Наркотиклы паныд водзсасян тэчасъяс быд во донъялӧны, кыдзи тайӧ уджсӧ бергӧдӧны регионъясын. Сідз шусяна мониторинг дырйи тӧд вылӧ босьтӧны, кымын мортӧс наркотикӧн вӧдитчӧмкӧд йитӧдын кыскисны административнӧй либӧ уголовнӧй кывкутӧмӧ, пуксьӧдісны сутшкасьысь сутуга сайӧ, унаӧн-ӧ нарколог син улын, кымынӧн пагалісны, кувсисны та помысь, с.в.
Та бӧрын вӧчӧны кывкӧртӧд, кутшӧм миян серпасыс: нейтральнӧй, напряжённӧй, предкризиснӧй либӧ кризиснӧй.
Коми Республикаын пӧ серпасыс нейтральнӧй. Стӧчджык лыдпасъяс вайӧдісны республикаса юралысьлӧн Общественнӧй приёмнӧйын.
Коми Республикаса наркодиспансерысь главнӧй врач Светлана Свиридова:
–Мӧйму республикаын вӧлі наркоман диагноза 1.234 висьысь. Тайӧ курыд зелляӧн да быдсикас дурмӧдчанторйӧн дикмӧдчысьысь 11,6 прӧчент. Воддза во серти налӧн лыдыс содӧма 3,6 прӧчент.
Россияын да Рытыв-Войвыв федеральнӧй кытшын серти Комиын наркоманыс 21,8 да 12,7 прӧчентӧн этшаджык.
Коймӧд пайыс уколасьӧ, а мукӧдыс – лолалӧны-шпуткӧны либӧ исалӧны наркотиксӧ.
Кольӧм во медводдзаысь видлӧма наркотиксӧ 69 морт, 2023-ӧдын татшӧмыс вӧлӧма нёль прӧчентӧн унджык, а 68-ӧн оз нин вермыны овны тайӧ лёк сорастӧгыс (воддза воын серти содӧма 10,6 прӧчент).
Медосвидетельствование вылӧ нарколог дорӧ полицияӧн вайӧдӧм гажа юра войтырысь 3,4 прӧчентыс, 277 морт, дикмӧма наркотик помысь.
Быдсикас психотропнӧй сорасӧн дурмӧдчӧмысь 2024 воын пагалӧма 34 морт, на лыдысь 22-ыс – кувтӧдзыс. Мӧйму пагалӧма 26 да кувсьӧма 21. Тшӧкыдджыка кувтӧдзыс пагалӧны опиум сяма метадонӧн. Этшаджыкӧн мунӧмаӧсь мӧдаръюгыдас синтетика сорас помысь.
Наркотикысь медся сӧстӧм Изьва район. Кольӧм во сэтысь ни ӧти морт абу веськалӧма полиция да нарколог син улӧ. Татшӧм зеллянас дурысьыс абу уна Койгорт, Кӧрткерӧс, Луздор, Емдін да Кулӧмдін районъясын. Медсясӧ наркоманыс содӧ Сыктывкар, Воркута, Ухта да Усинск каръясын, а сідзжӧ Сыктывдін районын.
Медсясӧ наркотикӧн дурмӧдчӧны 12-18 арӧсаяс. Но син улӧ веськавлісны и 9-11 арӧса ныв-зон. 21 арӧс бӧрын лыдаяс нин сетчӧны тайӧ лёкас.
Талун нарколог син улын ӧти тыр арлыдтӧм Сосногорск районын, кыкӧн – Ухтаын. Нӧшта врачьяс видзӧдӧны 17 ныв-зон бӧрся, кодъяс коркӧ видлӧмаӧсь кутшӧмкӧ наркотик.
Республикаын наркоманъяслы висьӧмсьыс мынтӧдчыны отсалӧны Сыктывкарса наркодиспансерын (тані лӧсьӧдӧма 15 койка), Ухтаса психбольничаын, Воркутаса психоневрология да Печораса больничаясын. Врач-психиатръяс эмӧсь и райбольничаясын. Кок йылас висьысьсӧ сувтӧдӧны стационарын и амбулаторнӧя.
Татшӧм учреждениеас медводз вӧчӧны дезинтоксикация (пальӧдӧны наркотикысь да психотропнӧй сорасысь дикмӧм мортсӧ). Сэсся лекарство отсӧгӧн врач реабилитируйтӧ, и та бӧрын нин висьысьлы позьӧ шыӧдчыны социальнӧй реабилитацияла.
