Комиын йӧзлысь дзоньвидзалун видзан министерствоысь юӧр серти, миян республикаын таво арнас да тӧвнас вермас паськавны A, B да H1N1 штаммъяса грипп.
Тайӧ сьӧкыд висьӧмсьыс видзчысьӧм-дорйысьӧм могысь поликлиника-больничаясын тырмымӧн дасьтӧма челядьлы да верстьӧлы «Ультрикс Квадри», «Совигрипп», а сідзжӧ «Флю-М» вакцина.
Гриппысь прививка вӧчавны шуӧма Россия Федерацияын вынсьӧдӧм Национальнӧй календар серти, да уколасьнысӧ позьӧ мынтысьтӧг.
Тайӧ пӧрӧссьыс медвойдӧр колӧ видзчысьны налы, кодъяслы сійӧ вермас торйӧн нин чорыда мӧрччыны: на лыдын квайт тӧлыссянь дзолюкъяс, томулов, ыджыд арлыда йӧз, нӧбасьысь аньяс, диабетӧн, сьӧлӧмсӧн да ӧткымын мукӧд сьӧкыд висьӧмӧн нёрпалысьяс.
Квайт тӧлыссянь куим арӧсӧдз челядьлы прививкасӧ колӧ вӧчны тӧлысь косталӧмӧн кыкысь, гырысьджык арлыдалы – ӧтчыд.
Гриппысь уколасьнысӧ быть колӧ медицинаын, школа-детсадйын да мукӧд велӧдан учреждениеын, транспорт юкӧнын да йӧзӧс быдсикас услугаӧн могмӧдан организация-котырын уджалысьяслы.
Республикаса бурдӧдчанінъясӧ позьӧ нин шыӧдчывны та могысь.
Медикъяс эскӧдӧны, мый медся бур уколасьны сентябрь-октябрын, медым пӧрӧс паськавтӧдзыс кык-нёль вежонӧн водзджык вакцинаыс вермис нин босьтчыныотсавны водзсасьны гриппыслы паныд.
Таво шуӧма вакцинируйтны Комиын 432.360 олысьӧс, на лыдын 102.200 челядьӧс.
Тайӧ отсалас тӧдчымӧн чинтыны регионын гриппӧн висьысьсӧ.
<> Елена ОСИПОВА. Снимокыс ӧтуввезйысь.