Кольӧм вежонӧ Коми Госсӧветын кыпыда воссис «Дорога к Победе» творческӧй конкурсын вермысьяслӧн серпас-уджъяса выставка.
Казьтыштам, тайӧ конкурссӧ нуӧдісны велӧдан юкӧн сӧвмӧдан республикаса институт да регионса йӧзӧс велӧдан да наука министерство Коми парламент отсӧгӧн.
Чукӧртчылӧм дырйиыс гӧсьтъяс дорӧ шыӧдчигӧн Коми Государственнӧй Сӧветӧн веськӧдлысь Сергей Усачёв пасйис, мый тайӧ выставкаыс ӧтувтӧ оз сӧмын енбиа челядьӧс, а збыльысь патриотъясӧс, кодъяс асланыс творчество пыр петкӧдлӧны, кутшӧма радейтӧны Чужан мусӧ да пыдди пуктӧны Айму вӧсна Ыджыд тышын миян странаын олысьяслысь подвигсӧ.
–Кӧсъя аттьӧавны выставка котыртысьясӧс том войтырӧс воспитайтӧмысь, бурас туйдӧм-ышӧдӧмысь. Миянлы, Гӧссӧветысь депутатъяслы, нимкодь вӧлі пырӧдчыны томуловкӧд тайӧ уджас, – висьталіс Сергей Усачёв.
Сійӧ сідзжӧ содтіс, мый челядь асланыс уджъясӧн – серпас тайӧ кӧть письмӧ либӧ ки помысь вӧчӧмтор – пуктӧны Победа дорысьяслысь югыд паметьсӧ, налысь подвигсӧ нимӧдӧм-нэммӧдӧмӧ тӧдчана пай.
Спикер сиис конкурсӧ петкӧдчысьяслы дзоньвидзалун да творчествоын выль вермӧмъяс.
«Дорога к Победе» конкурсыс нуӧдсьӧ 2020 восянь. Сы могысь, медым видзны историяын Великӧй Отечественнӧй война йылысь паметьсӧ.
Проектыслӧн торъя мог – ышӧдны босьтчыны творческӧй уджӧ вермытӧм челядьӧс, интернатъясысь да детдомъясысь енбиа томуловӧс.
Таво конкурс вылас воӧма республикаса 15 муниципалитетысь 133 творческӧй удж. Вермысьяссӧ вӧлі бӧрйӧма Ыджыд Вермӧмсянь 80 во пасйӧм водзын. Уджъяссӧ донъялӧма некымын нимпасын. Сы лыдын ветеранъяслы ки помысь вӧчӧм медбур козинъяс, фронтӧвикъяслы сьӧлӧмӧ йиджана письмӧяс, Коми Республикаса геройяслы да налӧн подвиглы сиӧм мультимедийнӧй проектъяс.
Выставкаса жюриӧс да гӧсьтъясӧс торйӧн нин вӧрзьӧдіс Сыктывкарса 28-ӧд номера школаысь 14 арӧса велӧдчысь Ирина Терентьевалӧн «Боечлы письмӧ» нимпасын уджыс.
Выставкасӧ восьтігӧн чукӧртчылӧм дырйиыс Ирина висьталіс дед йывсьыс, кодлысь югыд паметьсӧ видзӧ сьӧлӧмас да нэммӧдӧ тшӧтш и уна сикас конкурсӧ творческӧй уджъясӧн пырӧдчӧмӧн.
* * *
Регионса велӧдан да наука министерствоӧн веськӧдлысьӧс вежысь Максим Ганов пасйис, мый «Дорога к Победе» конкурсас быд во пырӧдчӧ зэв уна томулов. Таво лауреат-призёръясысь эз ставӧн вермыны волыны тайӧ чукӧртчылӧм вылас, мунӧмаӧсь шойччан лагеръясӧ да. Но, кыдз тӧдчӧдіс Максим Ганов, воспитательясыс быть петкӧдласны налы, кыдзи нимӧдісны тайӧ выставка вылас енбиа челядьӧс, сеталісны налы козин-дипломъяс, а наставникъясыслы – Госсӧветӧн веськӧдлыссянь аттьӧалана письмӧяс. И, дерт жӧ, томуловлы лоас нимкодь.
А кодъяс эз вӧвны тайӧ чукӧртчылӧм дырйиыс, налы наградаяссӧ сетасны Госсӧветысь депутатъяс республикаса кар-районӧ уджмогӧн воліганыс.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.