Комиын спецоперацияын служитысьяслӧн семьяяслы государствосянь вичмӧ чорыд ломтас ньӧбӧм могысь сьӧма отсӧг. Вонас ӧтчыд урчитӧма сетны миян республика войвылын олысьяслы – 4.332, а лунвыв районъясын – 3.625 шайт.
Регионса удж, занятосьт да йӧзӧс социальнӧя доръян министерствоысь юӧр серти, таво заводитчӧмсянь Комиын татшӧм сьӧма отсӧгсӧ босьтӧмаӧсь спецоперацияын тышкасьысьяслӧн 606 матысса рӧдвуж.
Та дырйи тӧдчана, медым СВО-ын служитысь да сылӧн матыссаясыс олісны ӧтлаын, стӧчджыка кӧ, мед вӧлі найӧ регистрируйтчӧмаӧсь ӧти адрес серти.
Чорыд ломтас ньӧбӧм вылӧ сьӧма отсӧг босьтӧм могысь колӧ декабрь 25 лунӧдз гижны кар-районын йӧзӧс социальнӧя доръян шӧринӧ шыӧдчӧм, сэтчӧ волігӧн сьӧрысь босьтлыны паспорт, вайны рӧдвуж йитӧд кузя, а сідзжӧ оланін шонтӧм могысь пескӧн да мукӧд сикас чорыд ломтасӧн вӧдитчӧм йылысь кабала-документ.
* * *
Медым спецоперацияын служитысь-тышкасьысьяслы да налӧн семьяяслы социальнӧй отсӧг сетӧмкӧд йитӧдын эз вӧв некутшӧм мытшӧд-падмӧг, став юалӧмсӧ кутӧ син улас регионса юралысьлысь удж вӧчысь Ростислав Гольдштейн.
<> Анна Попова. Снимокыс ӧтуввезйысь.