Миян регионын 38,4 прӧчентыс дурмӧдчӧ опиода сорасӧн. Но бӧръя вит вонас наркоманъяс вуджисны химия сорас вылӧ.
Опиум сяма метадон, героин, дезоморфин да мукӧд сорас бӧрын дикмӧм морт вермас лоны ньӧжмыд вӧраса, унзіль, весиг воштылӧ садьсӧ, сылы сьӧкыд лолавны, вейясыс «ныжмӧны». Мефедрон да синтетика бӧрын мортыс, мӧдарӧ, аддзӧ абутӧмсӧ, мый вылӧ кӧ вывті ыззьӧ-ышмӧ. Татшӧмсӧ юӧм, куритӧм да сӧнӧ сюйӧм бӧрын мортыслы мыйыс сӧмын оз петкӧдчы. Уналы кажитчӧ, мый сійӧс кодкӧ вӧтӧдӧ. Но помыс ставныслӧн ӧткодь. Тайӧ зэв вына лекарствояс. Уна кӧ юан, вермас сувтны сьӧлӧмыд, лоас сьӧкыд лолавны.
2016 воын миян регионса удж, занятосьт да йӧзӧс социальнӧя доръян министерство вынсьӧдіс наркотик помысь висьмӧмалы отсӧг сетӧм йылысь индӧд. Сы серти наркоман либӧ сылӧн матыссаясыс вермасны волыны йӧзӧс социальнӧя доръян шӧринӧ бурдӧдчӧм вылӧ сертификатла. Но сыла шыӧдчытӧдз висьысьыслы колӧ сайкавны (та йылысь паськыдджыка миян газет гижліс июнь 26 лунся номерын – Н.Р.).
Комиын МВД-ысь наркотикӧн вӧдитчӧм бӧрся видзӧдан управлениеса «А» юкӧнӧн веськӧдлысьӧс вежысь Сергей Зелёнкин:
–2024 воын Комиын наркотиккӧд йитӧдын 1.108-ысь торкӧмаӧсь оланпас. Тайӧ став сикас мыжсьыс 8,5 прӧчент. 922 морт иналӧма-вузалӧма дурмӧдчанторсӧ, а 160-ӧн видзӧмаӧсь дзебасын. Уголовнӧй кывкутӧмӧ кыскӧмаӧсь 378 мортӧс, 184-ӧс – котырӧн мыж вӧчӧмысь. 1.006-ӧс кыскӧмаӧсь административнӧй кывкутӧмӧ. На лыдысь 70 прӧчентсӧ – наркотикӧн уколасьӧм-тшынасьӧмысь.
Тавося 5 тӧлысьӧн уголовнӧй кывкутӧмӧ кыскӧмаӧсь нин 121 мортӧс, на лыдысь 73-ӧс – наркотик иналӧмысь да 44-ӧс – дзебасын видзӧмысь. Таво кык пӧв унджык мыж вӧчӧмаӧсь ӧтуввез да телекоммуникация пыр. Мӧйму 199-ысь, а таво нин 411-ысь!
Дурмӧдчанторйӧн уколасьӧмысь административнӧй кывкутӧмӧ таво кыскисны 446 мортӧс.
Быд во Комиын мырддям 40-45 килограмм дурмӧдчантор, таво кызьӧс нин мырддим.
Пасъя, мортыс кӧ ачыс шыӧдчис полицияӧ, врач дорӧ отсӧгла, сійӧс оз кыскыны кывкутӧмӧ. Уколасьӧм-тшынасьӧмысь вермасны кыскыны административнӧй кывкутӧмӧ – перъясны 4-5 сюрс шайт либӧ 15 сутки кежлӧ пуксьӧдасны ИВС-ӧ.
Россияса дзескыдінъясын 25 прӧчент пукалысьыс вештӧ наркотик помысь мыж. Дурмӧдчан быдмӧг быдтӧмысь Россияса Уголовнӧй кодексысь 231-ӧд статья серти перъясны 300 сюрс шайт штрап либӧ 8 во кежлӧ пуксьӧдасны дзескыдінӧ. Патераад кӧ лэдзан кодъясӧскӧ уколасьны, 7 во ковмас пукавны сутшкасьысь сутуга сайын (232-ӧд статья). Но а сьӧкыдджык мыжысь, шуам, суйӧр сайысь либӧ нӧшта кытыськӧ наркотик вайӧмысь, вӧчӧмысь, иналӧмысь, кодӧскӧ, торйӧн нин тыр арлыдтӧмаӧс, уколасьны велӧдӧмысь перъясны 120 сюрсянь миллион шайтӧдз либӧ пуксьӧдасны этша вылӧ 8 во, а вермас лоны, и нэм кежлас (150-ӧд, 228-ӧд, 229-ӧд да 230-ӧд статьяяс).
