Ирина Столярова: «Ме туясьысь, ме восьта мир!»

Велӧдысь лун водзвылын аддзысьлім Сыктывдін районса Пальысь педагог Ирина Столяровакӧд. Ань сетӧ географияысь да биологияысь тӧдӧмлун, восьтӧ быдмысь войтырлы выль мир.

Вӧр-ва дорӧ муслуныс – ичӧтдырсянь

–Ме чужи да быдми Паль сиктын, кӧні мичасьыс-мича вӧр-ваыс – еджыд яла ягъясыс, ойдлан видзьясыс, вына-визув Эжваыс – ичӧтдырсянь ышӧдісны-чуксалісны унджык тӧдны став ловъя лов йывсьыс, – паніс висьтасьӧмсӧ Ирина Викторовна. – Сёрӧнджык, класс 5-6-ӧдын, география велӧдысь Лия Сергеевна Яковченко да биолог Галина Васильевна Рогова восьтісны меным тайӧ мирсӧ наука боксянь. Быд выльтор тӧдмалӧмӧн вӧлі чуймала, кутшӧм шемӧсмӧдана миян гӧгӧр вӧр-ваыс! Тадзи и чужис биология да география дорӧ помтӧм муслуныс да ышӧдіс бӧрйыны лӧсялана уджсикас.

–А нӧшта ичӧтдырсянь радейті «В мире животных» да «Подводная одиссея команды Кусто» передачаяс, дзик став сериясӧ видзӧді! – казьтылӧ велӧдысь. – Окотапырысь лыдди «Почемучки» небӧг, кӧні тшӧтш зэв гӧгӧрвоана гижӧма быдсикас пемӧс да быдмӧг йылысь.

2010 воын Коми пединститутын география-биология факультет помалӧм бӧрын ныв чорыда шуӧма бергӧдчыны чужан сиктас.

– Чужанінын меным лӧсьыд, тані лолавсьӧ кокниа. Пальын эм став позянлуныс бура велӧдны биология. Вӧрыс да мукӧд экотэчасыс чуксалӧны нуӧдны сэні практическӧй занятие, босьтчыны туясян уджӧ. А тадзисӧ челядь тӧдмасьӧны предметнас оз сӧмын учебник серти, но и вӧр-ваӧ петалӧмӧн.

Жаль, но Пальын ни матігӧгӧр сиктъясса школаясын специальносьт сертиыс нинӧм вӧзйыны абу вермӧмаӧсь, та вӧсна педагогӧн уджавны кӧсйӧмыс некымын во на абу збыльмӧма. Пальса быдмысь войтырлы биологияысь да географияысь тӧдӧмлун сетысьыс ковмӧма сӧмын 2013 воын, и уджъёртъясыс шоныда вочаалӧмаӧсь том педагогӧс: отсалӧмаӧсь нуӧдны восьса урокъяс, тӧдмасьны методикаӧн, юксьӧмаӧсь опытнас.

Сьӧлӧм-лов бурмӧдан удж

–Челядь мекӧд тшӧтш окотапырысь вӧчӧны быдтор. И таысь нимкодь! – висьталӧ Ирина Викторовна. – Ныв-зонкӧд корсялам-чукӧртам сикт гӧгӧрысь быдсикас из да минерал. Татшӧмыс вочасӧн ӧкмӧ-содӧ. Эмӧсь и войдӧр саридзын уявлӧм-измӧм ловъя ловъяс.

Ӧні дасьтам та серти экспозиция. Эштӧдам да корлам ставнысӧ экскурсияӧн тӧдмасьны Палеопальса важ саридзын уявлӧмаяскӧд. Миян школаын челядьыс зэв шаньӧсь, восьсаӧсь да быдтор тӧдны окотитысьӧсь. Ыджыд кӧсйӧмӧн сьӧлӧмсяньыс кутчысьӧны туясян уджӧ, а тшӧкыдджыкасӧ асьныс вӧзйӧны кутшӧмкӧ выль проектъяс. Торйӧн нин 5-7 классаяс водзмӧстчӧны, зільӧны пыдісянь тӧдмасьны гӧгӧртас-мирӧн.

