧдитчисны нин 125 морт.
Кыдз пасйисны минтрудсоцын, государствосянь отсӧг весьтӧ семья-мортлӧн олӧмыс збыльысь бурмӧ, чӧжӧсыс содӧ. Сідз, соцконтрактсӧ тавоӧдз збыльмӧдӧмаясысь 82 прӧчентыс мӧдӧмаӧсь ун-джык нажӧвитны да судзсянаджыка овны. <>
Алина ЛАТЫШЕВА. Снимокъясыс ӧтуввезйысь.