Кольӧм вежонӧ сигӧртісны «Медбур небӧг» республикаса литература конкурс. Котыртысьыс – Коми Республикаса национальнӧй министерство.
–Конкурс вылӧ воисны зэв интереснӧй да бур петасъяс. Таво вӧзйисны унджык небӧг, сідзкӧ, конкурсыс колана. Быд автор пуктіс аслас гижӧдӧ ловсӧ, медым миянлы, лыддьысьысьяслы, вӧлі окота босьтлыны киӧ небӧгсӧ кыдз медводдзаысь, сідз и уна во мысти.
Вермысьясӧс колян воясӧ моз жӧ нимӧдасны лӧддза-номъя 21 лунӧ Удораса Кослан сиктын «Коми небӧг» республикаса гаж вылын, – пасйис национальнӧй политикаса министр Роман Носков.
Таво жюри донъяліс 2024 воын лэдзӧм 21 небӧг. На лыдын Коми йӧзӧдчан керкаӧн дасьтӧм кык коми петас: Александр Шебыревлӧн «Меным югыдыс тырмис…» кывбура да сьыланкывъя сборник да Алёна Старцевалӧн «Нимкодь лоны капитанӧн!» зонпоснилы кывбур чукӧр. Кыкнанныс лоины конкурсын вермысьясӧн. Найӧс пасйисны «Медбур коми небӧг» да «Челядьлы медбур коми небӧг» нимпасъясын.
Коми йӧзӧдчан керкаӧн веськӧдлысь Галина Макарова такӧд йитӧдын пасйис:
–Меным зэв нимкодь, мый Коми йӧзӧдчан керкаӧн лэдзӧм кык коми небӧг лоисны татшӧм тӧдчана конкурсын вермысьясӧн.
Тайӧ вермӧмыс лои торйӧн нин ыджыд козинӧн Александр Васильевичлы, коді таво пасйӧ тшупӧда пас. А Алёна Старцевалӧн челядьлы небӧгыс лои нин лыддьысьысь посниуловлы медся радейтанаӧн.
Чолӧмала гижысьясӧс да лыддьысьысьясӧс!
Мый ӧткодьыс тайӧ кык небӧгас? Ӧльӧксан Шебыревлӧн небӧгӧ чукӧртӧма поэтлысь верстьӧлы гижӧм пӧшти став кывбурсӧ. Алёна Старцевалӧн тшӧтш ӧкмӧма став, но зонпоснилы нин кывбурыс.
Автор висьтасьӧ:
–Водзті гижлі сӧмын верстьӧлы, а кор чужисны челядь, медводз Максим да Аня, сэсся Мишук, такӧд тшӧтш окота лои челядьлы гижны. Узьны водтӧдігас мойдлі, юалӧмъяс вылӧ вочакывъяссӧ гартлывлі кокньыдик кывбуръясӧ. Уджъясӧс мӧдӧдлі «Би кинь» журналӧ да вӧлі зэв рад, кор йӧзӧдлісны. Кор ачым босьтчи уджавны журналас, челядьлы куті гижны тшӧкыдджыка. Тематическӧй небӧг-дзолюк дасьтігӧн мукӧд авторкӧд тшӧтш лӧсьӧдлі мам, бать, Выль во, кань, чужан му да мукӧдтор йылысь кывбуръяс. Тадзи вочасӧн журналысь кывбуръяс чукӧрмисны быдса небӧг вылӧ. Нимкодь, мый сійӧ петіс да разаліс библиотекаясӧ. Ыджыд конкурсын вермӧм лои меным виччысьтӧмторйӧн. Небӧгӧн ме тӧдмӧді лыддьысьысьясӧс уналаын нин: С.Я.Маршак нима республикаса библиотекаын, Сыктывкарса детсадъясын, республикаса школаясын. Коми книга гаж дырйи небӧгӧс киас босьтасны и Удораса зонпосни.
Александр Шебыревлысь небӧгсӧ лӧсьӧдісны Олег Уляшев да Елена Валужене. Со мый найӧ пасйӧны выль петас йывсьыс:
–Шебырев Ӧлексан важ тунъяс моз шыӧдчӧ вӧр-ва, би да ва дорӧ, накӧд воссьӧ ловнас. Быдлунъясьыс аддзӧ шемӧс. Тайӧ абу шензьӧм, абу чуймалӧм. Шемӧсыс сылӧн – нэмӧвӧйся вӧтъяс дорӧ сибавлӧм, вӧта-вемӧса костас олӧм, лов вӧрзьывлӧм, кор ӧти здукӧн гӧгӧрвоан ыв- лавылыслысь ыдждасӧ да джудждасӧ, кор ывла пӧрӧ Ывлаӧ, а матiгӧгӧрсаыс воссьӧ пыдӧстӧм Енколаӧн. Сэн пуӧ олӧм, сэн вензьӧны югыда-пемыда, сэн ловъяс бертчӧны полтӧсъяскӧд, сэн морт кольӧ мортӧн либӧ усьӧ пемӧсӧдз… Лыддьысьыськӧд поэт сёрнитӧ веськыда, висьталӧ сы йылысь, мый ачыс тӧдӧ. Та понда Шебыревлы эскан.
Коми морт дорӧ нӧшта ӧти туйӧн Ӧлексан Шебырев бӧрйӧма сьыланкыв. Кор кывбур вуджӧ сьыланкывйӧ, сылӧн содӧ выныс, музыка, ритм, гӧлӧс содтӧны-тӧдчӧдӧны вежӧртасъяссӧ да образъяссӧ. Чайтам, и та понда Шебыревлӧн книгаыс лоас лов серти оз сӧмын лыддьысьысьяслы, но и коми сьыланкыв радейтысьяслы.
* * *
Коми небӧгъяс кындзи жюри донъяліс и роч небӧгъяс.
«Роч кывъя медбур небӧгӧн» лоис Григорий Спичаклӧн «Глоток воды, вина и крови», кодӧс лэдзис «Амирит» ИКК. «Челядьлы роч кывъя медбур небӧгӧн» – Анатолий Валевскийлӧн «Жабыч» небӧг, кодӧс лэдзӧма «Аквилегия-М» издательствоын.
Конкурслысь торъя приз сетӧма «Ижемское селение» небӧгысь Татьяна да Антонина Артееваяслы.
<> Алёна Нестерова. Снимокъясыс ӧтуввезйысь.