Ӧтчыд мича да шондіа лунӧ триньӧбтіс менам телефон. Матысті пель дорӧ, и кыла: «Бур лун, ме Москваысь Жанна Габова. Менам эмӧсь зэв бур юӧръяс, и кӧсъя тӧдмӧдны наӧн тіянӧс да тіян пыр коми газет лыддьысьясӧс».
Зэв кыпыда да чольӧба дыркодь сэсся Жанна висьталіс некымын концерт йылысь, кӧні сьылӧмаӧсь культураӧ сюртчысь сылӧн быдтасъясыс. Кор здук кежлӧ вомъёртӧй чӧв ланьтліс, кори тайӧ юӧрсӧ ыстыны меным ӧтуввез пыр.
Москваысь воӧм юӧръясысь да ӧтуввезйын сылӧн лист бокысь тыдовтчис, мый том да писькӧс композитор, шылад бура кылысь да ворсысь Жанна Габова-Джексембекова шымыртӧ аслас творчествоӧ уна сикас войтырлысь, тшӧтш и комилысь, аслыспӧлӧс национальнӧй серсӧ.
Сійӧ кужӧмӧн ӧтлаӧдӧ йӧзкостса нэмӧвӧйся традицияяс ӧнія кадся нырвизькӧд.
Такӧд тшӧтш тӧдмалі: Жанна – «уна портпеля» композитор да пианист, войтыркостса да миян странаса конкурсъясын, фестивальясын вермысь, азыма пырӧдчӧ сійӧ и Россияса композиторъяслӧн да музыка союзъяслӧн уджӧ, Москваса музыка котырын веськӧдлӧ «Союз композиторов Евразии» юкӧнӧн.
Та дорӧ содта, мый Жанна Рахимжановна – Кӧрткерӧсын быдмӧм Иван Васильевич Габовлӧн гӧтыр. Тӧдмасьлӧмаӧсь найӧ студенталігас на, Москваын П.И.Чайковский нима консерваторияын велӧдчигас.
Иван верӧсыс Москваын тшӧтш пыдісянь пырӧдчӧ культура юкӧнӧ, ворсӧ духӧвӧй музыкальнӧй инструментъясӧн да юрнуӧдӧ «Модерн» духӧвӧй оркестрӧн, водзмӧстчӧ Россияса юркарын «Коми землячествоын».
Жанна пыдди пуктӧ верӧсыслысь чужан кывсӧ да зільӧ пыртны сійӧс аслас творчествоӧ.
–Ме быд лун кыла верӧслысь коми сёрнисӧ да зэв вылӧ донъяла, мый сійӧ оз ӧтдортчы чужан кывсьыс, – ошкис верӧссӧ Жанна.
Меным шензьӧдана лоис, мый «Бабье лето» выль сьыланкывсӧ Жанна Габова лӧсьӧдӧма фортепианоӧн ворсӧм улӧ, и сійӧ мичаа юргӧ рочӧн и комиӧн.
«Клин журавлей» сьыланкыв бӧръя куим вонас юргӧма уна сьылан конкурсын: Дагестанса Махачкалаын, Краснодон карын, Москваын, и быдлаын шедӧдӧма лауреат ним.
Ыджыд Вермӧмлы да торъя военнӧй операцияын тышкасьысьяслы сиӧм сьыланкывъяс пӧвстын сійӧс пасйӧмаӧсь медбуръяс лыдын жӧ.
Жанна Габова таво гожӧм котыртӧма челядьлысь «ДрАмА» дуэт.
Дуэтас кыкнанныс ворсӧны фортепианоӧн да сьылӧны.
Кыдзи висьталіс композитор, челядьлӧн татшӧм дуэтыс Россияын медводдза.
Кӧть эськӧ сьылысьясыс коми кывтӧ ӧнӧдз абу на кывлӧмаӧсь, петкӧдчӧм бӧрас Москваса нывъяс ошйысьӧмаӧсь нин ёртъясыслы: «Мы теперь знаем ещё один иностранный язык – коми!».
–Москваын олігад бура тӧдан уна пӧлӧс сьылан да йӧзкост шылада конкурсъяс йывсьыд.
Долыд, мый найӧс котыртысьяс вылӧ донъялӧны войтыръяслысь, тшӧтш и комилысь, нэмӧвӧйся культура паськӧдӧмын менсьым водзмӧстчӧмӧс, – пасйис Жанна.
«Бабье лето» сьыланкывйыс сэтшӧма воӧма сьӧлӧм вылас видзӧдысьяслы, мый сійӧ юргӧ Жанна Габовалӧн быд концертын, торйӧн кӧ, таво август 19 лунӧ сійӧс сьылӧмаӧсь Россия Федерацияса президент бердын Коми Республикаса представительствоын, август 27 лунӧ – Сергей Есенинлӧн юбилейлы сиӧм концерт дырйи.