Велӧдчысьяс велӧдысьыскӧд ӧтув туялӧны чужан муса вӧр-ва, а сідзжӧ видлалӧны морт дзоньвидзалунлы инмана юалӧмъяс. Кывкӧртӧдъяснас ныв-зон петкӧдчӧны научно-практическӧй конференцияясын: школа-районсасянь ставроссияса да войтыркостсаӧдз.

– Миян эм мыйӧн ошйысьны-гӧрдитчыны, – пасйис вомъёртным. – Ассьыныс уджъяссӧ школьникъяс дорйылісны Сыктывкарын, Великӧй Устюгын, Москваын. Миян районын география, биология да химия велӧдысьяслӧн эм асланым методобъединение.

Ми юксям ӧта-мӧдкӧд опыт-сямӧн, отсасям ёрта-ёртлы. И таысь водзӧсыс эм: водзмӧстчам экология слётъясын, турист ордйысьӧмъясын, конкурсъясын. Вӧр овмӧсса специалистъяскӧд ӧтув дасьтам челядьӧс школаса лесничествояслӧн слётъяс кежлӧ.

И зэв нимкодь, мый велӧдчысьясным босьтӧны республика тшупӧдын медвылыс местаяс! Сьӧлӧм вылын долыд, мый ме ог сӧмын сет налы тӧдӧмлун, а тшӧтш и отсала аддзыны выль ёртъясӧс, петкӧдлыны асьнысӧ, ышӧда радейтны ас вӧр-ва.

Сиктса школьникъяс видлӧны выннысӧ «Я исследователь, я открываю мир!», «Моя малая родина» да республикаса мукӧд конкурсын, Вернадский нима ставроссияса конкурслӧн регионса тшупӧдын. Петкӧдчылӧны «Отечество – земля Коми» да Коми наука шӧринысь Биология институтӧн котыртлан конференцияясын. Нимкодь, мый челядь уджъяссӧ йӧзӧдӧны наука вестникъясын, пасйӧны быдсикас дипломӧн да козинӧн.

Педагог казьтыштіс велӧдчысьяслысь неважӧнся вермӧмъяссӧ. Сідз, Паджгаын экология слётын Пальса команда лоӧма медбуръяс лыдын. Республикаса экология слётын Мария Бухарина шедӧдӧма «Ботаника да дендрология» нимпасын мӧд места. Регионса том аграрийяслӧн слётын Пальса быдмысь войтыр петӧмаӧсь ас зачётын да командаса первенствоын вермысьяс лыдӧ. Нывъяслы диплом-козинсӧ сеталӧма велӧдӧм кузя министр Наталья Якимова.

–Кӧсъя сьӧлӧмсянь аттьӧавны менсьым отсасьысьясӧс, водзмӧстчысь да тӧлка-вежӧра Мария Бухаринаӧс, Милана Прокушеваӧс, Яна Кармановаӧс, Анжела Коданёваӧс да мукӧдӧс. Ті – молодечьяс! – пасйис Ирина Столярова.

А прӧст кадас педагог серпасасьӧ акварельӧн. Тайӧс пӧ тшӧтш вӧча ичӧтдырсянь. Серпасалӧ кабалаӧ дзоридз, пу, ӧти кывйӧн, бара жӧ вӧр-ва. Рисуйтчынысӧ велӧдчӧ видеоурокъяс серти. Творчествоыс пӧ лӧньӧдӧ, ылӧдлӧ быдлунъя тӧжд-майшасьӧмысь, кыпӧдӧ ловру.

Ирина Романова.

<> Комиӧдіс Елена Плетцер. Снимокъясыс Ирина Столяровалӧн гортса архивысь.

Ирина Столярова: «Ме туясьысь, ме восьта мир!»

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх