Бӧрйысигӧн Россияса ӧткымын регионын 2019 восянь нин гортсьыд петавтӧг гӧлӧсуйтны позис – сідз шусяна дистанционнӧй электроннӧй гӧлӧсование (ДЭГ) отсӧгӧн. Комиын медводдзаысь тадзи позис вӧчны Ухтаын, Изьва да Княжпогост районъясын кольӧмвося бӧрйысьӧмъяс дырйи. А тавося сентябрь 12, 13 да 14 лунъясӧ татшӧм позянлуныс лоас республикаын быд олысьлӧн.
–Сентябрын ми кутам бӧрйыны Коми Республикаса юралысьӧс, Госсӧветӧ, кызвын кар-районса сӧветъясӧ депутатъясӧс, а сідзжӧ сикт-посёлокӧн кык юрнуӧдысьӧс да овмӧдчӧминъясса сӧветъясӧ 399 депутатӧс, – висьталіс республикаса бӧрйысян комиссияӧн веськӧдлысь Дмитрий Митюшев.
Медым йӧзыслы кивывджык вӧлі пырӧдчыны регионса политическӧй олӧмӧ, и вӧлі лӧсьӧдӧма ДЭГ тэчассӧ. Онлайн-гӧлӧсуйтӧм могысь колӧны ӧтуввез, мобильнӧй телефон либӧ компьютер да «Госуслуги» порталын пасйысьӧм. Кӧні ӧтуввезйыс абу на, сэні гӧлӧстӧ водзын моз позяс сетны участкӧвӧй комиссияӧ волӧмӧн либӧ бӧрйысян комиссияӧ пырысьясӧс гортад корлӧмӧн. Республика пасьталаын кутас уджавны матӧ квайтсё комиссия.
ДЭГ отсӧгӧн гӧлӧсуйтӧм могысь июль 28 лунсянь сентябрь 8 лунся 23 час 59 минутӧдз колӧ шыӧдчыны «Госуслуги» порталса асланыд кабинет пыр. Шыӧдчӧм бӧрас воас СМС-юӧр, мый мортсӧ пасйӧма бӧрйысьысьяс лыдӧ. Та бӧрын электроннӧй бюллетеньын кандидат вӧсна гӧлӧс позяс сетны сентябрь 12 лунся 8 час асывсянь сентябрь 14 лунся кӧкъямыс час рытӧдз – лунын кӧть войын – vybory.gov.ru сайтын.
Бӧрйысьысь кӧ вежас электроннӧя гӧлӧсуйтӧм кузя мӧвпсӧ, сентябрь 8 лунся 23 час 59 минутӧдз бӧр вермас бергӧдны ассьыс шыӧдчӧмсӧ да сентябрь 14 лунӧ ветлыны участкӧвӧй бӧрйысян комиссияӧ да сэні сетны гӧлӧссӧ. Но ас кадӧ кӧ шыӧдчӧмсӧ абу вӧлі бергӧдӧма, сэки сӧмын ДЭГ-ӧн ковмас вӧдитчыны – тадзи вӧчӧма сы могысь, медым ӧти морт кыкысь эз гӧлӧсуйт. Та вӧсна жӧ компьютерыс кӧ «ӧшйыліс», ковмас виччысьыштны, кор сійӧ бӧр заводитас уджавны, мӧд компьютерсянь гӧлӧсуйтны оз нин позь.
Гӧлӧсуйтӧм бӧрын бӧрйысьысьлы воас юӧр: «Ті гӧлӧсуйтінныд. Аттьӧ дистанционнӧй электроннӧй гӧлӧсованиеӧ пырӧдчӧмысь».
Сентябрнас унаӧн керӧны картупель, град выв пуктас, ветлӧны вотчыны, вӧравны, чери кыйны, отпускалӧны республикаысь бокын. Медвойдӧр налы кивыв дистанционнӧй электроннӧй гӧлӧсованиеыс: кытчӧ кӧть эн мун – бӧрйысян бюллетеньыд век ки улад.
<> Гижӧдсӧ дасьтіс Павел СИМПЕЛЕВ.