Матӧ во «Войвыв кодзув» журналын шӧр редакторалӧ коми гижысь, вуджӧдчысь Нина Александровна Обрезкова. Сійӧ бура тӧдӧ талунъя литература, уджалӧ быдсикас жанрын: гижӧ кывбур, висьт, пьеса. Та кындзи енбиа ань азыма кутчысьӧ и общественнӧй уджӧ. Сійӧ водзмӧстчӧ «Коми войтыр» дінмукостса ӧтйӧза ӧтмунӧмлӧн Сыктывкарса юкӧнын. Нина Александровна юрнуӧдӧм улын чужӧны выль литература проектъяс, шуам, асшӧра гижысьяс костын «Ас йӧз» конкурс. Таво вермасьӧмыс мунас мӧдысь. Уна уджтас йитчӧма и чужан Удора районкӧд. Гижысь ловнас век аслас муса Мозын юкӧд.
Таво Нина Александровна пасйис 60 вося юбилей. Такӧд йитӧдын корим уджъёртӧс висьтасьны творчество йывсьыс да юксьыны выль кывбуръясӧн.
Нина Александровна Обрезкова чужис Удора районса Слӧбӧда сиктын.
Коми Республикаса нимӧдана уджалысь.
Велӧдчис Сыктывкарса канму университетын,
босьтіс коми да роч филолог специальносьт.
Уджавліс газет-журналъясын, университетын,
финн-йӧгра культура шӧринын.
Ӧні «Войвыв кодзув» журналса шӧр редактор.
Гижӧ кывбуръяс, висьтъяс да пьесаяс.
Вуджӧдчӧ. Сыктывкарса канму университетысь коми кафедраса студентъяс
Богдан Дёмин, Никита Филиппов, Юлиана Канева, Элина Шлопова,
Дарья Волкова, Мария Сметанина да Аркадий Рочев дасьтісны
Нина Александровналы гижан уджкӧд да сьӧлӧмкылӧмкӧд йитчӧм юалӧмъяс.
–Кор ті заводитінныд гижны?
–Гижны ме заводиті сёр. Колӧкӧ, некор эг и босьтчы, либӧ заводиті нӧшта на сёрджык, эг кӧ веськав гижысь-мӧвпалысь студент-филологъяс пӧвстӧ. Колӧ шуны, сійӧ кадас универ- ситетын уна вӧлі татшӧм йӧзыс – мӧвпавны вӧлі моднӧ сійӧ кадас, гашкӧ. Гижысьяс пӧвстын торйӧн нин уна вӧлі зонмыс – налӧн дзонь ПИТОН вӧлі. Евгений Козлов, Олег Уляшев, Павел Лимеров, Александр Чувьюров…
Тайӧ коми зонъяс. Дерт, роч ёртыс эз жӧ этша вӧв…
Нывъясӧс сэтчӧ эз, буракӧ, лэдзлыны, ме тай ни ӧтчыд эг веськавлы, но кывсис, дерт, ылӧдз. И ӧні, кор ме аддза коми кафедраын велӧдчысь зонъясӧс, сьӧлӧм вылын зэв шоныд овлӧ. И чайтсьӧ, мый и тайӧ зонуловыс коркӧ кутасны нимӧдны коми литература да культура…
–Кыдзи вӧлі видзӧдӧны гижӧм выланыд матысса йӧз?
–Мамлы любӧ вӧлі, помнита. Да сійӧ вӧлі шуӧ нӧшта, мый ачыс творческӧй морт, эн ӧд пӧ кытыськӧ бокысь чуж татшӧмнас…
Сиктсаяс кутшӧмкӧ кадӧ кутісны то ли шмоньсорӧн, то ли збыль корны гижны мыйкӧ. Мыйкӧ лёктор паметьӧй оз кут, сідзкӧ, ставыс бур.
Да и веськыда кӧ шуны, гижысь морттӧ сиктад пыдди пуктӧны.
–Эмӧсь-ӧ студент кад йылысь гижӧдъяс?
–Эмӧсь студенталан кадӧ гижлӧм кывбуръяс, тшук гижны заводитігас велӧдчи Сыктывкарса университетын. Первой кывбуръясыс сэкся кадысь – бур, югыд, медводдза любов кадысь…
–Тіян гижӧдъясысь кутшӧмӧн медъёна гӧрдитчанныд? Мыйла? И уна-ӧ кад ті видзинныд сійӧс лӧсьӧдӧм вылӧ?
