Палаззя сиктным абу ыджыд да, тыдалӧ, гырысь вермӧмъяс йылысь висьтасьны он вермы. Но верстьӧ и том век на олам, пыкам ассьыным чужанiннымӧс.
Ошйысьӧмӧнкодь, гашкӧ, лоас, а век жӧ бӧръя кадас Палаззяын дзик дивӧяс мӧдicны вӧчсьыны. Медводз колӧ висьтавны, мый «Народнӧй бюджет» проект весьтӧ кык-куим тӧлысьӧн грымӧбтiм-кыпӧдiм «Они сражались за Родину» мемориал. Веськыда шуа, мый тайӧ уджсӧ вӧчисны том мортлӧн – Виктор Сергамаскинлӧн – мастер киясыс. Зонмыс водз асывсянь сёр рытӧдз уджалic сэні. Колана материалсӧ вайисны да, сiйӧ, ачыс сварщик да, дасьтic-лӧсьӧдic ставсӧ, пелькӧдic гӧгӧрбок. А тавося Май 9 лун кежлӧ сувтӧдiм война вылын тышкасьысьяслӧн ыджыд снимокъяса баннер. Рӧдвужыслы таысь зэв любӧ да нимкодь лоис.
Ми, арлыда йӧз, тшӧкыда волам мемориал дорас, тӧвнас лым весалыштам, а сылас лымйыс да, сиськӧн, дзоридзьясӧн волам копыртчывны Рӧдина дорйысьяслы.
Мӧд дивӧ лоис, кор виччысьтӧг сиктаным помсянь помӧдз куим километр туй асфальтӧн вольсалicны.
Июнь 12 лунӧ чукӧртчылiм шойна вылӧ. Сиктса администрация отсӧгӧн восьтiм пӧв, кӧнi пас-йӧма война вылысь воӧмаяслысь ним-ов. Таӧдз, дерт, эг ӧти во зільӧй, мед тӧдмавны, кодъясӧс дзебӧма сэні война дырйи тышкасьысьяс пиысь. Эз кольччы бокӧ тайӧ уджсьыс и сиктса ветеранъяс сӧвет.
«Народнӧй бюджет» уджтасса грант вылӧ жӧ шойнасӧ кӧрт заборӧн лои потшӧма.
Нӧшта ӧти дивӧ – Палаззяын сувтӧдicны мобильнӧй связь вышка. Ӧні виччысям, кор помаласны уджсӧ. Гашкӧ, сэки и миян связьыд такалас-бурмас, ёна нин дӧзмӧдчис бӧръя каднас да.
Вӧрзис и важ стрӧйбаяс разян удж. Таво тулыс удайтчис – виччысьтӧг кокньыда – важ детсад да вӧвлӧм баракын меститчылӧм школа косявны да мусӧ сэтысь шыльӧдны-мольӧдны. Детсад местаын мӧд во, надейтчам, шойччанін лоӧ лӧсьӧдӧма.
Таӧн дивӧясыд миян эз на помасьны. Бара жӧ «Народнӧй бюджет» отcӧгӧн сиктаным регыд кыптас «Югӧрлӧн» выль вузасянiн.
А неважӧн, видзӧда да, мӧдісны дасьтысьны сикт кузяным би сюръяяс сувтӧдны. Лача кутам, выль воын нин Палаззяын кутас сярвидзны яръюгыд би. Ог нин сорсьӧй ветліг-мунiгӧн.
Со татшӧм выльторъяс лоисны миян сиктын бӧръя кадас, асьным дивуйтчам-шензям. Шондiыс пӧ таво окыштӧма Палаззяӧс, шӧпкӧдчӧны кодсюрӧ. Мед сӧмын эз вомдзась-а!
Но и тайӧ на абу ставыс.
Чуйманныд кӧть он, а ӧти мужичӧй – ачыс олӧ кӧть карын, но вужъясыс Палаззяысь – босьт-чис джуджыд чой йылын Вежа Ен мам вичко дзоньтавны. Мужичӧйыс – Богдан Давидович Ярков.
Медводз вичко сигӧрысь важ пӧвъяссӧ выльясӧн эжис, мед видзны водзӧ киссьӧмысь. А ми – том йӧз и олӧмаяс – отсалiм пытшкӧссӧ пелькӧдны, ёгсӧ весалiм. Мый водзӧ лоас, ог на куж шуны, но сиктсаяс да матысса суседъяс кӧ ӧзъясны тайӧ уджнас, вичкоыс выльмӧдчас-сувтас, кыптас-мичаммас да, кыдзи и войдӧр, восьтас ассьыс ӧдзӧссӧ да корас-чукӧcтас быдӧнӧc Енлы копыртчывны.
А ми, арлыда йӧз, ог жӧ дӧс паччӧр вылын куйлӧй, корсюрӧ и йӧз дорас петавлам. Со «Гажа валяй» вылын, а сідзжӧ Поёл сиктса юралысьӧн котыртӧм творчество конкурсын медводдза местаяс босьтiм, а Леонид Турышев спартакиадаын да беддьӧн скандинав ногӧн ветлӧмын вермысьяс лыдӧ веськаліс. И коми пьесаясӧн сцена вывсянь на петкӧдчам. Май 9 лун водзын ас клубын медводдзаысь ворсім, а сэсся ышмим да Горьковскӧйӧдз ветлiм, да и суседъясӧс – поёлсаӧс да гагшорсаӧс – эг кедзовтӧй, волiм жӧ на дорӧ.
Сьӧлӧмсянь пасйим и Палаззя сиктлысь чужан лун.
Торъя военнӧй операцияын тышкасьысьяслы гуманитарнӧй отсӧг быд тӧлысь чукӧртам, некод оз ӧтдортчы таысь.
Тадзи со и олам-вылам асланым ичӧтик Палаззяын. Но мытшӧдъяс эмӧсь жӧ. Уна во нин сиктаным абу фельдшер, вежоннас ӧтчыд сӧмын Гагшорысь бурдӧдысь волывлӧ. И Визинӧдз ветлыны шог жӧ лолӧ, сэтчӧдз ветымын километр, а сиктса администрациялӧн машинаыс абу.
Людмила Попова, Сыктыв р.
<> Снимокъясыс авторлӧн.