Август 20 лунӧ Коми Республикаса юралысь Сергей Гапликов воліс «Сосногорскӧй» овмӧсӧ, кӧні эштӧдӧмаӧсь теплицаяса комплекс стрӧитан удж. Овмӧсас кутас уджавны 250 морт, быдтӧмторсӧ мӧдасны вузавны республикаын и мукӧд регионын.
–Агропарк петкӧдлас, мый и Ылі Войвылын позьӧ быдтыны бур прӧдукция, – пасйис Сергей Гапликов. – Аттьӧала стрӧительясӧс, кодъяс республикалӧн чужан лун водзвылын вӧчисны ыджыд козин эз сӧмын Сосногорск районлы, но и ставнас Комилы.
Выль предприятиеын кутасны вӧдитчыны Ultra Clima оборудованиеӧн да технологияӧн. На отсӧгӧн позяс вобыд кутны колана микроклимат, видзны быд-мӧгъяссӧ гут-гагйысь.
Помидор-ӧгуречлысь рӧсадасӧ комплексын быдтӧны март помсянь нин. Урожайсӧ таво кӧсйӧны босьтны 3.500 тонна. 2021 во кежлӧ предприятиеыс воӧдчас урчитӧм вынйӧрӧдз да, вонас кутасны быдтыны 10 сюрс тонна град выв пуктас.
* * *
Ухтаын Газӧвикъяслысь набережнӧй пелькӧдӧм-мичмӧдӧм вылӧ вӧлі торйӧдӧма 450 миллион шайт. Содтӧд 100 миллион сетісны грант серти. Чибъюлӧн ӧтар берегас матӧ кык километр нюжӧдчас парк, мӧдлапӧлас олысьяс паркӧ веськаласны подӧн ветлысьяслы посъяс кузя. Парк джынсӧ шуӧма эштӧдны тавося сентябрӧдз нин.
Кольӧм воторникӧ вӧчӧм уджсӧ донъявны волісны Коми Республикаса юралысь Сергей Гапликов да «Газпром трансгаз Ухта» компанияса генеральнӧй директор Александр Гайворонский.
–Ухтаса уна во виччысисны Чибъю бокса набережнӧй пелькӧдӧмсӧ, и налӧн кӧсйӧмыс ӧні збыльмӧ, – висьталіс Сергей Гапликов.
А Александр Гайворонский пасйис, мый Газӧвикъяслӧн набережнӧйыс – «Газпром» акционер котырсянь республикалӧн 100 да Ухталӧн 90 вося юбилейяс кежлӧ козин.
* * *
Сергей Гапликов чолӧмаліс ухтасаӧс карлы 90 во тырӧмӧн.
–Республика сӧвмӧмын Ухталӧн пайыс зэв тӧдчана, ӧд ӧкмысдас во сайын буретш тані вӧлі пуктӧма регионын мусир да биару перъян промышленносьтлы подувсӧ. Ӧні Ухта водзӧ мичаммӧ, паськалӧ, и водзмӧстчӧны таын карӧн веськӧдлысьяс, предприятиеяс да карын олысьяс, – пасйис Сергей Гапликов юбилейлы сиӧм чукӧртчылӧм дырйи.
Сійӧ сетіс Коми Республикаса Почёт грамотаяс Ухтаса администрацияӧн веськӧдлысьӧс первой вежысь Пётр Артемьевлы, УГТУ-са мусир да биару институтӧн юрнуӧдысь Григорий Грибовлы да Ухтаса аэропортысь диспетчер Людмила Стариковалы.
Ухтасалы юбилей кузя козинӧн лоис и «Хор Турецкого» котырлӧн концертыс.
* * *
Ухтаса 1-ӧд номера лицейын воссис «Помним. Гордимся. Славим» музей. Сійӧ тӧдмӧдӧ карын велӧдан юкӧн сӧвмӧмӧн.
Музейын петкӧдлӧма снимокъяс, небӧгъяс, пионеръяслысь да комсомолечьяслысь паськӧм-эмбур. Чукӧртӧмаӧсь и велӧдысьяслысь да велӧдчысьяслысь казьтылӧмъяс.
Музейсӧ восьтігӧн Сергей Гапликов сетіс аттьӧалана гижӧд Людмила Цивилёвалы, коді кызьысь унджык во уджалӧма лицеяс да пуктӧма ыджыд пай том войтырӧс быдтӧм-велӧдӧмӧ.
* * *
Ухтаын выльмӧдасны челядьлысь парк да Г.А.Карчевский нима творчество шӧрин. Ӧні дасьтӧны проектсӧ да мукӧд колана документ. Став уджыс сувтас 500 миллион шайт дон, 198,2 миллионсӧ вичмӧдӧма нин таво.
Сергей Гапликов воліс видзӧдлыны парксӧ. Ӧні челядьлӧн шойччаніныс эндӧма, а творчество шӧринысь спорт да концертасян залъясыс, планетарийыс ёна нин важмӧмаӧсь.
Парксӧ да шӧринсӧ дзоньталӧм-выльмӧдӧм йылысь сёрнитчӧм кырымаласны «Газпром трансгаз Ухта», республикаса правительство да Ухтаса администрация.
* * *
Сергей Гапликов видзӧдліс, кыдзи Ухтаын асфальтӧн вевттьӧны туйяс да пелькӧдӧны керка йӧръяс.
Ухтаын чорыд веркӧсаӧн 60 сюрс квадратнӧй метр улича-туй вӧчӧм могысь таво торйӧдӧмаӧсь 116 миллион шайт. Уджсӧ нуӧдӧны Первомай да Комсомол изэрдъясын, Шахтинскӧй уличабокса тротуарын, Газӧвикъяслӧн набережнӧйын, а сідзжӧ Ярегаса культура керкадорса изэрдын.
* * *
Ухта, Сосногорск да Изьва районъясті нюжӧдчӧма Том–Керки туй. Гожӧмбыд зэрис, юяс-ёльяс ойдісны, и туйыс жугаліс, посъяс киссисны.
Туйсӧ дзоньталӧм могысь республикаса правительстволӧн торъя фондысь вичмӧдісны 18 миллион шайт.
Изьва районса администрацияӧн веськӧдлысь Любовь Терентьевалӧн кывъяс серти, Том посёлокӧдз позьӧ воӧдчыны сӧмын ва туйӧд. Сёян-юансӧ сэтчӧ пыжӧн жӧ вайӧны. Но посёлокысь оз вермыны петны висьысьяс, челядя аньяс, да та вӧсна пӧ районын зэв ёна виччысьӧны, кор нин дзоньталасны туйсӧ.