–Ме эськӧ эг сёрнит гӧрдитчӧм йылысь, но, дерт, нимкодь, мый важӧнкодь нин гижӧм кывбуръяс олӧны, кутшӧмсюрӧӧс весиг пыртӧма школаын велӧдан коми литература небӧгъясӧ. Помнитсьӧны ыджыд коми гижысьясӧн шуӧм кывъяс.
–Кутшӧм кадӧ ті гижанныд? Эм-ӧ кутшӧмкӧ церемония, коді отсалӧ лӧсьӧдчыны?
–Пасйыны кутшӧмкӧ кад, мый сӧмын сэки гижа, ог вермы. Кор пытшкын мыйкӧ вӧрзяс, сэки и «к листу»: ноутбук, бумага, телефон дорӧ.
Торйӧн позьӧ висьтавны редактура йылысь: ӧні со ковмис вежлавны пьеса, да сійӧ юрад пыр «пукалӧ»: воас кутшӧмкӧ мӧвп – уськӧдчан пасйыны…
Церемония кузя – торъя паськӧм ли парик абу, джодж ог жӧ мыськав гижӧм водзас, а, колӧкӧ, и колӧ. Сӧмын чай меным колӧ, пӧсь да юмов…
–Кыдзи венанныд «литературнӧй кризисдырся» сьӧкыдлунъяссӧ? Овлывлісны сэтшӧм здукъяс, кор ньӧти строчка эз артмыв гижны?
–Ме ог пасъяв некытчӧ, мый талун луныс коли строчкатӧг. Коли, и Енлы-Господьлы. Колӧкӧ, тайӧ лунся мӧвпыс коркӧ мӧдысь сетас бур петас.
–Збыль-ӧ колӧ пырны кутшӧмкӧ, рочӧн кӧ, эмоциональнӧй состояниеӧ, медым чужисны кывбуръяс? Али найӧс бурджык гижны вежӧрӧн, ас садьӧн?
–Ме некор тӧдӧмӧн некутшӧм состояниеӧ ог пырӧдчы. Овлӧ, дерт, кутшӧмкӧ лоӧмтор ёна шызьӧдас, и сэки, кодыр он гиж та йылысь, он вермы лӧньӧдчыны. А сідз, дерт, колӧ гижны ясыд юрӧн.
–Коркӧ чайтлінныд-ӧ, мый лоанныд гижысьӧн?
–Челядьдырйи радейтлі гижны сочинениеяс, но, дерт, эг чайтлы, мый тайӧ и эм гижан уджыс.
А збыль, школаад сочинениетӧ гижны меным ёна кажитчис изложение гижӧм дорысь, ог нин сёрнит диктант йылысь.
Коркӧ гижи сочинение, гожӧм коллялӧм йылысь, да мый сӧмын ме эг пырт сэтчӧ – весиг быттьӧ циркӧ ветлі, и ставсӧ ветлӧм йывсьыс гижи-думышті.
Классыс, дерт, ньӧти меным эз эскы, шуалісны, ылӧдлӧма пӧ ставсӧ, некытчӧ сійӧ эз ветлы. А ме пукалі да ёна и чуймалі – тайӧ жӧ, мися, сочинение… «Сочинять» кывйысь…
Ӧти кывйӧн, первой блиныс лои сэки эз тырвыйӧ бур пӧжасӧн, и «критика» эз ошкы сійӧс.
–Роч али коми литература ёнджыка ышӧдіс тіянӧс босьтчыны гижны?
–Коми литература. Кӧть колӧ шуны, мый школаын миян коми литература велӧдӧмыс вӧлі зэв ылӧсас.
Позьӧ шуны, коми литератураӧн тӧдмасьӧмыс лои тырвыйӧ бура сӧмын университетын велӧдчигӧн, а колӧкӧ, нӧшта на бурджыка, вылысджык тшупӧдын, университетын уджалігӧн, кор студентъяскӧд ӧттшӧтш нин видлалім-туялім коми литература гижӧдъяс.
–Эм-ӧ ыджыд удж, мый вылын ӧні уджаланныд?
–Эм компьютерын панӧм кык пьеса…
Пьесаыд меным пыр ыджыд удж. Тані он дзебсьы кутшӧмкӧ ассоциация, метафора да кывбурлӧн мукӧд гусятор сайӧ, он пыр подтекст пытшкӧ.
Пьесаын геройяслӧн став действиелы колӧ корсьны стӧч вочавидзӧм – мыйла?
И тайӧ «мыйлаасьӧмыс» тэнӧ вермас вайӧдны код тӧдас кытчӧ…
–Кутшӧм том гижысьясӧс верманныд торйӧдны?
