Коми Республикаса вужвойтырлӧн шылада-драмаа театр выль 34-ӧд театральнӧй сезонсӧ восьтас Александр Вампиловлӧн «Колян гожӧм Чулимскын» драмаӧн.
Нималана роч драматурглӧн пьесаыс медводдзаысь юргас комиӧн. Премьераыс лоас йирым 2 да 4 лунъясӧ юркарын Бабушкин уличаса 4-ӧд керкаын театр залын.
Медводдзаысь Комиын режиссёралӧ Владимир Анатольевич Сажин — сӧветскӧй да Россияса театръясын да киноын ворсысь, режиссёр, велӧдысь, Щукин нима театральнӧй институтын актёрлӧн мастерство кафедраса доцент, МХАТ школа-студияын актёрлысь пластика велӧдан кафедраса профессор.
Сійӧ уджавліс пластика кузя режиссёрӧн Москваса театръясын, Ярославльын, Белгородын, Пензаын, Ногинскын. Пуктыліс спектакльяс Боснияын да Герцеговинаын, нуӧдліс сценическӧй движениеысь мастер-классъяс Испанияын, Великобританияын, США-ын.
Коми театрса артистъяскӧд Владимир Анатольевич важӧн нин тӧдса: сійӧ вӧлі Щукин нима театральнӧй институтын коми группалӧн художествоа веськӧдлысьӧн. Сэтысь том йӧз помалісны велӧдчӧмсӧ 2017 воын, на лыдын Валериан Канев, Роман Поличенко, Ангелина да Тимур Смирновъяс, Данил Чудов. Велӧдліс и 2022 да 2023 воясся выпускникъясӧс (Антон Куратов, Никита Дербин, Дарья Рябцева, Анастасия Казакова, Ирина Засухина).
«Колян гожӧм Чулимскын» спектакльсӧ серпасаліс Ольга Журкова. Ольга Алексеевна помаліс А.П.Чехов нима МХАТ бердын Вл.И.Немирович-Данченко нима школа-студия (ВУЗ) (сценография факультет, С.Бенедиктовлысь мастерскӧй). Стажируйтчис РАХ Творческӧй мастерскӧйясын Б.Мессерерлӧн веськӧдлӧм улын. Велӧдӧ МХАТ школа-студияын (сценография да театральнӧй технология факультет).
Нӧшта велӧдӧ челядьӧс серпасасьны. Вӧчис спектакльяслы сценография Екатеринбургса опера да балет театрлы, Драматургия да режиссура шӧринлы, Россияса Большой, Нацияяс да мукӧд театрлы.
Тадз театр тӧдмӧдӧ коми видзӧдысьӧс Россияса нималана творческӧй йӧзкӧд.
Та дырйи театр вӧдитчӧ, кыдз и пыр, коми кывйӧн, мый висьталӧ кывнымлӧн ӧнія кадлы да унаторйӧ лӧсялӧм йылысь.
Мый жӧ лои колян гожӧм Чулимскын? И кӧні сійӧ Чулимскыс? Неыджыд посёлокын сук парма шӧрын кӧнкӧ Сибырын, али Комиын олӧны сэтшӧм жӧ йӧз, и быдӧнлӧн аслас сям, дум-кӧсйӧм, олан туй, видзӧдлас.
Найӧс ӧтувтӧ ӧтитор — быдӧнлы колӧ муслун… Но быд герой радейтӧмсӧ гӧгӧрвоӧ ас ногыс да корсьӧ-судзӧдӧ сійӧс, кыдзи кужӧ, и та могысь оз век мун веськыд туйӧд…
Нималана роч драматург Александр Вампиловлӧн пьесаысь геройяс Валентина, Шаманов, Дергачёв, Еремеев да мукӧд медводдзаысь кутасны сёрнитны комиӧн.
* * *
Пьесасӧ комиӧдіс Ольга Баженова. Спектакльын петкӧдчӧны Дарья Рябцева, Никита Дербин, Анастасия Казакова, Александр Ветошкин, Альбина Карманова, Елена Чувьюрова, Владимир Уляшев, Данил Чудов, Илья Карманов, Андрей Засухин.
Видза корам Коми театрӧ премьера вылӧ!
<> Евгения Савина. Снимокъясыс Коми Республикаса вужвойтырлӧн шылада-драмаа театрысь.