И со кутшӧм пасйӧд та йылысь гижӧмаӧсь ӧтуввезйын: «Весь вечер звучала прекрасная авторская музыка композитора Жанны Габовой, вдохновлённой поэзией Сергея Есенина. Сопровождали исполнение артистов флейта, гитара, виолончель, рояль и её Величество туба».
Жанна висьталӧ, мый век ошкӧ, кор йӧзыс тӧдӧны некымын кыв да вӧдитчӧны наӧн и олӧмас, и уджас.
Ачыс сійӧ роч кындзи бура тӧдӧ батьыслысь чужан казах кыв. Мамыслӧн чужаныс ногай кыв.
Мам-батьыс кыкнанныс интеллигентъяс и асланыс уджын пыр вӧдитчӧмаӧсь роч да чужан кывъяснас.
Батьыс Карагандаысь, философия наукаса кандидат, а мамыс быдмӧма Саратовын. Сійӧ музыкант, педагогика наукаса доктор, профессор, академик, Казахстан Республикаса культураын заслуженнӧй уджалысь.
–Уна сикас культура йылысь тӧдӧмлуныс отсаліс меным и водзті, велӧдчигӧн на, отсалӧ и ӧні, уджалігӧн.
Тайӧ опытнас юкся и аслам велӧдчысьяскӧд, – висьталіс Жанна Рахимжановна. – Творчествоӧ менӧ муслун ышӧдӧ – челядьӧс, верӧсӧс, рӧдвуж-ёртъясӧс, ас керка, Чужан му да искусство радейтӧм. Ме век шулывла, мый композитор – тайӧ морт, коді кылӧ сійӧс, мый мукӧдыс оз кывны. Ме кыла ас пытшкысь искусствосӧ, да искусствонас и ола.
«Бабье лето» да «Клин журавлей» сьыланкывъяслы кывъяссӧ гижӧма абу на уналы тӧдса коми поэт Сергей Пономарёв, коді олӧ Сыктывдін районысь Час сиктса Сітбар грездын.
Ӧнӧдз гижӧдъяссӧ йӧзӧдлӧма сӧмын «ВКонтактеын» аслас лист бокын. Эм сэні и рочысь комиӧдӧм уна сьыланкыв.
Гижӧд дасьтігӧн и сыкӧд сёрниті да юалі, мыйсянь заводитчӧма Жанна Габовакӧд сылӧн ёртасьӧмыс.
–Ёртасьӧмным сӧмын на пансьӧ, и миян ставыс на водзын. Ме мӧвпала тадзи: Жанналӧн – мича да долыд шылад, менам – кывбуръяс, ӧтувтам найӧс да, гашкӧ, артмасны выль сьыланкывъяс, – висьталіс Сергей Пономарёв.
Жанна Рахимжановна пӧся аттьӧалӧ Час сиктса клубын сьӧлӧмсяньыс уджалысь войтырӧс.
Юрнуӧдӧ пӧ сэтчӧс творческӧй котырӧн Файруза Доронина, а «Бабье лето» сьылан триоӧн веськӧдлӧ Надежда Болотова.
Культура керкаын пӧ водзмӧстчӧны тшӧтш поэт да «ӧти актёра театрын» ворсысь Галина Степанова, Час сиктын олысьяс Ольга Потолицына, Мария Русанова, менам верӧслӧн Наталья Плоскова чойыс.
–Тайӧ авъя аньясыс и гажӧдӧны сцена вывсянь сиктса олӧмсӧ, и меным мойвиис жӧ некымынысь нимкодясьны наӧн, – висьталіс Жанна Габова. – Матысяньджык тӧдмаси накӧд да, найӧ и вӧзйисны, мед ме грездсаӧн радейтана поэт Сергей Пономарёвлӧн кывбуръяс вылӧ тэчи-лӧсьӧді мича шылада сьыланкывъяс. Медым пӧ коми поэтлӧн сьыланкывъясыс юргисны Москваын да сэсся разалісны страна пасьтала.
Тайӧ сёрниыс ышӧдіс менӧ босьтчыны «Коми му да Москва» выль творческӧй уджтасӧ.
Кор лыдди сиктса поэтлысь кывбуръяссӧ, менӧ нимкодьӧдісны сылӧн гижанногыс, мӧвпъясыс. Сэки жӧ и бӧрйи некымын кывбур да лӧсьӧді на дорӧ шылад.
И веськыда шуа: и чайтны эг куж, мый сьыланкывъяссӧ сэтшӧм вылӧ донъяласны.
Сьӧлӧмсянь сиа творческӧй войтырлы бура да кывкутӧмӧн и водзӧ ёртасьны да шедӧдны гырысь вермӧмъяс.
Прокопий Габов.
<> Снимокъясыс Жанна Габовалӧн гортса архивысь.