Кольӧм шойччан лунъясӧ республиканымлысь став мичлунсӧ, озырлунсӧ да енбиа войтырсӧ позис аддзывны ӧтилаысь – «Коми ВДНХ»-ысь, коді уджаліс ӧти лун Сыктывкарса «Июнь» вузасян шӧринын.
Мыйыс сӧмын эз вӧв тані! Быд кар-район, ылі Войвывсянь пыді лунвылӧдз, чӧсмӧдліс гӧсьтъясӧс ас быдтас-вӧлӧгаӧн, ас сьыланӧн. А мыйта вӧлӧма киподтуя йӧзыс миян! Синмыд быдсяма кыӧм-вурӧм-вӧчӧмторсьыс чашкаліс! Джодждӧра кыан стансянь кык морт ыджда роботӧдз – ставсӧ позис видзӧдлыны, юасьны, кинад вӧрӧдны, велӧдчыны вӧчны.
Майбыр, некодлы эз вӧв гажтӧм! Ӧти пельӧсын кабалаысь вӧчасьӧны, мӧдын – давленньӧ мерайтӧны, коймӧдлаын – чача бӧрйӧны, нёльӧдлаын – кӧлуй мурталӧны, витӧдлаын – би кусӧдчысьяслӧн мотоцикл вылын снимайтчӧны, квайтӧдлаын – небӧг ньӧбӧны, сизимӧдас – шашки-бильярдӧн ворсӧны, кӧкъямысӧдас – кроликӧн нимкодясьӧны, ӧкмысӧдас – поездӧн рулитӧны, дасӧдас – зиль-зёльӧн ворсӧны…
Ӧтияс пӧтӧны ува-авасьыс да мунӧны, на пыдди локтӧны мӧдъяс. Но вӧліны и сэтшӧмъяс, кодъяс лунтыр мудзтӧг гӧгралісны да шудаа нюмъялісны.
А сьыланкывйыс мыйта юргис – и ывлаас, и шӧринас лӧсьӧдӧм сценаяссянь. И операысь ария, и йӧзкост коми да роч сьылан. Бокисянь кӧ гаж вылас видзӧдлін, позис чайтны, мый тайӧ зі поз жуӧмӧн жуӧ. Ставныс ӧтгудыр: верстьӧ и посни, гырысь чина и сиктысь воӧма.
«Коми йӧзӧдчан керка», дерт, тшӧтш сэн вӧлі. Миян «вежӧсын» позис ньӧбны уна сикас небӧг-открытка, донтӧмысь гижӧдчыны коми газет-журнал вылӧ, кырымавны небӧг Коми Республикаса народнӧй гижысь Елена Габова дорын.
«Йӧлӧга» газетысь мича нывъяс республикаса ГИБДД-ын зільысьяскӧд тшӧтш ворсӧдӧмӧн тӧдмӧдісны туй вывті колана ног ветлӧдлан правилӧӧн, велӧдісны вӧчны коми паса мичмӧдчанторъяс.
«Чушканзі» журналлы отсасьны воліс сылӧн мазі-нывъёртыс, кодкӧд окотапырысь снимайтчис и посни, и верстьӧ. Козинӧн быдӧнлы лоис мича кышӧда петасыс.
Да уна унатор на позис тані вӧчны, велӧдчыны, быдсяма шензьӧданаыскӧд паныдасьлыны ныр на ныр, ставсӧ он и вермы лыддьӧдлыны.
Кыдз шуласны, коді ачыс воліс, тӧдӧ, а кодлы эз мойви сэтчӧ веськавлыны, гӧгӧрвоӧдны, мый сэн збыльвылас вӧчсис-керсис, весьшӧрӧ…
Артмисны выль ёрта йитӧдъяс, чужисны выль мӧвпъяс.
Нимкодь, мый воысь-во «Коми ВДНХ» паськалӧ, сӧвмӧ, мичаммӧ, сетӧ выль позянлунъяс и асьтӧ петкӧдлыны, и мукӧдсӧ видзӧдлыны.