«Сыктывкар» концертасян залын вӧчисны челядьлӧн регионъяскостса «Юркытш» («Венок дружбы») фестиваль-конкурслы кывкӧртӧд. 49 вермысьлы вичмисны виччысяна наградаяс да козинъяс.
Тайӧ гажсӧ котыртлісны дас кыкӧдысь нин. «Юркытш» ӧтувтіс енбиа сьылысьясӧс, творчествоа котыръясӧс, национально-культурнӧй организацияясын зільысьясӧс. Таво фестивальӧ пырӧдчисны и Архангельск обласьтысь ныв-зон.
7-17 арӧса артистъяслы конкурсыс вӧлі куим тшупӧда, медым найӧ вермисны тырвыйӧ петкӧдлыны енбисӧ квайт нимпасын: «Йӧзкостса сьыланкыв да йӧктӧм», «Художествоа кыв», «Инструментальнӧй искусство», «Эстрада сьылӧм», «Театр творчество». Сцена вывсянь томулов нимӧдісны Чужан му да Айму вӧсна Ыджыд тышын Вермӧм дорйысьяслысь подвигсӧ.
Фестиваль-конкурсыс ӧтувтіс 400-ысь унджык челядьӧс. Май 30 лунӧ 64 сьылысь да творчествоа котыр, кодъяс бура петкӧдчисны заочнӧй тшупӧдын, сьылісны-йӧктісны да тшӧтш и кывбур лыддисны Коми Республикаса войтырлӧн Ёртасян керкаын. Жюриысь профессиональнӧй экспертъяс вылӧ донъялісны том артистъясӧс.
Май 31 лунӧ челядьлы котыртлісны оратор искусство кузя мастер-класс, кодӧс нуӧдіс Евгения Клаткевич. Ныв-зонкӧд аддзысьлісны-сёрнитісны жюриысь экспертъяс. Таысь кындзи томуловлы дасьтӧмаӧсь вӧлі гажӧдчан программа.
Кыдзи и быд во, конкурссӧ сигӧртісны Челядьӧс доръян войтыркостса лунӧ. Гала-концерт дырйи томулов сьылӧмӧн да йӧктӧмӧн «кыисны ёртасян юркытш», кӧні тырвыйӧ петкӧдчис республикаса да Россияса уна сикас войтырлӧн культураыс. А ышӧдысь-ыззьӧдысьяснас вӧліны налӧн наставникъяс, бать-мам, ёртъяс, автономия-землячествоын водзмӧстчысьяс.
Фестивальса Гран-при босьтіс «Сигудӧк» сьылан-йӧктан ансамбль бердысь хореография студия. Козинсӧ кыпыда сетіс Ёртасян керкаӧн веськӧдлысь, Россияса войтыр ассамблеялӧн регионса юкӧнӧн юрнуӧдысь Григорий Хатанзейский.
–Быд кагаын эм енби кинь. И миян, верстьӧлӧн, мог – пестыны сійӧс, мед ломзяс да югзьӧдас кагалы водзӧ олӧмас туйсӧ, ышӧдас шедӧдны выль вермӧмъяс. «Юркытш» конкурсас быдӧн вермысь, и таын ыджыд пайыс челядьӧс велӧдысьяслӧн да бать-мамлӧн, – тӧдчӧдіс Григорий Хатанзейский.
Гала-концерт помасис мича сьыланкывйӧн. Сьылісны ставӧн: солистъяс и творчествоа котыръяс. А залын пукалысьяс горасьыс-гораа клопайтісны налы.
<> Гижӧдсӧ дасьтіс Екатерина МИКУШЕВА. Снимокъясыс ӧтуввезйысь.