–Том гижысьыс миян ставыс син улын, кыдз шуласны. Абу тай ёна уна. Ставӧн ас местаас интереснӧй йӧз, разнӧйӧсь, гижны кӧсйысьяс. Ставлы сиа не кӧдзӧдчыны гижан уджысь да помся велӧдчыны сыӧ. Виччыся выль гижӧдъяс Настя Лосевасянь, Элина Шлоповасянь, Даша Волковасянь… И быть коми гижӧдъяс…
–Кутшӧм сьыланкывъяс радейтанныд кывзыны? Йӧзкостса либӧ ӧнія кадся?
–Мыйла? Сьыланкывтӧ радейта быдсямасӧ. Но пельӧ наушник некор ог сюй-пысав. Сьыланкыв кывзӧмыс-сьылӧмыс – торъя удж, коркӧ йӧзкостса, коркӧ ӧнія, коркӧ том кадся хитъяс кывза.
–Эм-ӧ тіян хобби да мый сійӧ сетӧ?
–Хоббиыс быд кадӧ разнӧй. Коркӧ чери кыя, коркӧ кепысь-носки кыа, коркӧ лыжиӧн ислася, а коркӧ и диван вылын сериал видзӧда.
–Мый тіянлы вайӧ, рочӧн кӧ, вдохновение?
–«Вдохновение» кывйыс «лолыштӧм» кывйысь кӧ – «вдох»-новение, то тайӧ ставыс, мый другысь вежӧ пырся лолалӧмтӧ – лолыд качӧ енэжас ли тасасьӧ горшад – мый вӧрзьӧдӧ тэнӧ олігад, сійӧ и эм вдохновениеыс.
–Шуӧны, мый збыль искусство чужӧ авторлӧн шудтӧмлун пыр. Тіян серти, лӧсялӧ-ӧ ӧнія творчестволы татшӧм донъялӧмыс? Оз кӧ, мый пыр либӧ кыдзи чужӧ XXI нэмын искусство?
–Творчество туялысь психологъяслӧн эм, кӧнкӧ, уна теория, мыйла мортыс босьтчӧ творитны ли вытворяйтны.
И шудтӧмлун йылысь сэні, тӧдӧмысь, тшӧтш эмӧсь мӧвпъяс. Чайта, мортӧн чужтӧм искусство чужӧ сэк, кор мортыслы мыйкӧ оз тырмы, и сійӧ заводитӧ тыртны кушинсӧ…
Сьӧлӧм восьтӧмӧн, мӧвпалӧмӧн. Тайӧ вермӧ лоны и шуда здукъясӧ тшӧтш, кор ылькйӧ радлуныс и пӧртсьӧ кывъясӧ, шыясӧ, рӧмъясӧ…
Збыльвылас тайӧ зэв паськыд тема, и дзоляник интервьюын та йылысь сьӧкыд сёрнитны стӧча…
Неважӧн меным первойысь ыстісны вуджӧдны коми кывйӧ искусственнӧй интеллектӧн гижӧм кывбур.
Быттьӧ сійӧ нинӧмӧн оз торъяв мортӧн гижӧмысь, но тӧдчӧ, мый гижӧма абу ёна кужысь морт – кор тай образъясыс быттьӧ разнӧйлаысь, ӧта-мӧд костас оз лӧсявны и ӧтувъя серпассӧ оз арт-мӧдны. Ог тӧд, эм-ӧ комиӧ кывбур вуджӧдан машина… Ме тай эг босьтчы-а.
–Кодлы медводз лыддянныд выльӧн чужӧм кывбуртӧ?
–Гижа ме комиӧн, а медся уна коми войтыр-ёртыс ӧні менам «ВКонтактеын», сэтчӧ и пуктывла кывбуръясӧс. Но, дерт, ог жӧ ставсӧ…
Видзӧда, мый гижасны комментарийясас…
–Кывбуръяс гижигӧн кутшӧм сьӧлӧмкылӧмъяс чужӧны тіян медтшӧ-кыда?
–Нор сьӧлӧмкылӧмъяс. Колӧкӧ, сы вӧсна, мый кывбурсӧ гижтӧдзыс на гӧгӧрвоан, мый и тайӧ здукыс кольӧ нин…
Но эм ӧти абу нор здук. Кор ачым лыддя важӧнкодь нин гижлӧм нор кывбуръяс, ӧні меным найӧ оз нин чайтсьыны вывті норӧн…
<> Алёна Нестерова.
Снимокыс Коми Республикаса Национальнӧй библиотека сайтысь.