Дурмӧдчанторсӧ республикаӧ вайӧны поездӧн либӧ автомашинаӧн Москваысь, Санкт-Петербургысь, Москва да Ленинград обласьтъясысь. Сэтчӧс лавкаысь, аптекаысь сідз шусяна прекурсоръяс, дурмӧдчантор вӧчӧм могысь кутшӧмсюрӧ коланатор позьӧ восьсӧн ньӧбны, а сэсся гудравны. Татшӧм химия сорасыс быдмӧг наркотик дорысь ӧдйӧджык виӧ мортсӧ.
Разӧдӧны и ӧтуввез пыр. Киысь киӧ талун наркотиксӧ некод оз вузав. Дурмӧдчанторсӧ корсьысь вуджӧдӧ торъя тшӧт вылӧ колана мында сьӧм, а сылы ыстӧны снимок, кытчӧ дзебӧма «закладкасӧ».
Тайӧ лёкыслы паныд водзсасьны вермам сӧмын ӧтув, кор быдӧнлӧн, кыдз лючки оласнога мортлӧн, лоас та вылӧ аслас видзӧдлас, кор быд лоӧмтор йылысь мӧдам юӧртны право доръян тэчасӧ. А ӧд талун сідз шусяна «закладкасӧ», наркотика ичӧтик тубрассӧ дзеблалӧны нин школа да детсад йӧрын.
Ог гӧгӧрво наркотикӧн дикмӧдчысьясӧс. Абу ӧмӧй жаль дзоньвидзалунныс? Ӧд наркотик вылӧ абу некутшӧм ГОСТ. Россияын зеллясӧ «пуӧны»-сорлалӧны пӧдвалъясын, гуся лабораторияясын. Тшӧкыда тайӧс вӧчӧны велӧдчытӧм да специальносьттӧм войтыр. И код тӧдас мый гудралӧны-сорлалӧны.
Весиг суйӧр сайысь вайӧм бур наркотиксӧ тшыкӧдӧны. Ӧти вузасьысь аслыс босьтыштас, мӧд, коймӧд. А медым сьӧктаыс эз чин, содтӧны мел, крахмал, сакар да весиг… песласян порошок.
МВД быд во нуӧдӧ наркотиклы паныд водзсасьӧм йылысь социальнӧй рекламалысь «Ӧтув доръям олӧмнымӧс» ставроссияса конкурс. Медбур баннеръяссӧ ӧшлам карса уличаяс пӧлӧн. Наркотиклы паныд тышлы сиӧма и «Дети России», «Призывник», «Твой выбор» да уна мукӧд уджтас.
Нуӧдсьӧ «Сообщи, где торгуют смертью» операция. Быдӧн вермас юӧртны 28-23-10, 28-23-03, 02 да 102 телефонъяс пыр, кӧні вузасьӧны дурмӧдчан сорасӧн.
Бать-мамлы колӧ тшӧкыдджыка сёрнитны быдтасъясыскӧд, видзӧдны, эз-ӧ мыйкӧ вежсьы налӧн оласногын. Наркотикӧн дурмӧдчысь ныв-зон гусьӧн сёрнитӧны телефон пыр, мыйкӧ быттьӧ дзеблалӧны бать-мамсьыс, оз тӧдмӧдны ёртъ-ясыскӧд, и медым некод найӧс эз гӧгӧрво, сёрнитӧны сідз шусяна сленгӧн да жаргонӧн. Кагаыслӧн лёкмӧ паметьыс, сійӧ эновтчӧ радейтана хоббиысь, дугдӧ ветлыны урокъяс вылӧ, корсюрӧ дась ставсӧ, мый сетан, сёйны, а мӧдысь крӧшки вомас оз босьт, овлӧ, гортсьыс гусявлӧ сьӧм, дона кӧлуй-эмбур либӧ, мӧдарӧ, сьӧрсьыс вайӧ донаторъяс, кодъясӧс бать-мамсяньыс сьӧм вылӧ эз эськӧ вермы ньӧбны.
<> Николай РАЗМЫСЛОВ. Снимокыс авторлӧн.